Po Dam Hpuzô É Hkyô
8
Haú hkûn, haû Yhûmsîng Garai gi, Mosheq lé, “Hpara-uq chyáng ê mù, yhang lé, ‘Haû Yhûmsîng Garai taî le, Ngá é byu pé Ngo lé ê wó noqkuq kó sháng gàq, yhángmòq lé nhang kat àq. 2 Nàng lhom he-ngìk pyám mù, yhángmòq lé a nhang kat é nghut jáng, Ngò, náng é ming ra-ming gón má po dam jé nhâng râ nghut lhê. 3 Haû Nile Wuìlàng má po pé byíng zan lò mù, po haú pé byam htoq lô luî, náng é hkóhkâm wâng má le, náng é yhup wàp eq náng é hpyang má le, náng é zaugun wui é yhûm pé má le, náng é shiwa byu pê chyáng le, náng é mùk bunghkyûng eq mùk nyhó bó líng má le yán wang lo kôrâ nghut lhê. 4 Po haú pé gi, náng chyáng le, náng é shiwa byu pê chyáng le, náng é zaugun wuì bànshoq bâng chyáng le dòq lò kôrâ nghut lhê.’ gâ ri nghû ê taí aq.” ga taî ri.5 Hau htâng, haû Yhûmsîng Garai gi, Mosheq lé, “Nàng, Arun lé, ‘Egutuq ming má po jé râ matú, náng é lòq má chung tô é dumbáng lé wuì zo wuì mó lâng pé eq wuìhtum wuìnhông pê htoq má lhâm kat àq.’ nghû taí aq.” ga taî ri.
6 Haû mù, Arun gi, yhâng é lòq lé, Egutuq ming mâ é wuì pê htoq má lhâm kat ri; haú hkûn, po pé htoq lô mù, ra-mau gón má byíng zan to bê nghut ri. 7 Nghut kôlhang, myòqheq sará pé gi, yhángmòq é myòqheq hpàqchyî dông haû eq rajung za kut bum akô nghut ri; yhángmòq le, Egutuq ming má po pé wó htoq lô nhang akô nghut ri.
8 Hpara-uq gi, Mosheq eq Arun lé ji yù mù, “Ngò eq ngá é byu pê chyáng mai po lé yu pyám byi râ matú, haû Yhûmsîng Garai lé kyûdung byi keq; haú hkûn, ngò gi, haû Yhûmsîng Garai lé hkungga nhông byi râ matú, núngnhik é byu pé lé ê nhâng râ nghut lhê.” ga taî ri.
9 Mosheq gi, Hpara-uq lé, “Haû Nile Wuìlàng má nyi tô bum é mai lai luî, náng chyáng mai le, náng é yhûm pé mai le, po pé huî sêng byùq ló byùq râ matú, nàng eq náng é zaugun wui matú le, náng é byu pê é matú le, kyûdung byi râ ahkyíng lé, nàng tú byi aq.” ga taî ri.
10 Haú hkûn, Hpara-uq gi, “Nàpmá.” ga taî ri.
Mosheq gi, “Ngá-mòq é Garai Gasang nghut é, haû Yhûmsîng Garai sû é Garai Gasang a nyi é lé, nàng wó sé sháng gàq, nàng taî é eq rajung za dùt râ nghut lhê. 11 Po pé gi, nàng eq náng é yhûm pé mai le, náng é zaugun wuì eq náng é byu pê chyáng mai le, htoq ló byùq râ nghut lhê; haû Nile Wuìlàng má za nyi tô bùm râ nghut lhê.” ga tû taî ri.
12 Mosheq eq Arun, Hpara-uq chyáng mai htoq ló é htâng má, Mosheq gi, Hpara-uq chyáng haû Yhûmsîng Garai mai jé nhang é po eq séng luî, Yhûmsîng Garai lé wùt dung bê nghut ri. 13 Haú hkûn, Yhûmsîng Garai gi, Mosheq dûng é eq rajung za kut byi bê nghut luî, po pé gi, yhûm pé mâ é le, yhûmwàng hkaû pé mâ é le, yò pé mâ é le shi byùq bùm bê nghut ri. 14 Yhángmòq gi, po haú pé lé shûm bum to kô é nghut mù, ra-mau gón hing hing bùp nam to bê nghut ri. 15 Nghut kôlhang, haû Yhûmsîng Garai taî é eq rajung za, Hpara-uq gi, dam haú mai wó lùt bê nghut é lé myàng jáng, yhâng é i-myìt lé lhoqhtan pyám mù, Mosheq eq Arun é dang lé a gyo byi lo nghut ri.
Pyup Dam Hpuzô É Hkyô
16 Haú hkûn, haû Yhûmsîng Garai gi, Mosheq lé, “‘Náng é lòq mâ é dumbáng lé lhâm kat mù, myigùng mâ é hpuílhup lé bàt kat àq.’ nghû Arun lé taí aq; haú hkûn, hpuílhup gi, Egutuq ra-ming gón má pyup dùt byùq râ nghut lhê.” ga taî ri. 17 Yháng nhiktâng gi, hau dông kut bekô; Arun gi, dumbáng lé zui mù, yhâng é lòq lé lhâm kat luî, myigùng mâ é hpuílhup lé bàt kat jáng, pyup pé gi, byu pê chyáng le, gaunyhaú pê chyáng le dòq yán lo bùm bekô nghut ri. Egutuq ming mâ é hpuílhup pé bànshoq gi, pyup dùt byùq bê nghut ri. 18 Nghut kôlhang, myòqheq sará pé gi, yhángmòq é myòqheq hpàqchyî dông pyup kut htoq shi-kùt wú kôle, a wó kut htoq kó nghut ri.
