Hkyangjong Buhîng Pé
28
Nungmang Arun eq yhang zo yùqzô pé gi, hkyangjong dông Ngo lé wó dójaú nyî kó sháng gàq, yhang eq yhang zo yùqzô nhiktâng wuì Nadap, Abihu, Ele-aza eq Ihtama pé lé, Isira-elaq byu pê chyáng mai hkyin htoq yû mù, náng chyáng ji yù àq. 2 Nungmang Arun chyáng xânghpoq nge wó é eq hpúng bo nyì râ matú, nàng, yhang lé chyoiyúng buhîng pé saí byi ra râ nghut lhê. 3 Arun gi, hkyangjong rayùq dông Ngo lé wó dójaú sháng gàq, yhang lé chyoiyúng sû dông kut to râ matú, yhang lé buhîng hkyup byi râ hkyô, haû Ngò hpàqchyî byéng-yá byi mù, lòqmú kûng é byù bànshoq bang lé taí aq. 4 Yhángmòq saí râ buhîng pé gi, wànggò long, hkyangjong bu-kó, buhîng, wòq é bu, uhtup eq hpyihit pé bò ra râ nghut lhê. Nungmang Arun eq yhang zo yùqzô pé gi, hkyangjông pé dông Ngo lé wó dójaú kó sháng gàq, yhángmòq é matú, chyoiyúng buhîng pé lé saí byi kó sháng gàq. 5 Yhángmòq lé, hîng hkyîng, mauhkûng nyuì nyui é, mê é eq zam zam ne é hkyîng eq nú nhâm é jihkyîng pán pé lé chûng nhâng àq.Hkyangjong Bu-kó
6 Hkyangjong bu-kó lé, hîng hkyîng, mauhkûng nyuì nyui é, mê é eq zam zam ne é hkying èq wáng dui tô é nú nhâm é jihkyîng pé chûng mù, lòqmú kûng é byù mai saí ra râ nghut lhê. 7 Hkyangjong bu-kó haû tuî tap râ matú, hau é í chyûn shut tui tap ra râ nghut lhê. 8 Haú lé hit to râ lòqmú bo é hpyihit lé gi, hkyangjong bu-kó eq ralong za kut luî, hîng hkyîng, mauhkûng nyuì nyui é, mê é eq zam zam ne é hkying èq wáng dui tô é nú nhâm é jihkyîng pé chûng mù, wòq ra râ nghut lhê.
9 Nyhaú myòqjí su dùt jung lungsêng í cham lé yù mù, Isira-elaq é yhang zo yùqzô pê é myìng pé lé kyûng kâ to ra râ nghut lhê. 10 Yhángmòq hku lé lo é azó má cháng mù, lùqgòk racham má hkyuq yùq é myìng kyûng tap luî, dum gócham má le hkyuq yùq é myìng kyûng tap ra râ nghut lhê. 11 Lùqgòk kyung lòqmú bò bang dizìk kyûng é su, lùqgòk haû í cham má Isira-elaq é yhang zo yùqzô pê é myìng lé kyûng tap mù, lùqgòk haû í cham lé hîng lànghkang zo má kat to aq. 12 Lùqgòk haû í cham lé, Isira-elaq é yhang zo yùqzô pê é matú, myìtbun masàt lùqgòk dông hkyangjong bu-kó tui má tuî tap ra râ nghut lhê. Arun gi, haû Yhûmsîng Garaî é hí má myìtbun zè dông, yhâng é gòqsân í sân má myìng haú pé lé wàq to ra râ nghut lhê. 13 Hîng lànghkang zo í lhum saí mù, 14 hîng gyíng lé tui su jàng luî, tuijâng haû í hkat lé, lànghkang zo haû í lhum má tap to ra râ nghut lhê.
