Târâ Ràp-rá Hkyô Eq Shogyo Nhikmyin Hkyô
23
A teng a mán é danglám lé hkâtaî pyô; târâ a chung é byù eq rahá lòq xoq xoq mù, a teng a mán é sàksé hkâhkám.2 Ashop hkyô châng é byù hpûng htâng hkâbo cháng. Mû hpyit jang má, nàng sàksé hkâm é hkûn, byù hpûng shut jau ló é dông, târâ ràp-rá hkyô lé hkâ lhoqhtên pyám. 3 Hau htoq agó, mû hpyit é jang má, myùng sû lé myòqdong hkyin é hkyô hkâshit.
4 Nàng eq gyè dut lhûm to su é no, a nghut jáng, loze hkyô nghoq wún é lé myàng jáng, nàng, teng za kôn ló byi ra râ nghut lhê. 5 Nàng a nguì su é loze gi, dó eq roq lêng é lé nàng myang é nghut jáng, tô pyâm to mù a ló byùq é za, haú lé hkyak garúm yû ra râ nghut lhê.
6 Náng chyáng mâ é myùng bang lé târâ hpyit é jang má, târâ ràp-rá hkyô a châng é za ge kut râ a nghut. 7 A teng a mán é mara hûn dang eq nàng wê gâng nyì àq; mara hûn jang a jòq sû eq díngmán sû lé ge sat pyám râ a nghut; hkâsu mù gâ le, Ngò gi, agè ashop sû lé, díngmán sû nghû tô to râ a nghut.
8 Lòqhkaû lang zè lé nàng ge hàp yù râ a nghut; hkâsu mù gâ le, lòqhkaû lang zè gi, hpàqchyî bò bang lé myòq lhoqchit pyám byi mù, díngmán bâng é dang lé lhoqlhik pyám byî é nghut lhê.
9 Byù bíng lé ge zìk zo râ a nghut; núngmòq yhang Egutuq ming má byù bíng dùt wú bekô nghut é yánmai, byù bíng hkâm zô é myìt lé núngmòq sê to gù nghut lhê.
Bánno Buìnyì Eq Sêng É Târâ
10 Nàng gi, náng é yò má hkyuq zân kyô hkyó mù, kyôshi myuishi shû yù râ nghut lhê; 11 nghut kôlhang, nyhit zân nghû râ zàn gi, maumyî haú lé hâm to ra râ nghut lhê. Haú hkûn, náng é byu pé mâ é myùng bang gi, zoshuq wó yû kôrâ nghut mù, hau htâng myìt gyó tô é lé gi, yòsô zè pé myàng zo kôrâ nghut lhê. Náng é tsibyiq hkyâm eq náng é tsanlun shi hkyâm lé le, haû eq rajung za kut àq.
12 Hkyuq nyí gû gi, náng é mú zui mù, nyhit nyí nghu é nyí má nô yù ra râ nghut lhê; haú hkûn shèq, náng é no eq náng é loze pé wó bánnô yù mù, náng yhûm má hku é jùn eq náng chyáng nyi é byù bíng pé gi, wum-o sik wó dum lhoqpyîng yù kôrâ nghut lhê.
13 Ngò, núngmòq lé taî é gû bànshoq lé rago cháng ra râ nghut lhê. Gótû hparà pê é myìng lé hkâlang; myìng haú pé lé, náng é nhut mai htoq é lé ó yùq le a wó gyo sháng gàq.
Zàn Wui É Poî Mó Sûm Lhûm É Hkyô
14 Nàng gi, Ngá é matú, razàn má poî mó sum dâm kut ra râ nghut lhê.
15 Múnchi a kat é Mùk Zo Poî kut ra râ nghut lhê; Ngò, nang lé hkunmó hkyô tô é eq rajung za, múnchi a kat é mùk lé nyhit nyí zo ra râ nghut lhê. Haú lé, Abi lhôhkyapa hkaû má kut râ matú masàt tô é ahkyíng má kut àq; hkâsu mù gâ le, núngmòq gi, lhôhkyap haú má Egutuq ming mai htoq lô kô é nghut lhê.
Poî haú má, ó yùq le, Ngá é hí má lòqkôm lé ge htoq shit râ a nghut.
16 Náng é yò má nàng hô hkyô kat é kyôzo muilhum mâ é sânghi myhîng é kyôshi myuishi lé shû yu é hkûn, Kyôshi Myuishi Asik Poî kut ra râ nghut lhê.
Zàn ló htáng jáng, náng é kyôshi myuishi tsîng yu é hkûn, Kyôshi Tsîng Yù Poî le kut ra râ nghut lhê.
17 Núngmòq mâ é yùqgè wuì lhúnglhâng bang gi, razàn má sum dâm haû Ahko Ahkáng lhúnglháng wó Sû Yhûmsîng Garaî é hí má lé htoq shit ra râ nghut lhê.
