Htoq Ló 30

Namngón Jung Nyhé Hkungga Gyàp

Namngón jung nyhé râ matú htángmó gâm sik lé hkungga gyàp ralhum saí ra râ nghut lhê. 2 Haú lé, hîng hpyang radúng, làm hpyang radúng, myhâng hpyang í dúng kut myi chyûn bo é saí ra râ nghut lhê. Hau é hkyuî pé gi, haû eq ralong za xoq lhûm to ra râ nghut lhê. 3 Hau é ahpyo má le, ayàm pé bànshoq má le, hkyuî pé má le, hîng gyíng èq shup mù, hau é lhînghkyùq má hîng shup dúng to ra râ nghut lhê. 4 Haû hkungga gyàp dúng tô é a-ô hé hkyam shí hkyam shut, rahkyam má í góng góng tap râ matú, hîng góng myi góng saí ra râ nghut lhê. Haû gi, wàq râ matú gán-yang chyoî jang nghut râ nghut lhê. 5 Gán-yang haú pé lé htángmó gâm sik èq saí mù, hîng shup to ra râ nghut lhê. 6 Ngò, nang lé hui râ jowò nghu é, haû dangshikaq târâ dàp é lùqlong í long htoq má nghop tô é jeju dò a-myhi ang ang, dangshikaq târâ kat tô é sàksé dò hí má gyâng tô é pán-gyang shinggan má hkungga gyàp haú lé tô to ra râ nghut lhê.

7 Arun gi, nàp wuì myi-kok pé lé hen lajâng é hkûn, hkungga gyàp haú má namngón jung nyhé ra râ nghut lhê. 8 Yhang gi, myínhtâng zó lé myi-kok dum tap é hkûn le, haú má namngón jung dum nyhé ra râ nghut lhê; haû gi, je lô râ pyàt bán hkangmó, haû Yhûmsîng Garaî é hí má ayang mán mán nyhê nhám râ namngón jung nghut râ nghut lhê. 9 Hkungga gyàp haú má, gótû namngón jung nghut nghut, myi nyhé hkungga nghut nghut, gùqzò hkungga nghut nghut, haî le ge nhông byi râ a nghut; shuq jung hkungga lé le, haú má ge hut gyun râ a nghut. 10 Arun gi, razàn má radá, hkungga gyàp hau é hkyuî pé má mara hkô htaí hkungga nhông ra râ nghut lhê. Haû gi, je lô râ pyàt bán hkangmó é matú, zàn wuì, mara hkyut hkúnggâ é suî èq kut ra râ nghut lhê. Haû gi, Yhûmsîng Garaî é matú chyoiyúng htâng é nghut bê nghut ri.” gâ taî ri.

Zùphpong Zúm É Matú Alû Ngùn

11 Hau htâng, haû Yhûmsîng Garai gi, Mosheq lé, 12 “Nàng gi, Isira-elaq byu pé lé nghap râ matú, yhángmòq lé myìng jihpán gùq é hkûn, yùq hkangmó gi, yhûmsîng lé nghap jé é u, haû Yhûmsîng Garai lé, yhûmsing é chyungxê é matú, htaî lhik yû râ ahpau byi ra râ nghut lhê. Haû jáng, nàng byù du nghap é hkûn, yhángmòq chyáng hai wúm le jé râ a nghut. 13 Yhángmòq lé nghap wú mù, myìng jihpán má bo é bang yùq hkangmó gi, sân-yúng jowò mâ é jàng má cháng luî, ngùnhtung zo ramu èq rahkyam hkyam byi ra râ nghut lhê. Ramû gi, í xê gera kô laî é nghut lhê. Ngùnhtung zo ramu èq rahkyam haû gi, Yhûmsîng Garaî é matú alû chyûnghuq nghut bê nghut ri. 14 Myìng jihpán má lom é, í xê zàn bò bê bang eq í xê zàn ahtoq mâ é bang bànshoq gi, Yhûmsîng Garai lé, alû chyûnghuq haû byi ra râ nghut lhê. 15 Núngmòq é chyungxê é matú gùnglik dông haû Yhûmsîng Garai lé alû chyûnghuq byi râ nghut jáng, wó sû le ngùnhtung zo ramu èq rahkyam htoq a myo, myùng sû le haû mai a yom é za byi ra râ nghut lhê. 16 Haú dông, Isira-elaq byu pê chyáng mai mara hkô htaí hkungga ngùn hàp yù mù, haú lé, zùphpong zúm é dójaú hkyô má chung jaì ra râ nghut lhê. Haû gi, núngmòq é chyungxê é matú mara hkô htaí hkungga byî é nghut mù, haû Yhûmsîng Garaî é hí má, Isira-elaq byu pê é matú myìtbûn nyì hkyô dùt râ nghut lhê.” ga taî ri.