Wànggò Long
15 Lòqmú kúng su é lòq dông, mû hpyit byi râ wànggò long saí ra râ nghut lhê. Haû hkyangjong bu-kó lé saî é su, hîng hkyîng, mauhkûng nyuì nyui é, mê é eq zam zam ne é hkying èq wáng dui tô é nú nhâm é jihkyîng pé chûng mù, wòq ra râ nghut lhê. 16 Wànggò long haû gi, myí chyun é rawuí wuí za bo mù, í pyâm dùt râ lhê; hau é hîng hpyang rahto èq lòq í shi, làm hpyang rahto èq lòq í shi bò ra râ nghut lhê. 17 Haú má gù bò lungsêng pé myi yán tap ra râ nghut lhê. Sânghî yán má gi, ne jung lungsêng, huî muí muí é su dùt jung lungsêng eq myek-yoi gâ é wuimau nyuì su dùt jung lungsêng pé tap ra râ nghut lhê; 18 í yán yán nghû râ má gi, mhan-haq nyuî su dùt jung lungsêng, mauhkûng nyuì lungsêng eq jòqtoq wum bo é lungsêng pé tap ra râ nghut lhê; 19 sum yán yán nghû râ má gi, mhan-haq nyuî eq mauhkûng nyuì nyhô tô é su dùt jung lungsêng nghut é wakintu, hpyu é eq myi-tse isâm nyhô tô é su dùt jung lungsêng eq me me dùt jung lungsêng nghut é htihtu-nila pé lé tap to ra râ nghut lhê; 20 myi yán yán nghû râ má gi, bó huî hui é jung lungsêng nghut é utohpaya, nyhaú myòqjí su dùt jung lungsêng eq huhpé lungsêng pé tap to ra râ nghut lhê. Haú pé bànshoq lé hîng lànghkang zo má kat to ra râ nghut lhê. 21 Haú pé gi, Isira-elaq é yhang zo yùqzô pé raxe í yùq é myìng má cháng mù, lungsêng raxe í cham kut luî, dizìk dông, byùhú raxe í hû é myìng lé racham má rahú kut kyûng tap to ra râ nghut lhê.
22 Wànggò long hau é matú, tui kut râ dông, hîng gyíng lé tuijâng saí aq. 23 Hîng góng í lhum saí mù, wànggò long hau é ahtoq chyûn í chyûn má tap to aq. 24 Haû jang to bê hîng tuijâng í hkat lé, wànggò lông é achyûn í chyûn mâ é hîng góng má tuî tap to mù, 25 tuijâng haû í hkat é ahtâng lé, haû lànghkang zo má kat to luî, hí shut mâ é hkyangjong bu-kô é gòqsân tui má lhâng to ra râ nghut lhê. 26 Hîng góng í lhum saí mù, hkyangjong bu-kó eq záng é wànggò long ahtê pyâm mâ é a-ô chyûn í chyûn má tap to ra râ nghut lhê. 27 Hîng góng í hkat saî jàt mù, hkyangjong bu-kô é hpyihit ahtoq, hkyup xoq tô é a-nàm, haû hkyangjong bu-kó hí mâ é tui htâng má tap to ra râ nghut lhê. 28 Haû wànggò long gi, hkyangjong bu-kó mai làp làp a lhâng htoq byùq râ matú, wànggò long mâ é agóng í lhum gi, hpyihit eq xoq lhum luî, hkyangjong bu-kó mâ é agóng í lhum má, mauhkûng nyuì isâm htoq é tuî èq tuî tap to ra râ nghut lhê.
29 Arun gi, haû Chyoiyúng Jowò má wàng hkangmó, Yhûmsîng Garaî é hí má ayang myìtbûn nyi é masàt dông, yhâng é i-myìt nhiklhum htoq má kê tô é, mû hpyit byi râ wànggò long má kyûng tap tô é Isira-elaq é yhang zo yùqzô pê é myìng pé lé wàq chûng ra râ nghut lhê. 30 Haû Yhûmsîng Garaî é hí má Arun wang ê hkangmó, Urim eq Htu-mima gi, yhâng é i-myìt nhiklhum htoq má wó dùt nyì sháng gàq, haû Urim eq Htu-mim lé wànggò long má kat to ra râ nghut lhê. Haú dông, Arun gi, haû Yhûmsîng Garaî é hí má, Isira-elaq byu pê é matú, mû hpyit é hkyô lé, yhâng é nhiklhum htoq má ayang kê to râ nghut lhê.
