Sàksé Zúm É Matú Alû Chyûnghuq
25
Haû Yhûmsîng Garai gi, Mosheq lé, 2 “Haû Isira-elaq byu pé lé, Ngá é matú alû chyûnghuq yu lé keq nghû taí aq. Nàng gi, byí nau é myìt mai byî é sû yùq hkangmó chyáng mai, Ngá é matú alû chyûnghuq lé hàp yu to ra râ nghut lhê. 3 Yhángmòq chyáng mai nàng hàp yu to râ alû chyûnghuq pé gi, hîng, ngùn, gyi, 4 mauhkûng nyuì nyui é, mê é eq zam zam ne é hkyîng, nú nhâm é jihkyîng pán, bainám sho-maú, 5 lhoqnhe tô é saulo sho-kuq, gótû gîng é sho-kuq, htángmó gâm sik, 6 myi tuq râ matú tsanlun xû, namngón xû bùt râ matú eq namngón shôm nyhé râ matú namngón jung pé, 7 hkyangjong bu-kó eq wànggò long má tap râ matú, nyhaú myòqjí su dùt jung lungsêng eq gótû lungsêng pé nghut râ nghut lhê.8 Yhángmòq lé, Ngá é matú sân-yúng yhûm saí nhâng àq; haú hkûn, Ngò gi, yhángmòq chyáng nyì râ nghut lhê. 9 Sàksé zúm eq haú má kat râ zè pé bànshoq lé, Ngò, nang lé tûn shit râ azòng eq roq za saí ra râ nghut lhê.
Sàksé Dò
10 Yhángmòq lé htángmó gâm sik sàksé dò ralhum saí nhâng àq; sàksé dò haû gi, hîng hpyang í dúng èq rahtô, làm hpyang radúng èq rahtô, myhâng hpyang radúng èq rahtô bò ra râ nghut lhê. 11 Hau é ahte ahtoq má gi, hîng gyíng shup mù, ahpyo lhînghkyùq má gi, hîng shup dúng to râ dùt lhê. 12 Hau é matú hîng góng myi góng saî yù mù, rahkyam shut í góng góng kut, myi hkyî má tap to ra râ nghut lhê. 13 Hau htâng, htángmó gâm sik lé gán-yang í hkat saí mù, hîng shup to ra râ nghut lhê. 14 Sàksé dò haû wàq râ matú, gán-yang haû í hkat lé í shut mâ é agóng má chyoi to ra râ nghut lhê. 15 Gán-yang haû í hkat lé, sàksé dò má jâng chyoi to ra râ dùt lhê; haú lé a ge she htoq pyám râ nghut lhê. 16 Hau htâng, Ngò, nang lé byi râ nghut é dangshikaq târâ dàp é lùqlong í long lé, sàksé dò haú má kat to aq.
17 Hîng hpyang í dúng èq rahtô, làm hpyang radúng èq rahtô bo é, hîng gyíng èq saî é jeju dò a-myhi saí ra râ nghut lhê. 18 Bàtdu èq hîng hkerubima í lhum saî htoq yû mù, a-myhi í htâng má tap to ra râ nghut lhê. 19 Rahtâng shut hkerubim ralhum saí mù, góhtâng shut hkerubim ralhum saí aq; haû a-myhi mâ é í htâng shut má saî tô é hkerubim lé ralong za kut xoq lhum nhang to keq. 20 Haû hkerubim í lhûm é gi, myòqdong hkyúm kut luî, jeju dò a-myhi shut wú nhang to mù, dùng lé tu myhang to luî, jeju dò a-myhi lé shum nghop to râ dùt lhê. 21 Haû jeju dò a-myhi lé, sàksé dò má myhî to râ dùt lhê; Ngò, nang lé byi râ nghut é dangshikaq târâ dàp é lùqlong í long le, sàksé dò haú má kat to aq. 22 Ngò gi, nang lé haú má hui mù, dangshikaq târâ kat tô é sàksé dò é a-myhi htoq mâ é hkerubim í lhûm é gyoro mai, Isira-elaq byu pê é matú, Ngá é hkunmó pé bànshoq nang lé byi râ nghut lhê.
Mùkgyàp
23 Nàng gi, htángmó gâm sik mùkgyàp ralhum saí ra râ; haû gi, hîng hpyang í dúng, làm hpyang radúng, myhâng hpyang radúng èq rahtô bò ra râ nghut lhê. 24 Haú lé hîng gyíng shup mù, ahpyo lhînghkyùq má gi, hing èq shup dúng to ra râ nghut lhê. 25 Hau é lhînghkyùq má lòqwa rahup lhoqze to mù, haû lhoqze tô é jang má hîng shup to ra râ nghut lhê. 26 Mùkgyàp hau é matú hîng góng myî lhum saí mù, mùkgyàp hkyî myí hkyi é achyûn má tap to aq. 27 Hîng góng haú pé lé, mùkgyàp wàq htòt râ matú, gán-yang chyoî jang dông, haû htoq ze tô é jáng má tap ra râ nghut lhê. 28 Mùkgyàp haú lé wàq râ matú, htángmó gâm sik gán-yang í hkat saí mù, haú má hîng shup àq. 29 Haû mùkgyàp má chûng râ matú, hkoq hpyén pé, gòmhtung pé, htûdòk pé eq shuq jung hkungga hut râ hkoq pé lé, hîng gyíng èq saí ra râ nghut lhê. 30 Nàng gi, Ngá é hí má ayang jòq to râ matú, mùkgyàp htoq má tô shit tô é mùk kê to ra râ nghut lhê.
Myi-kok Tsûngjang
31 Hîng gyíng lé myi-kok tsûngjang ralhum saí aq. Haú lé tsung é achuq, alòq, xû hkoq pé, abu pé eq abó pé lé, ralong za dùt shoq bàt htoq ra râ nghut lhê. 32 Myi-kok tsûngjâng é zîng haû mai, rahkyam shut sum koq koq kut luî, hkyuq koq saî htoq ra râ nghut lhê. 33 Akoq ralhum má gi, alamon banbó pé su abu eq abó dàp é xû hkoq sum hkyap saî tap mù, hau é ayàm mâ é akoq má le sum hkyap saî tap to kut ra râ nghut lhê; myi-kok tsûngjang mâ é akoq hkyuq koq má haú dông chyat kut to ra râ nghut lhê. 34 Myi-kok tsûngjang zìng má le, alamon banbó pé su abu eq abó dàp é xû hkoq myi hkyap saî tap ra râ nghut lhê. 35 Myi-kok tsûngjang mâ é sânghî akoq í lhum zùp é a-ô má abu ralhum, htâng akoq í lhum zùp é a-ô má abu ralhum, hau htâng akoq í lhum zùp é a-ô má abu ralhum kut, akoq hkyuq lhum bànshoq é a-ô má saî tap to ra râ nghut lhê. 36 Abu pé eq akoq pé bànshoq lé gi, myi-kok tsûngjang eq ralong za kut, hîng gyíng èq bàt htoq ra râ nghut lhê.
37 Hau htâng, myi tap mù, hí shut san za dùq bàng byi râ matú, haú pé má myi-kok nyhit lhum saî tsûng ra râ nghut lhê. 38 Nyàp pé eq nyàp kat hkoq pé lé le, hîng gyíng èq saí ra râ nghut lhê. 39 Myi-kok tsûngjang haû eq haú mâ é chûngzè pé bànshoq lé le, hîng gyíng raxe rajoí ko èq saí ra râ nghut lhê. 40 Nang lé bùm má tûn shit é azòng roq kut, sidìq luî, haú pé lé saí aq.