Shigu Gaunyhaú Pê Chyáng Wúm Gyó É Hkyô
9
Hau htâng, haû Yhûmsîng Garai gi, Mosheq lé, “Hpara-uq chyáng ê mù, ‘Hebre byu pê é Garai Gasang, haû Yhûmsîng Garai taî le, “Ngá é byu pé Ngo lé wó noqkuq kó sháng gàq, yhángmòq lé nhang kat àq.” gâ ri. 2 Yhángmòq lé nhang kat râ lé, nàng he-ngìk pyâm mù, yhángmòq lé xoq hkûm zing nyi é nghut jáng, 3 haû Yhûmsîng Garaî é lòq gi, yò má nyi é, náng é shigu gaunyhaú pé nghut é, náng é myang pé, loze pé eq gola-uk pê é ahtoq má le, náng é no pé, sau pé eq bainám pê é ahtoq má le, gyai yhang gyùq chiq hpo wúm mó jé nhâng râ nghut lhê. 4 Nghut kôlhang, haû Yhûmsîng Garai gi, Isira-elaq byu pê é shigu gaunyhaú eq Egutuq byu pê é shigu gaunyhaû é gyoro má kyodum kat to râ nghut mù, Isira-elaq byu pé eq sêng é gaunyhaú radu lháng shi byùq râ a nghut.’ nghû taí aq.” ga taî ri.5 Haû Yhûmsîng Garai gi, ahkyíng masàt yù mù, “Haû Yhûmsîng Garai gi, nàpmá, shí mau má haú hkyô kut râ nghut lhê.” ga taî ri. 6 Haû mù, haû Yhûmsîng Garai gi, htang nyí, haú hkyô kut bê nghut mù, Egutuq byu pê é shigu gaunyhaú bànshoq shi byùq bê nghut ri; nghut kôlhang, Isira-elaq pé eq sêng é shigu gaunyhaú pé gi, radu lháng a shî nghut ri. 7 Hpara-uq gi, myî gon nhang wú le, Isira-elaq byu pê é gaunyhaú pé radu lháng a shi byùq é lé wó sê ri. Nghut kôlhang, yhâng é myìt gi, rû htan tô ashî nghut mù, byù haú bang lé a nhang kat nghut ri.
Byìng Mó Yùq Dam Hpuzô É Hkyô
8 Hau htâng, haû Yhûmsîng Garai gi, Mosheq eq Arun lé, “Núngnhik gi, myi bunghkyûng mâ é myiwap ra-tsup tsup kyaq yû luî, Mosheq gi, Hpara-uq é hí má maulat shut tsup tâng kat àq. 9 Myiwap haû gi, Egutuq ming gón má hpuílhup dùt byùq mù, ra-mau gón mâ é byu pé eq gaunyhaú pê chyáng byìng-ûn un lò luî, byìng mó yùq bùm râ nghut lhê.” ga taî ri.
10 Haû mù, yhángnhik tâng gi, myi bunghkyûng mai myiwap tsup yû luî, Hpara-uq é hí má yàp tô akô. Mosheq gi, tsup tô é myiwap lé maulat shut tsup tâng kat é nghut luî, byu pé eq gaunyhaú pé má byìng-ûn un lò mù, byìng mó yùq bùm bê nghut ri. 11 Haû myòqheq sará pê chyáng le, Egutuq byù bànshoq bâng chyáng le, byìng mó yùq bùm kô é yánmai, myòqheq sará pé gi, Mosheq é hí má a ê wó yàp lo kó nghut ri. 12 Nghut kôlhang, haû Yhûmsîng Garai mai Mosheq lé taî é eq rajung za, Yhûmsîng Garai gi, Hpara-uq é myìt lé lhoqhtan to byî é nghut luî, yhang gi, Mosheq eq Arun é dang lé a gyo byi nghut ri.
Lìkwò Mó Dam Hpuzô É Hkyô
13 Hau htâng, haû Yhûmsîng Garai gi, Mosheq lé, “Nàpkyó noq le toq luî, Hpara-uq é hí má ê yàp to mù, yhang lé, ‘Hebre byu pê é Garai Gasang, haû Yhûmsîng Garai taî le, “Ngá é byu pé Ngo lé wó noqkuq kó sháng gàq, yhángmòq lé nhang kat àq. 14 Haû a nghut jáng, shí dá gi, myìdàm htoq gón má Ngò sû é rayùq lháng a nyi é hkyô lé nàng wó sé sháng gàq, Ngò, náng chyáng le, náng é zaugun wuì eq náng é byu pê chyáng le, Ngá é wúm pé bànshoq jé nhâng râ nghut lhê. 15 Hkâsu mù gâ le, ahkuî, Ngò, Ngá é lòq lhâm kat mù, nang lé le, náng é byu pé lé le, wúm èq dam mó byî é ru nghut le gi, nàng, myìdàm htoq mai htûm byùq é hui râ nghut lhê. 16 Nghut kôlhang, nang lé, Ngá é hpungwup a-tsam wó tûn shit râ matú le, myìdàm gón má, Ngá é myìng wó lhoqpyo jàm râ matú le, Ngò gi, nang lé chyungxe dui nyì nhang é nghut lhê. 17 Ahkuî le, nàng gi, Ngá é byu pê é hí má ko bun luî, yhángmòq lé a nhang kat kut shirâ lhú? 18 Haû mù luî, Ngò gi, nàpmá shí u lé, Egutuq ming xuq é mai ahkuî jé shoq a gyó wú é, ladu laî é lìkwò mó lé wo hkyó nhâng râ nghut lhê. 19 Haû mù, yò má nyi é jòq é náng é shigu gaunyhaú eq azíng zê jung hkangmó lé, wó nghêhkau é jang má kôn to yu to râ matú hkunmó hkyó aq; haî mù gâ le, haû má a jé nyi é za, shinggan yò hkaû má nyi tô é byù yùq hkangmó eq gaunyhaú hkangmó lé lìkwò haû gyó gyun râ nghut mù, yhángmòq shi byùq râ nghut lhê.” gâ ri.’ nghû taí kyo aq.” ga taî ri.
