Dangshikaq Lùqlong Asik
34
Haû Yhûmsîng Garai gi, Mosheq lé, “Hí lhê é lùqlong í long sû é, lùqlong í long hkoq aq; nàng lhoqmyha pyâm é lùqlong í long má kyûng kâ tô é dangcham pé lé, Ngò, haû í long má kâ tap to râ nghut lhê. 2 Nàpkyó nàpsûn lé rì rì kut yû mù, Sinaq Bûm má dòq lò luî, bùm nyuq Ngá é hí má lo yàp shit àq. 3 Ó yùq le, nàng eq a bo dòq lò sháng gàq; hau htoq agó, bùm gón má byù rayùq le ge htoq shit râ a nghut. Sau bainám eq no myang pé lháng bum hí má mhan ge zo râ a nghut.” ga taî ri.4 Haû mù, Mosheq gi, haû Yhûmsîng Garai hkunmó hkyô é eq rajung za, hí lhê é lùqlong í long sû é lùqlong í long hkoq yû mù, htang nàpkyó, lùqlong haû í long lé lòq mai wàq chûng luî, Sinaq Bùm má dòq ló ri. 5 Haû jáng, haû Yhûmsîng Garai gi, mhuthtui mai gyó lé lô mù, haú má yhang eq rahá yàp to luî, Yhûmsîng Garai gâ é Yhâng myìng lé lhoqhtoq shit ri. 6 Haû Yhûmsîng Garai gi, Mosheq é hí mai laî ló luî, “Haû Yhûmsîng Garai, haû Yhûmsîng Garai, shogyo nhikmyin myìt eq jeju byíng é Garai Gasang nghut luî, luì za nhikjum a yô é htoq agó, chyitdàp myìt eq jujúm myìt byíng zan to mù, 7 byù mun mun sen sen lé chyitdàp myìt shit luî, agè ashop hkyô, gumlau toq hkyô eq yubàk mara pé lé mara hkyut byî ri. Nghut kôlhang, Yhang gi, mara bò sû lé, mara dam a byî é a tô to nghut ri; Yhang gi, pyàt bán sum myi bán jé shoq, zo wuî shu wuî lé mó wui é yubàk mara dam byî ri.” ga taî pyo ri.
8 Haú hkûn, Mosheq gi, radá dâm myigùng jé shoq ngóm gòp mù, noqkuq uchyang, 9 “Yhûmsîng Garai ê, Náng é myòq hí má ngò myòqdong wó é nghut jáng, Nàng Yhûmsîng Garai ngá-mòq eq rahá bo dòq lò àq. Byù shí bang gi, myìt htân bang nghut kôle, ngá-mòq é agè ashop hkyô eq ngá-mòq é yubàk mara lé mara hkyut pyám byi luî, ngá-mòq lé Náng é silî wunlî dông kut yû laq ô!” ga taî ri.
10 Haú hkûn, haû Yhûmsîng Garai gi, “Ngò, nàng eq dangshikaq tô to râ nghut lhê. Ngò gi, náng é byu pé bànshoq bâng é hí má, myìdàm htoq gón mâ é a-myû hká myu é hí má le a kut wú shî é maúhpo múzó lé kut shit râ nghut lhê. Nàng bo nyi tô é byù myû wuì gi, náng é matú, Ngò, haû Yhûmsîng Garai kut râ nghut é múzó hkâ-í yhang gyùq chiq hpo nghut é lé myàng kôrâ nghut lhê. 11 Hkû-nyí, Ngò, nang lé hkyô tô é hkunmó lé châng kut àq. Ngò gi, náng é hí mai Amori byù, Hkanan byù, Hiti byù, Perizi byù, Hiwi byù eq Yebusi byu pé lé hkat htoq pyám byi râ nghut lhê. 12 Nàng dòq ló râ maumyî má nyi é bang eq myìt hui dangshikaq a to râ matú sidìq nyì àq; haû a nghut jáng, haû gi, náng chyáng dumzo dùt nyì râ nghut lhê. 13 Yhángmòq é kaúgyàp pé lé hpyoq hpyi pyám byi ra râ nghut lhê; yhángmòq mai chyoiyúng lhê gâ é lùqzìng pé lé bàt hkyop pyám mù, yhángmòq é Ashera zìnga pé lé zân lhêng pyám byi keq. 14 Gótû hparà lé hkâ noqkuq kó; hkâsu mù gâ le, Manôn gâ é myìng wó sû Yhûmsîng Garai gi, manôn sê é Garai Gasang nghut lhê.
15 Haú mau má nyi é byu pé eq myìt hui danghtum a htûm to râ matú sidìq nyì keq; haû a nghut jáng, yhángmòq gi, yhángmòq é hparà pé eq gùngsho shut é mara kut mù, hparà haú lé hkungga nhông byi kô é hkûn, núngmòq lé jì kôluî, núngmòq gi, yhángmòq é hkungga zoshuq bo záng zo kôrâ nghut lhê. 16 Hau htoq agó, yhángmòq é byìzô pé ra-am lé, nungzo yùqzô pé lé yù byi jáng, byìzo haú bang gi, yhángmòq é hparà pé eq gùngsho shut kô é hkûn, nungzo yùqzô pé lé le shuî shut ló byùq kôrâ nghut lhê.
17 Náng é matú hparà hpôlhô ge saí râ a nghut.
18 Múnchi a bo é Mùk Zo Poî kut nyî aq. Ngò, nang lé hkunmó hkyô tô é eq rajung za, nyhit nyí yhang múnchi a bo é mùk zo ra râ nghut lhê. Nàng gi, Abi lhôhkyap má Egutuq ming mai htoq lo é nghut mù, Abi lhôhkyap má masàt tô é ahkyíng lé poî haû kut ra râ nghut lhê.
