Dangshikaq Lé Lhoq Gingtîng Yu É Hkyô
24
Hau htâng, haû Yhûmsîng Garai gi, Mosheq lé, “Nàng eq Arun, Nadap, Abihu eq Isira-elaq sûwún nyhit xê yùq gi, shî Yhûmsîng Garaî chyáng dòq lò mù, we we mai noqkuq keq. 2 Nghut kôlhang, Mosheq rayùq za, haû Yhûmsîng Garaî é hí má ge chyâng ê râ nghut lhê; góbang gi, chyáng nâm má ge htèp lé râ a nghut. Shiwa byu pé gi, yhang eq rahá ge dòq lò kôrâ a nghut.” ga taî ri.3 Mosheq gi, gyó ló mù, shiwa byu pé lé, haû Yhûmsîng Garaî é dang pé eq târâ pé bànshoq lé taî kyo jáng, yhángmòq gi, hkunhtê ralhum za kut, “Haû Yhûmsîng Garai taî é jung hkangmó lé ngá-mòq châng kut râ nghut lhê.” ga yín yu akô nghut ri. 4 Mosheq gi, haû Yhûmsîng Garai taî é lhúnglháng lé kâ hkyô to bê nghut ri.
Yhang gi, htang nàpkyó noq le toq mù, bùm hkyî má hkungga gyàp ralhum saí luî, Isira-elaq é a-myû raxe í up má cháng luî, lùq zìng raxe í zîng lé xuq tô ri. 5 Hau htâng, yhang gi, Isira-elaq byu pê é zorâm wuì lé nhang kat é nghut mù, yhángmòq gi, myi nyhé hkungga nhông byi luî, haû Yhûmsîng Garaî é matú zùmhkaû hkungga dông nohtó râm zo pé lé sat nhông byî akô nghut ri. 6 Mosheq gi, haú mâ é sui rawuí gû lé hkoq pé má kat to mù, gótû rawuí gû lé hkungga gyàp má hpyûn gyûn ri. 7 Hau htâng, yhang gi, Dangshikaq laiká Bùk lé yù mù, shiwa byu pé lé nghap kyô ri. Haû shiwa byu pé gi, “Haû Yhûmsîng Garai taî é jung hkangmó lé ngá-mòq châng kut râ; ngá-mòq cháng râ nghut lhê.” ga yín yu akô nghut ri.
8 Hau htâng, Mosheq gi, sui lé yù mù, shiwa byu pê htoq má hpyûn gyun luî, “Sui shî gi, dang shí pé bànshoq má cháng luî, haû Yhûmsîng Garai, núngmòq eq tô to bê dangshikaq sui nghut lhê.” ga taî ri.
9 Mosheq eq Arun, Nadap, Abihu eq Isira-elaq byu pê é sûwún wuî nyhit xê yùq gi, dòq ê luî, 10 haû Isira-elaq byu pê é Garai Gasang lé ê myang akô nghut ri. Yhâng é hkyîwang má gi, maulat má nyui sân-yúng é su dùt é, mauhkûng nyuì lungsêng hkâng tô é su dùt ri. 11 Nghut kôlhang, Garai Gasang gi, haû Isira-elaq byu pê é ushuq wuî lé Yhâng é lòq èq a záng nghut ri; yhángmòq gi, Garai Gasang lé myang akô; hau htâng, zoshuq lé chôm zo chôm shuq akô nghut ri.
12 Haû Yhûmsîng Garai gi, Mosheq lé, “Shî Ngò nyi tô é bùm htoq má dòq lò mù, lo nyi to aq; Ngò gi, shiwa byu pé lé mhoq shit râ matú, târâ eq hkunmó pé lé Ngò kâ tap tô é lùqlong, nang lé byi râ nghut lhê.” ga taî ri.
13 Haú hkûn, Mosheq eq yhang lé htuqbáng sû Yoshuq htoq e ló luî, Mosheq gi, Garai Gasâng é bùm má dòq ló ri. 14 Yhang gi, sûwún wuî lé, “Ngá-nhik núngmòq chyáng dum taû jé lô shoq, núngmòq shî má nyi to keq. Arun eq Hura gi, núngmòq eq rahá nghut nyi lhê mù, amû htoq é sû ó yùq le, yhángnhik chyáng ge e lhê.” ga taî to hkô ri.
15 Mosheq bùm má dòq ló é hkûn, bùm haú má mhut htup pyâm ri. 16 Haû Yhûmsîng Garaî é hpungwup shingkang gi, Sinaq Bùm má lé jòq nyi é nghut mù, hkyuq nyí yhang bùm haú má mhut htup tô ri. Nyhit nyí nghû râ nyí, haû Yhûmsîng Garai gi, Mosheq lé, mhut hkaû mai wùt ri. 17 Haû Yhûmsîng Garaî é hpungwup shingkang gi, bùm nyuq má, Isira-elaq byu pê é matú, gyúng nyi é myi su dùt tô ri. 18 Haú hkûn, Mosheq gi, bùm mâ é mhut hkaû shut dòq wang ló bê nghut ri. Yhang gi, bùm haú má myi xê nyí myi xê myìn ló nyi nyi ri.