Chî San Chî Séng Râ Matú Lànghkang

17 Hau htâng, haû Yhûmsîng Garai gi, Mosheq lé, 18 “Chî san chî séng râ matú, gyi lànghkang eq hau é gyi zîng lé nàng saí ra râ nghut lhê; haú lé, zùphpong zúm eq hkungga gyàp gyoro má tsung to mù, wuì kat to ra râ nghut lhê. 19 Arun eq yhang zo yùqzô pé gi, haû mâ é wui èq yhángmòq é hkyî lòq chi kôrâ nghut lhê. 20 Yhángmòq a shi byùq râ matú, haû zùphpong zúm má wang ê hkangmó eq, haû Yhûmsîng Garaî é matú myi nyhé hkungga nhông byi dójaú râ ga hkungga gyàp nàm má chyâng e ló hkangmó, yhángmòq wui èq chi ra kôrâ nghut lhê. 21 Yhángmòq gi, a shi byùq kôrâ matú, yhángmòq é hkyî lòq lé chi ra kôrâ nghut lhê. Haû gi, Arun é matú le, jé lé lô râ yhâng é awùt ashîn pê é matú le, pyàt pyàt zaí zaí é matú hkyô tô é hkunmó dùt râ nghut lhê.” ga taî ri.

Namngón Xû

22 Hau htâng, haû Yhûmsîng Garai gi, Mosheq lé, 23 “Je réng é namngón jung agyi pé nghut é, mura xû rajoí èq súm xe rarùng, namngón shôm htoq é changhpyik gâm kuq súm xe hkyuq rûng eq, namngón shôm htoq é hkalamu súm xe hkyuq rûng, 24 gótû changhpyik a-myû gàm kuq rajoí èq súm xe rarùng pé bànshoq sân-yúng jowò mâ é jàng má cháng mù yù luî, tsanlun xû rachyóng lé le yù ra râ nghut lhê. 25 Haú pé lé, namngón shôm nyhó kung su é lòqmú èq, bùt râ chyoiyúng namngón xû saî htoq ra râ nghut lhê. Haû gi, bùt râ chyoiyúng namngón xû dùt râ nghut lhê. 26 Hau htâng, namngón xû haú lé, zùphpong zúm má le, dangshikaq târâ kat tô é sàksé dò má le, 27 mùkgyàp eq haû mâ é zè bànshoq má le, myi-kok tsûngjang eq haú má chung é zè bànshoq má le, namngón jung nyhé hkungga gyàp má le, 28 myi nyhé hkungga gyàp eq haú mâ é chûngzè bànshoq má le, lànghkang eq hau é zìng má le, bùt ra râ nghut lhê. 29 Haú pé chyoiyúng htâng é zè dùt nyì râ matú, nàng haú pé lé lhoqchyoi lhoqyúng ra râ nghut lhê; haú hkûn, haú pé má záng é haî nghut kôlhang, chyoiyúng râ nghut lhê.

30 Arun eq yhang zo yùqzô pé gi, hkyangjông pé dông Ngo lé wó dójaú nyî kó sháng gàq, yhángmòq lé xû bùt byi mù, lhoqchyoi lhoqyúng byi ra râ nghut lhê. 31 Haû Isira-elaq byu pé lé, ‘Xû shî gi, jé lé lô râ pyàt bán hkangmó é matú, Ngá é chyoiyúng namngón xû dùt nyì râ nghut lhê. 32 Haú lé, góyùq é gùngdu má ge hut gyun râ a nghut; haú lé saî htoq é dông gótû xû ge saî htoq râ a nghut. Haû gi, chyoiyúng lhê nghut mù, haû chyoiyúng lhê nghû núngmòq myìt sôn yù ra râ nghut lhê. 33 Haú lé saî é su namngón shôm lé saî yù mù, hkyangjong a nghut é góyùq lé bùt é sû ó yùq nghut kôle, yhâng é a-myû mai chyung hpyit pyâm é hui râ nghut lhê.’ nghû taí aq.” ga taî ri.

Namngón Shôm Saî Htoq É Hkyô

34 Hau htâng, haû Yhûmsîng Garai gi, Mosheq lé, “Namngón shôm htoq jung sikgyi pé nghut é, natap gàm agyi, unuhka kyap, galabanum gàm agyi eq namngón jung loban agyíng pé bànshoq lé rawuí wuí za kut mù, 35 namngón shôm saí su é lòqmú dông, namngón shôm htoq jung saí ra râ nghut lhê. Haû gi, xo nyhô tô é, agyíng nghut é eq sân-yúng é jung nghut râ nghut lhê. 36 Haú pé mâ é ra-am lé a-mùn mhun yù mù, Ngò, nàng eq hui râ nghut é jowò, haû zùphpong zúm jòq é dangshikaq târâ kat tô é sàksé dò hí má tô to ra râ nghut lhê. Haû gi, núngmòq é matú chyoiyúng htâng é nghut râ nghut lhê. 37 Shî lé saî é dông, núngmòq é matú namngón jung haî le ge saí râ a nghut; haû gi, Yhûmsîng Garaî é matú chyoiyúng lhê nghû myìt sôn yù keq. 38 Haû eq rajung zâ é namngón jung saí luî, hau é namngón shôm lé nam kûn é sû ó yùq nghut kôle, yhâng é a-myû mai chyung hpyit pyâm é hui râ nghut lhê.” ga taî ri.