Htoq Ló 22

Sùtzè Lé Mâgum É Hkyô

Byù rayùq yùq, no lé nghut nghut, sau lé nghut nghut hkau luî, sat pyâm é, a nghut jáng, ûng pyâm é nghut le gi, no radû é matú ngo du xap, sau radû é matú myî du xap kut ra râ nghut lhê.

2 Hkau sû rayùq yùq, myín lé yhúmhkaû dû htông nyi é lé myàng mù, shî shoq záng nhuq byî é nghut jáng, nhuq sû yùq gi, manglàt yui wó râ a nghut. 3 Nghut kôlhang, haû gi, buì htoq é htâng má dùt é nghut jáng, nhuq sû yùq gi, manglàt yui wó râ nghut lhê.

Hkau sû yùq gi, jaí ra râ nghut lhê. Nghut kôlhang, byi râ haî a wó é nghut jáng, yhang hkaû yu é zè malaî, yhang lé jùn dông ûng pyám ra râ nghut lhê. 4 Hkaû yu ló é no nghut nghut, loze nghut nghut, sau nghut nghut lé, yhâng é lòq má dui nyi ashî nghut é lé myang ho é nghut jáng, yhang gi, í tú taû jaí ra râ nghut lhê.

5 Byù rayùq yùq, yhûmsing é shigu gaunyhaú lé, yò má nghut nghut, tsibyiq hkyâm má nghut nghut kat hâng kat é le, kat lhâm kat luî, góbâng é yò má wàng zô pyám byi nhang é le, kut é nghut jáng, haú yùq gi, yhûmsing yò mâ é nghut nghut, yhûmsing tsibyiq hkyâm mâ é nghut nghut, je ge é lé jaí ra râ nghut lhê.

6 Myi tap kat mù, zu púng má nyé dàp ló luî, gùqding nghut nghut, gùq gàm pé nghut nghut, gùq yò gón nghut nghut nyé gyó pyâm é nghut jáng, myi tap kat sû gi, jaí ra râ nghut lhê.

7 Byù rayùq yùq, ngùnhtung, a nghut jáng, zè pé lé, yhâng é yhûmkyochâng chyáng byam yhúm nhang tô é hkûn, haú yùq é lòq mai hkaû hpyuq mù, hkau sû lé myang chyup é nghut jáng, hkau sû haû gi, í tú xap ra râ nghut lhê. 8 Nghut kôlhang, hkau sû lé a myàng é nghut jáng, zè bo yhûm to sû haú lé, târâ agyi pê chyáng shuî ê ra râ nghut lhê; haú hkûn, târâ agyi pé gi, yhang hkau a hkaû é lé hpyit byi râ nghut lhê. 9 Dangnyhin nyhîn lhûm é hkyô nghut é, no, loze, sau, buhîng pé, a nghut jáng, gótû lhoqhpyuq é zè haî eq séng luî nghut kôlhang, rayùq yùq mai, ‘Shî gi, ngá é nghut ri.’ ga taî é nghut jáng, zè sing to sû eq yhángnhik í yùq é, mû haú lé, târâ agyi pê chyáng yu ê ra râ nghut lhê. Haû târâ agyi pé mai, mara bò sû ga hpyit byi huî é sû yùq gi, góyùq lé, í tú jaí ra râ nghut lhê.

10 Byù rayùq yùq, yhâng é yhûmkyochang lé, loze, no, sau, a nghut jáng, gótû shigu gaunyhaú lé zúng nhang tô é hkûn, yhâng é lòq má shi byùq é nghut nghut, dàm dap é nghut nghut, ó a wú tô é má kôn ló byùq é nghut nghut dùt jáng, 11 haû zúng byî é sû gi, góyùq é sùtzè lé a yù nghû, haû Yhûmsîng Garaî é hí má dâkam é dông, yhángnhik é gyoro mâ é mû haú lé lhoqpân pyám râ dùt lhê. Gaunyhaú yhûmsîng gi, haú lé hàp yù râ lhê; zúng byi sû le a jaí ra râ é nghut lhê. 12 Nghut kôlhang, shigu gaunyhaú haú lé, yhâng chyáng mai hkaû ló byùq é nghut jáng, yhang gi, gaunyhaú yhûmsîng lé jaí ra râ nghut lhê. 13 Shigu gaunyhaú lé, yòsô ze èq lâng myha pyâm é nghut jáng, yhûmkyo hpó haû gi, myìt tô é shojap pé lé, sàksé dông yu shit râ dùt lhê; haú hkûn, lâng myha pyâm é gaunyhaû é matú jaí ra râ a nghut.

