Sàksé Zúm Eq Sêng É Hkyô
26
Hau htoq agó, nàng gi, pán-gyang raxê long lé sàksé zúm saí ra râ nghut lhê. Pán-gyang haú pé lé gi, wáng dui tô é nú nhâm é jîhkying èq le, mauhkûng nyuì nyui é, mê é eq zam zam ne é hkying èq le wòq é htoq agó, wòqgan wòq kûng é byu èq hkerubim alhô lé wòq tap to ra râ nghut lhê. 2 Pán-gyang haú pé bànshoq gi, rawuí wuí za dùt râ matú, hîng hpyang í xe shit dúng, làm hpyang myi dúng dúng chyat bò ra râ nghut lhê. 3 Pán-gyang ngo long lé, ralong eq ralong hkyup xoq to mù, gótû ngo long lé le, ralong eq ralong hkyup xoq lhum râ dùt lhê. 4 Hkyup xoq tô é pán-gyang lông é ahtâng má, mauhkûng nyuì nyui é pân èq kyindong tsing hkyup dúng to ra râ nghut lhê. Hkyup xoq tô é pán-gyang gólông é ahtâng má le haû eq rajung za kut ra râ nghut lhê. 5 Hkyup tô é pán-gyang long ralong má gi, kyindong ngo xê dong, pán-gyang gólong mâ é ahtâng má gi, kyindong ngo xê dong kut, haû í long mâ é kyindong pé rahá hkyúm hkyúm kut to ra râ nghut lhê. 6 Haû sàksé zúm gi, ralhum za wó dùt to râ matú, hîng gòknghe ngo xê lhum saí mù, pán-gyang haû í long lé nghê zing lhûm to byi ra râ nghut lhê.7 Hau htâng, nàng gi, sàksé zúm má mau râ matú, bainám sho-maú pán-gyang raxe ralong saí ra râ nghut lhê. 8 Pán-gyang haû raxe ralông é bànshoq gi, rawuí wuí za dùt râ matú, hîng hpyang sum xê dúng, làm hpyang myi dúng dúng chyat bò ra râ nghut lhê. 9 Pán-gyang ngo long lé ralong za dùt shoq xoq to mù, gótû hkyuq long lé le ralong za kut xoq pyám ra râ nghut lhê. Hkyuq long nghû râ pán-gyang lé gi, zúm hkun má nhap to ra râ nghut lhê. 10 Pán-gyang xoq lhûm tô é hî lông é hkyupsui htâng cháng luî le, gólông é hkyupsui htâng cháng luî le, kyindong ngo xê dong dong htông dúng to ra râ nghut lhê. 11 Hau htâng, gyi gòknghe ngo xê lhum saî yù mù, kyindong pé lé nghê zing lhum to aq; haú hkûn, zúm gi, ralhum za dùt byùq râ nghut lhê. 12 Chyan pyâm tô é túm, zúm mâ é pán-gyang rawuí gû lé gi, sàksé zúm é gànhtûng hkyam shut lhâng nghop ra râ nghut lhê. 13 Haû zúm mâ é pán-gyang í shut é lé radúng dúng lhoqchyan to râ nghut mù, haû chyan tô é lé, sàksé zúm é lhînghkyùq má lhâng nghop to ra râ nghut lhê. 14 Haû zúm lé maû nghop râ matú, lhoqnhe tô é saulo sho-kuq lé ralong, hau é ahtoq má nghop râ gótû gîng é sho-kuq ralong, nàng saí ra râ nghut lhê.