19 Ûng gyó zo-mún hkangmó gi, Ngá é chyat nghut lhê; no myang nghut nghut, sau bainám nghut nghut, náng é shigu gaunyhaú mâ é sânghi shuî é alo zo bànshoq le, Ngá é chyat nghut lhê. 20 Sânghi shuî é loze zo lé gi, sau zô èq htaî hkyi htoq yû ra râ nghut lhê; nghut kôlhang, nàng a hkyi htoq yu é nghut jáng, hau é lìngzing lé ne hkyuî pyám aq. Nungzo yùqzô pé mâ é yùqzo zo-mún bànshoq lé gi, htaî hkyi htoq yû ra râ nghut lhê.
Ó yùq le, Ngá é hí má lòqkôm lé ge htoq shit râ a nghut.
21 Hkyuq nyí yhang nàng mú zuî shi-kùt luî, nyhit nyí nghû râ nyí gi, nô yù ra râ nghut lhê; yò hpuq yòq nghut kôlhang, kyô shu yòq nghut kôlhang, nàng nô yù ra râ nghut lhê.
22 Sânghi myhîng é súngsô shû yù mù, Nyhit Bàt Byíng Poî kut luî, zàn ló htáng jáng, Kyôshi Tsing Poî le, nàng kut ra râ nghut lhê. 23 Náng chyáng mâ é yùqgè zorâm wuì bànshoq bang gi, razàn má sum dá, Isira-elaq é Garai Gasang, haû Ahko Ahkáng lhúnglháng wó Sû Yhûmsîng Garaî é hí má lé htoq shit ra râ nghut lhê. 24 Ngò gi, gótû a-myû wuì lé, náng é hí mai hkat htoq pyám byi mù, náng é maumyî lhoqlâm byi râ nghut lhê. Nàng, náng é Garai Gasang nghut é, haû Yhûmsîng Garaî é hí má ê htoq shit râ matú, razàn má sum dá dòq e ló é hkûn, náng é maumyî lé ó yùq le myòqnòq râ a nghut.
25 Hkungga sui lé, múnchi bo é mùk eq tsúm mù, Ngo lé ge nhông byi râ a nghut; Lhoqlhai Poî mâ é hkungga haî lé le, htang nàpkyó jé shoq ge tô to râ a nghut.
26 Náng é maumyî mâ é sânghi myhîng é kyôshi myuishi mâ é je ge é pé lé, náng é Garai Gasang nghut é, haû Yhûmsîng Garaî é yhûm má yu lé ra râ nghut lhê.
Bainám zo lé, yhâng nû é naú wing eq rahá ge chyoq râ a nghut.” ga taî ri.
27 Hau htâng, haû Yhûmsîng Garai gi, Mosheq lé, “Dang shí pé lé kâ hkyô to aq; hkâsu mù gâ le, Ngò gi, dang shí pé má cháng mù, nàng eq le, Isira-elaq byu pé eq le dangshikaq tô to bê nghut lhê.” ga taî ri. 28 Mosheq gi, myi xê nyí myi xê myìn yhang zang a zo wuì a shuq é za, haú jowò má Yhûmsîng Garai eq nyi nyi ri. Yhang gi, dangshikaq tô tô é dang nghut é Târâ Yhâng nu Raxê lé, lùqlong haû í long má kâ tô ri.
Mosheq Bùm Mai Gyó Lo É Hkun Lhê É Hkyô
29 Mosheq gi, dangshikaq târâ dàp é lùqlong í long lé yhâng é lòq má chûng mù, Sinaq Bùm mai gyó lo é hkûn, haû Yhûmsîng Garai eq dang nyô bê nghut é yánmai yhâng é myòqdong dùq bang tô é lé a sé nghut ri. 30 Arun eq Isira-elaq byu pé bànshoq bang gi, Mosheq lé myàng kô é hkûn, yhâng é myòqdong dùq bang tô é nghut mù, yhâng chyáng huî htèp ê râ matú gyùq bum akô nghut ri. 31 Nghut kôlhang, Mosheq gi, yhángmòq lé wùt é nghut mù, Arun eq shiwa byù hpúng mâ é ushuq pé bànshoq bang, yhâng chyáng huî htèp e akô nghut ri; haú hkûn, Yhang gi, yhángmòq lé dáng nyo ri. 32 Hau htâng, Isira-elaq byu pé bànshoq bang gi, yhâng chyáng chyâng htèp lé kô é nghut mù, yhang gi, Sinaq Bùm má haû Yhûmsîng Garaî èq yhang lé byî é hkunmó bànshoq lé, yhángmòq lé lhom sang kyô ri.
33 Mosheq gi, yhángmòq lé dáng ban taí jáng, yhâng é myòqdong má myòqnghop lông èq nghop pyâm ri. 34 Nghut kôlhang, yhang gi, haû Yhûmsîng Garai lé dang nyô ra matú, Yhâng é hí má wang ê hkangmó, yhang dum htoq lo é hkûn jé shoq myòqnghop long haú lé hî pyâm ri. Yhang gi, htoq lô mù, haû Isira-elaq byu pé lé, yhang lé hkunmó lhom hkyô kat é hkyô taî kyô é hkûn, 35 yhâng é myòqdong dùq bang tô é lé, Isira-elaq byu pé lhom myang akô nghut ri. Haû mù, Mosheq gi, haû Yhûmsîng Garai lé dang ê wang nyò râ hkûn jé shoq, yhâng é myòqdong má myòqnghop long nghop to to kut ri.