14 Byù rayùq yùq, yhûmkyochâng é shigu gaunyhaú lé nghô yù mù, yhûmsîng a nyi tô é má, dàm dap byùq é nghut nghut, shi byùq é nghut nghut dùt jáng, yhang gi, hau lé jaí ra râ nghut lhê. 15 Nghut kôlhang, yhûmsîng eq rahá nghut to jáng gi, ngho sû yùq haî byi no a ra nghut ri. Ahpau byi mù nghô yu é nghut jáng gi, byùq byùq é gaunyhaû é matú jaí nó a ra, ahpau za byi jáng nghut bê.

Byù Nyì Byù Yap Eq Sêng É Hkyô

16 Yùqgè rayùq yùq, ô èq le a dûng to shî é zo-myi gyíng lé mhuî yù mù, shuî yhup pyâm é nghut jáng, yhang gi, hpau kat luî, yù ra râ nghut lhê. 17 Zo-myi zo hau é yhâng wa gi, yùqgè haú lé a kâm byi tsô é nghut kôle, yùqgè haú yùq gi, zo-myi gyíng lé shut hpau kat ra shirâ nghut lhê.

18 Myòqheq mû kut é myiwe myhí lé, chyungxe ge duì nhang to râ a nghut.

19 Shigu gaunyhaú eq gùngsho zùm yàp é sû lé gi, sat pyám ra râ nghut lhê.

20 Haû Yhûmsîng Garai mai lai luî, gótû hparà lé hkungga nhông byî é sû lé gi, chyut yhang lhoqhtên pyám ra râ nghut lhê.

21 Byù bíng lé, a ge é hkyô le, zìk zô é hkyô le, ge kut râ a nghut; hkâsu mù gâ le, núngmòq gi, Egutuq ming má byù bíng dùt wú bekô nghut ri.

22 Chuimó chuízo lé hpu nhâng shó nhang é hkyô, ge kut râ a nghut. 23 Núngmòq kut é nghut jáng, yhángmòq, Ngo lé wùt ngaù kôrâ nghut mù, Ngò gi, yhángmòq é ngaù htê lé hkyak gyo byi râ nghut lhê. 24 Ngò gi, nhikjum mó yô lô mù, núngmòq lé sham èq sat râ nghut luî, núngmòq é yhang myî pé gi, chuimó tsing mó luî, núngmòq é zodù wuì gi, chuízô pé dùt bùm kôrâ nghut lhê.

25 Nàng eq rahá nyi é, Ngá é a-myû hkaû mâ é asho awui dùt sû lé, nàng ngùn chyi byî é hkûn, ngùn chyi zo bang su hkâkut; yhang lé a-myàt hkâdung. 26 Nàng gi, náng é yhûmkyochâng é buhîng lé, yhang danghtum htûm tô é eq rajung za yu tô é nghut jáng, buì a wàng shi-má dum tau byi aq; 27 haî mù gâ le, náng é yhûmkyochang gi, wùt râ bu haû za wó é nghut ri. Yhang haî ge wùt yhup râ lhú? Ngo gi, yhang, Ngo lé wùt dûng ngaù jáng gyo byi râ nghut lhê; hkâsu mù gâ le, Ngò gi, shogyo chyitdàp myìt bò Sû nghut lhê.

28 Garai Gasang lé rhoî dang ge taí râ a nghut; náng é byu pé lé ùp é zau lé le ge nhing râ a nghut.

29 Kyôshi myuishi eq tsibyiq wing lé, ahkyíng a htâng gyó é za nhông byi aq.

Nungzo yùqzô pé mâ é zo-mún lé le, Ngo lé byi ra râ nghut lhê. 30 Haû eq rajung za, náng é no myang lé le, sau pé lé le kut ra râ nghut lhê. Nyhit nyí gi, yhángmòq é yhâng nû pé eq rahá nyì nhâng mù, shit nyí nghu é nyí gi, Ngo lé byi ra râ nghut lhê.

31 Núngmòq gi, Ngá é chyoiyúng é byu pé dùt kôrâ nghut lhê. Haû mù, yòsô ze èq lâng myha sat pyâm é shigu gaunyhaú sho lé ge zo râ a nghut; haú lé, hkuî pé lé dú byî pyám keq.