15 Sàksé zúm lé wàm râ matú, htángmó gâm siklong pé le saí ra râ nghut lhê. 16 Siklong hkangmó gi, hîng hpyang raxê dúng, làm hpyang radúng èq rahtô nghut ra râ nghut lhê. 17 Sàksé zúm é siklong pé bànshoq lé, long hkangmó má, rawuí wuí zâ é baùhtuq rashut ralhum kut tsing tap ra râ nghut lhê. Yhángmòq gi, sàksé zúm é siklong bànshoq lé haú dông chyat saí ra kôrâ nghut lhê. 18 Sàksé zúm maupyî hkyâm é matú í xê long saí mù, 19 siklong ralong mâ é ahkyî í hkyî má chyam ralhum lhum tsung é a-ô má kat râ ngùn hkoq myi xê hkyap le saí ra râ nghut lhê. 20 Haû eq rajung za, sàksé zúm é góhkyam nghut é mautsûng hkyam shut é matú le, siklong í xê long saí mù, 21 siklong hkangmó é baùhtuq achuq pé má kat râ matú, ngùn hkoq myi xê hkyap le saí ra râ nghut lhê. 22 Sàksé zúm é nùnghtâng hkyam nghut é buìwàng hkyâm é matú, siklong hkyuq long saí mù, 23 haû nùnghtâng hkyam í chyûn mâ é matú, siklong í long le saí ra râ nghut lhê. 24 Achyûn haû í chyûn mâ é siklong lé gi, achuq mai ahpyo mâ é nghegóng jé shoq puq tap ra râ nghut lhê; í lông é lé haú dông chyat kut ra râ nghut lhê. 25 Haû mù, siklong shit long bò luî, long hkangmó é matú ngùn hkoq í hkyap hkyap kut, raxe hkyuq hkyap bò ra râ nghut lhê.
26 Í hkyam shut lé kyâng tap to râ htángmó gâm sik yang lé le saí aq. Sàksé zúm rahkyam shut mâ é siklong pê é matú sik yang ngo yang saí mù, 27 góhkyam shut mâ é matú ngo yang saí luî, sàksé zúm é nùnghtâng hkyam nghut é buìwàng hkyam mâ é siklong pê é matú ngo yang saí aq. 28 Agùng má kyáng râ sik yang gi, siklong pê é agùng mai, hé htâng shí htâng hpyot kyâng ròt ra râ nghut lhê. 29 Siklong pé lé gi, hîng shup mù, sik yang pé kyáng râ matú hîng góng pé saî tap ra râ nghut lhê. Kyáng râ sik yang pé lé le hîng shup ra râ nghut lhê.
30 Nang lé bùm má tûn shit é ahkyo roq za, sàksé zúm lé saî shap ra râ nghut lhê.
31 Wòqgan wòq kûng é byu èq hkerubim le wòq tap tô é, mauhkûng nyuì nyui é, mê é eq zam zam ne é hkying eq wáng dui tô é nú nhâm é jîhkying èq wòq tô é pán-gyang ralhum saí ra râ nghut lhê. 32 Pán-gyang haú lé, ngùn hkoq myi hkyap má tsung tô é, hîng shup htángmó gâm zìng myi zîng má, hîng gòknghe pê èq lhâng to ra râ nghut lhê. 33 Pán-gyang haú lé gòknghe má lhang mù, pán-gyang hkaû shut dangshikaq târâ kat tô é sàksé dò tô to ra râ nghut lhê. Pán-gyang haû gi, Chyoiyúng Jowò eq Chyoiyúng Htáng Jowò lé kyo gam hkoq byi râ nghut lhê. 34 Haû Chyoiyúng Htáng Jowò mâ é dangshikaq târâ kat tô é sàksé dò má jeju dò a-myhi myhî to ra râ nghut lhê. 35 Mùkgyàp lé gi, sàksé zúm é mautsûng hkyam, pán-gyang hau é shinggan má tô to mù, haû eq díng díng, maupyî hkyam má gi, myi-kok tsûngjang lé tô to ra râ nghut lhê.
36 Mauhkûng nyuì nyui é, mê é eq zam zam ne é hkyîng eq wáng dui tô é nú nhâm é jihkyîng lé rago dàt htaû é byù lé, nàng, zúm má wàng râ hkûm é matú pán-gyang ralhum saí nhâng ra râ nghut lhê. 37 Pán-gyang hau é matú, hîng gòknghe pé lé le, hîng shup é htángmó zîng ngo hkat lé le saí ra râ nghut lhê. Hau htoq agó, zìng haú pê é matú gyi hkoq ngo hkyap saî to ra râ nghut lhê.