Hkyangjông Pé Lé Lhoqchyoi Lhoqyúng É Hkyô
29
Yhángmòq gi, Ngá é hí má hkyangjong mú wó wûn wàq nyì kó sháng gàq, yhángmòq lé a-ô mâ é dông lhoqchyoi lhoqyúng ra râ nghut lhê; haî le a râ é nohtó zo radu eq saulo zo í du lé kôn yù mù, 2 je ge é súngsô mún lé saî é, múnchi a bo é mùk líng long, xû nyhô é múnchi a bo é mùk htû long eq xû but tô é múnchi a bo é mùk yhám long pé lé yù luî, 3 mùk haú pé lé kyáng ralhum má kat mù, nohtó eq saulo zo haû í du eq rahá kut yu lé ra râ nghut lhê. 4 Hau htâng, Arun eq yhang zo yùqzô pé lé, zùphpong zúm hkum hí má shuî lé mù, gùng chi byi ra râ nghut lhê. 5 Hau htâng, mèbu pé yù mù, Arun lé ahte bu hut luî, hkyangjông é buhîng zo, hkyangjong bu-kó eq wànggò long pé lé hut mù, lòqmú bò tung wòq tô é hpyihit èq hkyangjong bu-kó lé hit byi ra râ nghut lhê. 6 Hau htâng, yhâng é ulhum má uhtup tsung byi mù, uhtup haú má chyoiyúng é htùpsháng tap byi ra râ nghut lhê. 7 Hau htâng, bùt byi râ namngón xû yù mù, yhâng é ulhum mai hut gyun byî é dông, yhang lé bùt byi ra râ nghut lhê. 8 Yhang zo yùqzô pé lé le wùt yù mù, ahte bu hut byi luî, 9 uhtup tsung byi ra râ nghut lhê. Hau htâng, Arun eq yhang zo yùqzô pé lé hpyihit hit byi ra râ nghut lhê. Haû hkyangjong wò gi, pyàt pyàt zaí zaí é matú hkyô tô é hkunmó dông mai yhángmòq é matú nghut bê nghut ri.Nàng gi, haú dông, Arun eq yhang zo yùqzô pé lé hkyangjong ayá dáng byi ra râ nghut lhê.
10 Nàng gi, nohtó haú lé zùphpong zúm hí má she lé luî, Arun eq yhang zo yùqzô pé gi, nohtó hau é ulhum má lòq ke ra kôrâ nghut lhê. 11 Nohtó haú lé, zùphpong zúm é hkúmdong, haû Yhûmsîng Garaî é hí má sat ra râ nghut lhê. 12 Nohtó hau é sui ra-tsuí yù mù, náng é lòqnyhuî èq hkungga gyàp hkyuî pé má bùt luî, myìt tô é sui lé gi, hkungga gyàp awang má hut hkyó ra râ nghut lhê. 13 Hau htâng, sing û lé nghop tô é xû long bànshoq, sing má dàp é sho-myhên, jínlhum í lhum eq haú pé má dàp é xû pé lé, hkungga gyàp hau é ahtoq má nyhê pyám ra râ nghut lhê. 14 Nghut kôlhang, nohtó hau é sho, akuq eq hkyi pé lé gi, wàp shinggan má nyhê hkyô pyám ra râ nghut lhê. Haû gi, mara hkyut hkungga nghut lhê.
15 Saulo haû í du mâ é radu lé nàng she ê byi mù, Arun eq yhang zo yùqzô pé gi, hau é ulhum htoq má yhángmòq é lòq tsing ke ra kôrâ nghut lhê. 16 Saulo haú lé le nàng sat luî, sui lé yù mù, hkungga gyàp ayàm pé má ko gyun ra râ nghut lhê. 17 Saulo lé ahtung htung zân hpyit mù, sing û eq hkyî pé lé chi luî, haú pé lé, ulhum eq gótû shohtung pé eq rahá bum to mù, 18 saulo haû du gón lé hkungga gyàp htoq má nyhê hkyô pyám ra râ nghut lhê. Haû gi, Yhûmsîng Garaî é matú myi nyhé hkungga nghut ri; haû gi, Yhûmsîng Garaî é matú, myî èq nyhê nhông byî é, namngón hkungga nghut ri.