20 Haû Yhûmsîng Garaî é dang lé gyô gyùq é, Hpara-uq é zaugun wuì gi, yhángmòq é jùn pé eq yhángmòq é shigu gaunyhaû pé lé, ahkaû shut hân hân shuî hâng yu akô nghut ri. 21 Nghut kôlhang, haû Yhûmsîng Garaî é dang lé haî su a ngam é bang gi, yhángmòq é jùn pé eq shigu gaunyhaû pé lé, yò má nyhi pyâm tô akô nghut ri.
22 Haú hkûn, haû Yhûmsîng Garai gi, Mosheq lé, “Egutuq ming jowò hkangmó mâ é byu pé eq shigu gaunyhaú pê é ahtoq mâ le, yò hkaû pé má yùq é junghkang jungmó é ahtoq má le, lìkwò mó gyó gyun sháng gàq, náng é lòq lé maulat shut lhâm kat àq.” ga taî ri. 23 Mosheq gi, dumbáng chûng luî, yhâng é lòq lé maulat shut lhâm kat é hkûn, haû Yhûmsîng Garai gi, myigùng htoq má, maugum gûm lhê, lìkwò mó gyó lhê, maulhap hpyat lhê dùt nhâng bê nghut ri. Haú dông, Yhûmsîng Garai gi, Egutuq maumyî má lìkwò mó wo hkyó nhâng bê nghut luî, 24 lìkwò gyó lhê, ê ê lò lò lhap hpyat lhê dùt bê nghut ri. Haû gi, Egutuq byu pé a-myû ra-myû, lé dùt é hkûn mai, Egutuq ming gón má ladu laî dik é lìkwò mó laìdun nghut ri. 25 Egutuq ming gón mâ é yò hkaû pé má nyi tô é byu pé lé le, gaunyhaû pé lé le, lìkwò mó hau èq bàt bê nghut ri; yò má yùq é junghkang jungmó lé le bàt hkyop pyám mù, sikgâm hkangmó lé le bàt hkyuî pyám bê nghut ri. 26 Isira-elaq byu pé nyi é, Goshen mau má za lìkwò a gyó nghut ri.
27 Haú hkûn, Hpara-uq gi, Mosheq eq Arun lé ji yù mù, “Shí dá gi, ngò shut bê nghut ri; haû Yhûmsîng Garai gi, díngmán Sû nghut ri; ngò eq ngá é byu pé gi, mara bò bang nghut ri. 28 Ngá-mòq chyáng maugum gûm é eq lìkwò gyó é, shî í ga jáng gé bê; haû Yhûmsîng Garai lé kyû bo dung byi keq. Ngò, núngmòq lé nhang kat berâ; núngmòq nyi to nó a ra lo.” ga taî ri.
29 Haú hkûn, Mosheq gi, “Ngò, wà mó hkaû mai htoq ló jáng, ngá é lòq lhâm kat mù, haû Yhûmsîng Garai lé kyûdung râ nghut lhê. Haú hkûn, myìdàm htoq lé gi, haû Yhûmsîng Garai sing é hkyô lé nàng wó sé râ matú, maugum gûm é zîm byùq mù, lìkwò a gyó lo dùt byùq râ nghut lhê. 30 Nghut kôlhang, nàng eq náng é zaugun wuì gi, Yhûmsîng Garai Gasang lé gyùq kyum é myìt a bo shi kôrâ nghut é lé ngò sê lhê.” ga tû taî ri.
31 (Haú u, mùk-yó gùq gi, abum bûm lo é eq, jigâm gi, achyu ru chyû lo ashî nghut mù, jigâm eq mùk-yó gùq í ja é htên byùq bê nghut ri. 32 Haû súngsô eq gùqnyang gàm kúm gi, a ko shî é yánmai, a htên byùq nghut ri.)
33 Hau htâng, Mosheq gi, Hpara-uq chyáng mai htoq ló luî, wà mó shinggan má jé jang, haû Yhûmsîng Garaî shut yhâng é lòq lhâm kat ri; haú hkûn, maugum gûm é eq lìkwò gyó é zîm byùq luî, haú mau má mau a wò lo nghut ri. 34 Hpara-uq gi, maú wo é, lìkwò gyó é eq maugum gûm é zîm byùq bê lé myàng jáng, mara dum shut bê nghut ri. Yhang eq yhâng é zaugun hpó gi, yhángmòq é myìt lé lhoqhtan to bekô nghut ri. 35 Haû mù, Mosheq dông Yhûmsîng Garai taî é eq rajung za, Hpara-uq gi, myìt htan tô é nghut mù, Isira-elaq byu pé lé a nhang kat nghut ri.