18 Ngo lé nhông byî é hkungga sui má, múnchi bo é haî le ge lhoqlhóm râ a nghut.
Ngá é poî má nhông byî é hkungga mâ é xû lé htang nàpkyó jé shoq ge tô to râ a nghut.
19 Náng é maumyî mâ é sânghi myhîng é kyôshi myuishi mâ é je ge é pé lé, náng é Garai Gasang nghut é, haû Yhûmsîng Garaî é yhûm má yu lé ra râ nghut lhê.
Bainám zo lé, yhâng nû é naú wing eq rahá ge chyoq râ a nghut.
Garai Gasâng É Maumang Lagyo Hkyô Hên Byî É Hkyô
20 Wú aq, hkyôwuì má nang lé wú zúng byi luî, Ngò hen to byî é jowò má nang lé shuî-û ló râ matú, náng é hí má, maumang lagyo rayùq lé Ngò nhang kat é nghut lhê. 21 Yhang taî é dang lé sidìq mù, gyo keq. Yhang gi, târâ lu laî é mara lé hkyut byi râ a nghut é yánmai, yhang lé gumlau hkâtoq kó; hkâsu mù gâ le, Ngá é Myìng gi, yhâng chyáng châng nyi é nghut lhê. 22 Nghut kôlhang, nàng gi, yhang haî taî é lé rago gyo mù, haû Ngò taî é bànshoq lé kut é nghut jáng, Ngò gi, náng é gye pé lé gyè kut râ nghut é htoq agó, nang lé htuqhtíng bang lé htuqhtíng byi râ nghut lhê. 23 Ngá é maumang lagyo gi, náng é hí má e ló byi mù, nang lé, Amori byù, Hiti byù, Perizi byù, Hkanan byù, Hiwi byù eq Yebusi byu pê é mau má shuî wang ló râ nghut mù, Ngò gi, haú bang lé lhoqhtûm pyám râ nghut lhê. 24 Nàng, yhángmòq é hparà hpôlhô pé lé ge noq ge jaú râ a nghut; yhángmòq kut é dông ge bo kut râ a nghut. Nàng gi, haú pé bànshoq lé lhoqhtên pyám mù, yhángmòq é chyoiyúng lùqzìng pé lé ajàp azo dùt shoq lhoqhpyi pyám ra râ nghut lhê. 25 Núngmòq é Garai Gasang nghut é, haû Yhûmsîng Garai lé noqkuq keq; haú hkûn, Ngò gi, núngmòq é zoshuq eq wuì má shimân byi râ nghut lhê. Ngò gi, núngmòq chyáng mai nòlì nòjàng lé yu pyám byi râ nghut lhê. 26 Náng é mau má, zo byaí pyâm é hkyô eq baùdung dûng é hkyô jòq râ a nghut. Ngò gi, náng é i-pyàt zànwut lé lhoqpyíng byi râ nghut lhê.
27 Ngò gi, náng é hí má, Ngá chyáng mâ é gyùq chiq hpo mó nhang kat luî, nàng jé é jang mâ é a-myû wuì lé gyùq hông nhúngnhâng byùq nhâng râ nghut lhê. Ngò gi, náng é gyè bànshoq bang lé lhik hpâng nhâng râ nghut lhê. 28 Ngò gi, náng é hí má, myínbyo lé nhâng luî, Hiwi byù, Hkanan byù eq Hiti byu pé lé, náng é hkyô mai hkat htoq pyám nhâng râ nghut lhê. 29 Nghut kôlhang, ngò gi, haú bang lé razàn hkaû má za hkat pyám râ a nghut, haî mù gâ le, núngmòq é matú, maumyî haû chamchyuîyuì dùt byùq mù, tân jung gaunyhaú pé byíng zan byùq râ nghut lhê. 30 Haú mau lé wó sing yù shoq nàng myô jàt lo é hkûn jé shoq, Ngò gi, náng é hí mai, haú bang lé yhó yhó mai hkat htoq pyám râ nghut lhê.
31 Ngò gi, náng é maukyo lé, Nhông Nè mai Medihteri-an Wuimaub jé shoq, haû yòso mai Uhprat Wuìlàng jé shoq kut to byi râ nghut lhê. Ngò gi, haú mau má nyi é byu pé lé, núngmòq é lòqhkaû má àp byi râ nghut mù, nàng gi, náng é hí mai, haú bang lé hkat htoq pyám râ nghut lhê. 32 Yhángmòq eq le, yhángmòq é hparà pé eq le, dangshikaq ge to râ a nghut. 33 Yhángmòq gi, Ngo lé mara kut shut é hkyô nang lé kut nhâng kôrâ nghut lhê; haû mù, náng é maumyî má yhángmòq lé ge nyì nhâng râ a nghut. Haî mù gâ le, yhángmòq é hparà lhô lé noqkuq é hkyô gi, núngmòq é matú dumzo dùt râ nghut lhê.” gâ ri.