19 Saulo gódu lé le nàng she ê byi mù, Arun eq yhang zo yùqzô pé gi, hau é ulhum htoq má yhángmòq é lòq tsing ke ra kôrâ nghut lhê. 20 Saulo haú lé le nàng sat luî, sui ra-am yù mù, Arun eq yhang zo yùqzô pê é lòqyo noshi pé má le, yhángmòq é lòqyo lòqmócham pé má le, yhángmòq é lòqyo hkyîmócham pé má le tsing bùt byi aq. Myìt tô é sui lé gi, hkungga gyàp ahpyo yàm pé má ko gyun ra râ nghut lhê. 21 Haû hkungga gyàp mâ é sui eq bùt nyi é namngón xû ra-tsuí yù mù, Arun lé le, yhâng é buhîng má le, yhang zô pé lé le, yhángmòq é buhîng pé má le ko gyun ra râ nghut lhê. Haú hkûn, yhang le, yhang zo yùqzô pé le, yhángmòq é buhîng pé le, chyoiyúng bekô râ nghut lhê.
22 Saulo haû gi, ayá dáng byi râ matú nghut mù, hau é xû lé le, xû dàp é sho-myi lé le, sing û lé nghop tô é xû long lé le, sing má dàp é sho-myhên lé le, jínlhum í lhum eq haú pé má dàp é xû pé lé le, lòqyo tangsân lé le yù mù, 23 haû Yhûmsîng Garaî é hí má tô tô é, múnchi a bo é mùk kyáng mai, mùk líng htung rahtung, xû nyhô tô é mùk htû long ralong eq mùk yhám long ralong lé yù ra râ nghut lhê. 24 Haú pé bànshoq lé, Arun eq yhang zo yùqzô pê é lòq má kat mù, wàq hê hkungga dông, haû Yhûmsîng Garaî é hí má haú pé lé tsing wàq hê nhâng ra râ nghut lhê. 25 Hau htâng, yhángmòq é lòq mai haú pé lé yù mù, Yhûmsîng Garaî é hí má namngón shôm dùt râ matú, myi nyhé hkungga eq rahá hkungga gyàp htoq má nyhê pyám ra râ nghut lhê. Haû gi, Yhûmsîng Garaî é matú myi nyhé hkungga nghut lhê. 26 Hau htâng, Arun lé ayá dáng byî é sau lô é wànggàng sho lé, wàq hê hkungga dông haû Yhûmsîng Garaî é hí má wàq hê ra râ nghut lhê; haû gi, náng é gàmbùm nghut râ nghut lhê.
27 Arun eq yhang zo yùqzô pé eq sêng é, ayá dáng byî é saulo mâ é wàq hê hkungga dông wàq he é wànggàng sho eq wàq toq hkungga dông wàq toq é tangsân lé, nàng lhoqchyoi lhoqyúng ra râ nghut lhê. 28 Haû gi, Arun eq yhang zo yùqzô pê é matú, Isira-elaq byu pê chyáng mâ é ahtum abyùq é gàmbùm nghut ri. Haû gi, wàq toq hkungga nghut ri. Haû gi, Isira-elaq byu pê é zùmhkaû hkungga mai, haû Yhûmsîng Garai lé yhángmòq byî nyì râ nghut é wàq toq hkungga nghut ri.
29 Arun é chyoiyúng buhîng pé lé gi, yhâng é yùqzo awùt ashîn pé lé byi ra râ nghut lhê; haû jáng, yhángmòq gi, namngón xû bùt byî é hui mù, hkyangjong ayá dáng byi huî é hkûn, haú pé lé myang wùt kôrâ nghut lhê. 30 Arun é hkô má hkyangjong wò yù râ nghut é yhang zo yùqzo gi, haû Chyoiyúng Jowò má hkyangjong wò wun wàq râ matú, zùphpong zúm má lé jé é hkûn, nyhit nyí jé shoq mèbu haú pé lé wùt to ra râ nghut lhê.
