7
Haû mù, haû Yhûmsîng Garai gi, Mosheq lé, “Wú aq, Ngò gi, nang lé, Hpara-uq é matú, Garai Gasang su kut nhang to bê nghut mù, nungmang Arun gi, náng é myìqhtoi dùt râ nghut lhê. 2 Nàng gi, Ngò, nang lé hkunmó hkyô é bànshoq lé taí ra râ nghut lhê; nungmang Arun gi, Hpara-uq lé, yhâng é mau mai Isira-elaq byu pé lé htoq ló nhâng râ matú taí ra râ nghut lhê. 3 Nghut kôlhang, Ngò gi, Hpara-uq é i-myìt lé lhoqhtan to râ nghut mù, Ngá é làklaí alhô agàn pé eq maúhpo múzó pé lé Egutuq ming má myo myo kut shit kôle, 4 yhang gi, núngnhik é dang lé lhom gyo byi râ a nghut. Haú hkûn, Ngò gi, Ngá é lòq èq Egutuq ming má dam mó byi luî, Ngá é byù myû Isira-elaq mòqmó lé shuî htoq lô râ nghut lhê. 5 Haú dông, Ngá é lòq lhâm kat mù, Egutuq ming lé dam byi luî, Isira-elaq byu pé lé haû mai shuî htoq lo é hkûn, Ngò gi, haû Yhûmsîng Garai nghut é hkyô lé, Egutuq byu pé sé kôrâ nghut lhê.” ga taî ri.6 Mosheq eq Arun nhiktâng gi, haû Yhûmsîng Garaî èq yhángnhik lé hkunmó hkyô é eq rajung za kut bekô nghut ri. 7 Yháng nhiktâng, Hpara-uq lé dáng nyo é hkûn, Mosheq gi, chyungxe zànwut 80 zàn bò bê nghut ri; Arun gi, chyungxe zànwut 83 zân bò bê nghut ri.
Arun É Dumbáng Lhângmuì Dùt Byùq É Hkyô
8 Haû Yhûmsîng Garai gi, Mosheq eq Arun lé, 9 “Hpara-uq mai núngnhik lé, ‘Làklaí alhô agàn kut shit keq.’ ga lhom taí jáng, Arun lé, ‘Náng é dumbáng yù mù, Hpara-uq é hí má dú lheq kat àq.’ nghû taí aq; haú hkûn, dumbáng haû gi, lhângmuì dùt byùq râ nghut lhê.” ga taî ri.
10 Haû mù, Mosheq eq Arun gi, Hpara-uq chyáng ê luî, haû Yhûmsîng Garai hkunmó hkyô é eq rajung za kut bekô nghut ri. Arun gi, Hpara-uq eq yhâng é zaugun wui pê é hí má, yhâng é dumbáng lé dú lheq kat jáng, dumbáng haû gi, lhângmuì dùt byùq bê nghut ri. 11 Haú hkûn, Hpara-uq gi, hpàqchyî bò bang eq myòqheq hpàqchyî kut bang lé ji yu é nghut mù, haû Egutuq byu pê é myòqnghop sará pé le, yhángmòq é myòqheq hpàqchyî dông, haû eq rajung za kut bekô nghut ri. 12 Yùq hkangmó gi, ó le ô é dumbáng lé dú hkyô kat jáng, dumbáng haú pé gi, lhângmuì dùt byùq bê nghut ri. Nghut kôlhang, Arun é dumbáng gi, haú bâng é dumbáng lé myhui pyám ri. 13 Nghut kôlhang, haû Yhûmsîng Garai taî é eq rajung za, Hpara-uq é i-myìt htan byùq mù, yhángnhik é dang lé a gyo byi nghut ri.
Sui Dam Hpuzô É Hkyô
14 Hau htâng, haû Yhûmsîng Garai gi, Mosheq lé, “Hpara-uq é i-myìt gi, htan tô é nghut mù, a-myû haú lé a htoq ló nhâng kut ri. 15 Nàpkyó nàpsûn, Hpara-uq wuìlàng shut htoq e ló é u, nàng gi, yhang lé hui râ matú Nile Wuìlàng yàm má ê láng to aq; náng é lòq má gi, lhângmuì dùt wú é dumbáng yu chûng àq. 16 Haû mù, yhang lé, ‘Hebre byu pê é Garai Gasang, haû Yhûmsîng Garai gi, náng chyáng ngo lé, “Ngá é byu pé yòso shut ê mù, Ngo lé ê wó noqkuq kó sháng gàq, yhángmòq lé nhang kat àq.” ga taí nhang ri. Nghut kôlhang, nàng gi, ahkuî jé shoq a gyo byi nghut ri. 17 Haû Yhûmsîng Garai taî le, “Ngò, Yhûmsîng Garai nghut é hkyô lé, nàng shí dông mai wó sé râ nghut lhê; wú aq, Ngò, ngá é lòq má chung tô é dumbáng èq Nile Wuìlàng má bàt kat râ, haú hkûn, wuì haû gi, sui dut byùq râ nghut lhê. 18 Nile Wuìlàng mâ é ngozô pê shi byùq râ nghut mù, wuìlàng haû le gyúm nam byùq râ nghut lhê; Egutuq byu pé gi, wuì haú lé a ge shuq kôrâ nghut lhê.” gâ ri.’ nghû taí aq.” ga taî ri.
19 Hau htoq agó, haû Yhûmsîng Garai gi, “Arun lé, ‘Náng é lòq má chung tô é dumbáng lé, Egutuq ming mâ é wuì nghut é, wuì zo wuì mó lâng eq wuìhtum wuìnhông pê htoq má lhâm kat àq.’ nghû taí aq. Haú hkûn, haú pé bànshoq gi, Egutuq jowò hkangmó má sui dut byùq râ nghut lhê; sik lànghkang pé eq lùqgòk yam pé má lháng sui bo byùq râ nghut lhê.” ga Mosheq lé taî ri.
20 Mosheq eq Arun gi, haû Yhûmsîng Garai hkunmó hkyô é eq rajung za kut bekô. Arun gi, Hpara-uq eq yhâng é zaugun wui é hí má, yhâng é dumbáng lé tu toq mù, Nile Wuìlàng lé bàt kat ri; haú hkûn, wuìlàng mâ é wuì bànshoq gi, sui dut byùq bê nghut ri. 21 Nile Wuìlàng mâ é ngozô pé shi byùq mù, wuìlàng haû gi, lûm yhang bùp nàm luî, Egutuq byu pé gi, wuì haú lé a ge shuq lo kó nghut ri. Egutuq ming jowò hkangmó má sui baú baú dùt to bê nghut ri.
22 Nghut kôlhang, haû Egutuq myòqheq sará pé le, yhángmòq é myòqheq hpàqchyî eq rajung za kut akô nghut mù, Hpara-uq é i-myìt htan byùq bê nghut ri. Yhang gi, haû Yhûmsîng Garai taî é eq rajung za, Mosheq eq Arun é dang lé a gyo byi nghut ri. 23 Hpara-uq gi, haú hkyô lé myìt má a kat tô é za, yhâng é gùng lhik mù, yhâng é hkóhkâm yhûm shut wang ló bê nghut ri. 24 Haû Egutuq byu pé bànshoq bang gi, wuìlàng haú mâ é wuì a wó shuq lo kô é yánmai, wuì myàng shuq râ matú, Nile Wuìlàng cháng luî hkat dû ho akô nghut ri.
25 Haû Yhûmsîng Garai, Nile Wuìlàng lé bàt é htâng nyhit nyí lai bê nghut ri.