Haû pyup pé gi, jowò hkangmó má, byu pê chyáng le, gaunyhaú pê chyáng le byíng zan tô é nghut mù, 19 haû myòqheq sará pé gi, Hpara-uq lé, “Shî gi, Garai Gasâng é lòq yhang nghut bê.” ga taî akô. Nghut kôlhang, haû Yhûmsîng Garai taî é eq rajung za, Hpara-uq é i-myìt htan to mù, yhang gi, yhángnhik é dang lé a gyo byi nghut ri.
Mhoq Dam Hpuzô É Hkyô
20 Hau htâng, haû Yhûmsîng Garai gi, Mosheq lé, “Nàpkyó noq le toq mù, Hpara-uq wuìlàng shut e ló é hí má ê yàp to luî, yhang lé, ‘Haû Yhûmsîng Garai taî le, “Ngá é byu pé, Ngo lé ê wó noqkuq kó sháng gàq, yhángmòq lé htoq ê nhâng àq. 21 Nàng, Ngá é byu pé lé a htoq ê nhang é nghut jáng, Ngò gi, nàng eq náng é zaugun wui chyáng le, náng é byu pê chyáng le, náng é yhûm pé má le, mhoq jûm pé nhang kat râ nghut lhê. Egutuq byu pê é yhûm pé má gi, mhoq pé byíng zan to râ; myigùng htoq lé lháng, mhoq pé èq nghop pyám râ nghut lhê.
22 Nghut kôlhang, haú nyí má, Ngá é byu pé nyi é Goshen mau má gi, gótû dùt râ nghut lhê; Ngò, Yhûmsîng Garai gi, shí mau má nyi nyi é hkyô lé, nàng wó sé sháng gàq, haú mau má mhoq pé nyì râ a nghut. 23 Haú dông, Ngò gi, náng é byu pé eq Ngá é byu pé lé kyodum kat pyám râ nghut lhê. Alhô agàn haû gi, nàpmá dùt htoq râ nghut lhê.” gâ ri.’ nghû taî aq.” ga taî ri.
24 Haû Yhûmsîng Garai gi, haú dông kut é nghut luî, Hpara-uq é hkóhkâm wânghkaû má le, yhâng é zaugun wui é yhûm hkaû pé má le, mhoq ajùm ayò jé wang ló bê nghut ri. Egutuq ming gón le, mhoq haú pê é yánmai htên ló nyî bê nghut ri.
25 Haú hkûn, Hpara-uq gi, Mosheq eq Arun lé ji yù mù, “Shí mau hkaû má, núngmòq é Garai Gasang lé hkungga ê nhông byi keq.” ga taî ri.
26 Nghut kôlhang, Mosheq gi, “Haú dông gi, gè râ a nghut. Haú dông nghut jáng, ngá-mòq é Garai Gasang nghut é, haû Yhûmsîng Garai lé ngá-mòq nhông byî é hkungga pé gi, Egutuq byu pê é matú achaq achyut é zè dùt byùq râ nghut lhê. Yhángmòq é myòq hí má achaq achyut dùt é hkungga pé lé ngá-mòq nhông byî é ru nghut le gi, yhángmòq, ngá-mòq lé lùqgòk èq dú sat pyám kôrâ a nghut lhí? 27 Haû mù, ngá-mòq gi, ngá-mòq é Garai Gasang nghut é, haû Yhûmsîng Garai mai ngá-mòq lé hkunmó hkyô é eq rajung za, yòso shut sum nyí htoq sô ê mù, Yhang lé hkungga ê nhông byi ra râ nghut lhê.” ga taî ri.
28 Hpara-uq gi, “Ngò, núngmòq lé, yòso má, núngmòq é Garai Gasang nghut é, haû Yhûmsîng Garai lé hkungga ê nhông byi nhâng râ nghut lhê; nghut kôlhang, núngmòq gyai we shoq ge ê kôrâ a nghut. Ahkuî, ngá é matú kyûdung byi keq.” ga taî ri.
29 Mosheq gi, “Ngò, náng chyáng mai htoq ló eq yhang, haû Yhûmsîng Garai lé kyûdung râ nghut mù, nàpmá, Hpara-uq náng chyáng mai le, náng é zaugun wuì eq náng é byu pê chyáng mai le, mhoq haú jûm byùq ló byùq râ nghut lhê. Nghut kôlhang, Hpara-uq nàng, haû Yhûmsîng Garai lé hkungga ê byi râ matú shiwa byu pé lé a ê nhang é za, ngá-mòq lé a ge mhaú zo lo râ nghut lhê.” ga taî ri.
30 Hau htâng, Mosheq gi, Hpara-uq chyáng mai htoq ló luî, haû Yhûmsîng Garai lé kyûdûng é nghut mù, 31 haû Yhûmsîng Garai gi, Mosheq dûng é lé gyo byi bê nghut ri. Hpara-uq chyáng mai le, yhâng é zaugun wuì eq yhâng é byu pê chyáng mai le, mhoq haú jûm lé, radu lháng a myìt to loshoq lhoqpui pyám byi bê nghut ri. 32 Nghut kôlhang, shí dá le, Hpara-uq gi, yhâng é myìt lé lhoqhtan to mù, shiwa byu pé lé a ê nhâng dum kut bê nghut ri.