Gótû Hkyangjong Buhîng Pé
31 Hkyangjong bu-kó eq sêng é bumó buhîng lé, mauhkûng nyuì isâm pân èq za wòq mù, 32 agùng ulhum chyoî râ dong htong luî, uchyoî dong haû a jèq byùq râ matú, dong hau é lhînghkyùq má wòq dúng to ra râ nghut lhê. 33 Buhîng hau é ahtâng lhînghkyùq má, mauhkûng nyuì nyui é, mê é eq zam zam ne é hkying èq lungshi cham pé saî tap luî, lungshi cham haú pê é gyoro ro má hîng chyû zô pé tap ra râ nghut lhê. 34 Hîng chyû zo haú pé eq lungshi cham haú pé lé, rajung rachâm htâng má rajung racham kut, buhîng hau é ahtâng lhînghkyùq má tap to ra râ nghut lhê. 35 Arun gi, hkyangjong mú kut é hkûn, buhîng haú lé wùt ra râ nghut lhê. Yhang a shi byùq sháng gàq, haû Yhûmsîng Garaî é hí, Chyoiyúng Jowò má wang e é hkûn nghut nghut, htoq lo é hkûn nghut nghut, chyû haú pê é myìng htê lé wó gyo ra râ nghut lhê.
36 Hîng gyíng lé hkoq hpyén ralhum saí mù, dizìk dông, “Haû Yhûmsîng Garaî é matú chyoiyúng ri.” nghû kyûng kâ tap ra râ nghut lhê. 37 Haú lé, mauhkûng nyuì isâm nghut é tui má tap mù, htup hí má tuî tap to ra râ nghut lhê. 38 Haû gi, Arun é ngelang má jòq nyì râ nghut mù, Isira-elaq byu pé lhoqchyoi lhoqyúng tô é chyoiyúng chyûnghuq pé má lom lo é shut mara lé wun to byi râ nghut lhê. Yhángmòq gi, haû Yhûmsîng Garaî èq hàp yu é hui kôrâ matú, haû gi, Arun é ngelang má ayang dàp to ra râ nghut lhê.
39 Nú nhâm é jihkyîng lé bu wòq luî, uhtup lé le nú nhâm é jîhkying èq wòq ra râ nghut lhê; hpyihit lé gi, zá htau su é lòqmú dùt ra râ nghut lhê. 40 Arun é yhang zo yùqzô pé, xânghpoq nge wó é eq hpungwup bò kôrâ matú, bu pé, hpyihit pé eq uhtup pé saí ra râ nghut lhê. 41 Nàng gi, nungmang Arun eq yhang zo yùqzô pé lé mèbu haú pé hut byî é htâng má, yhángmòq, hkyangjông pé dông Ngo lé wó dójaú nyî kó sháng gàq, yhángmòq lé lhoqchyoi lhoqyúng byi luî, namngón xû bùt byi mù, wò byî ra râ nghut lhê.
42 Yhángmòq é gùng a-o túm nghop râ matú, hpyidum mai tangbaú jé é nú nhâm é lho-tot saí ra râ nghut lhê. 43 Arun eq yhang zo yùqzô pé gi, mara hûn jang a htoq mù, a shi byùq kó sháng gàq, yhángmòq, zùphpong zúm má wàng hkangmó eq haû Chyoiyúng Jowò mâ é hkungga gyàp má hkyangjong mú kut râ matú huî ê hkangmó, lho-tot haú pé lé tsûng chûng ra kôrâ nghut lhê.
Haû gi, Arun eq yhâng é awùt ashîn pê é matú, pyàt pyàt zaí zaí hkyô tô é hkunmó nghut râ nghut lhê.