31 Hkyangjong ayá dáng byî é saulo zo sho lé nàng yù mù, lhoqchyoi lhoqyúng tô é jowò má chyoq ra râ nghut lhê. 32 Arun eq yhang zo yùqzô pé gi, saulo zo sho eq kyáng má kat tô é mùk lé, zùphpong zúm hkum má zo ra kôrâ nghut lhê. 33 Yhángmòq gi, yhángmòq lé ayá dáng byî é eq lhoqchyoi lhoqyúng byî é mâ é mara hkô htaí hkungga haú pé lé zo ra kôrâ nghut lhê. Nghut kôlhang, hkungga haú pé gi, chyoiyúng zê nghut é yánmai, góbang ó yùq le ge zo kôrâ a nghut. 34 Ayá dáng byî é saulo zo sho nghut nghut, mùk nghut nghut, htang nàpkyó jé shoq myìt tô é nghut jáng, haú pé lé nyhê hkyô pyám ra râ nghut lhê. Haû gi, chyoiyúng zê nghut é yánmai, a ge zo râ nghut lhê.
35 Ngò, nang lé hkunmó hkyô tô é jung hkangmó eq rajung za, Arun eq yhang zo yùqzô pé lé kut byi ra râ nghut lhê; nàng gi, yhángmòq lé ayá dáng byî é múzó lé, nyhit nyí yhang zui saí ra râ nghut lhê. 36 Mara hkô htaí hkungga kut râ é matú, nyí wuî nohtó radu du lé, mara hkyut hkungga dông nhông byi ra râ nghut lhê. Hkungga gyàp é matú mara hkô htaí hkungga nhông byî é hkûn, haú lé lhoq sân-yúng mù, haú lé lhoqchyoi lhoqyúng râ matú, namngón xû bùt byi aq. 37 Nyhit nyí yhang, hkungga gyàp hau é matú mara hkô htaí hkungga nhông byi luî, haû lé lhoqchyoi lhoqyúng ra râ nghut lhê. Haú hkûn, hkungga gyàp haû gi, chyoiyúng htáng râ nghut mù, haú lé záng é haî nghut kôle, chyoiyúng râ nghut lhê.
38 Razàn bò bê é sau zo í du lé, nyí wuî, nàng, hkungga gyàp má mán mán nhông byi ra râ nghut lhê. 39 Radu lé gi, nàpkyó túm má nhông byi mù, gódu lé gi, myínhtâng zó lé nhông byi ra râ nghut lhê. 40 Sau zo sânghî du eq rahá, je nú é mún ngo joí mâ é xê gàmbùm ragàmbùm eq pyik htoq tô é tsanlun xû rachyóng mâ é myi tú ratú lé nyhô tô é lé le, shuq jung hkungga dông nghut é, tsibyiq wing rachyóng mâ é myi tú ratú lé le, nhông byi ra râ nghut lhê. 41 Gótû sau zo lé myínhtâng zó nhông byî é má, gùqzò hkungga eq nàpkyó túm lé kut é su shuq jung hkungga lé lhóm ra râ nghut lhê. Haû gi, Yhûmsîng Garaî é matú, myî èq nyhê nhông byî é, namngón hkungga nghut ri.
42 Jé lô râ pyàt bán hkangmó mâ é bang gi, zùphpong zúm hkum hí, haû Yhûmsîng Garaî é hí má, myi nyhé hkungga haú lé mán mán kut ra kôrâ nghut lhê. Ngò gi, haú má núngmòq lé hui mù, dang nyô râ nghut lhê. 43 Ngò gi, haú má Isira-elaq byu pé lé hui râ nghut mù, jowò haû, Ngá é hpungwup shingkâng èq chyoiyúng nyî râ nghut lhê.
44 Haû mù, Ngò gi, zùphpong zúm eq hkungga gyàp lé lhoqchyoi lhoqyúng mù, Arun eq yhang zo yùqzô pé lé, hkyangjong dông Ngo lé dójaú nyî kôrâ matú lhoqchyoi lhoqyúng râ nghut lhê. 45 Haú hkûn, Ngò gi, Isira-elaq byu pê chyáng nyì mù, yhángmòq é Garai Gasang dùt râ nghut lhê. 46 Ngò gi, yhángmòq chyáng wó nyi nyì râ matú, yhángmòq gi, Ngò, yhángmòq lé Egutuq ming mai shuî htoq lo é sû, yhángmòq é Garai Gasang nghut é, haû Yhûmsîng Garai nghut é lé sé kôrâ nghut lhê. Ngò gi, yhángmòq é Garai Gasang, haû Yhûmsîng Garai nghut lhê.