6
Haú hkûn, haû Yhûmsîng Garai Gasang gi, Mosheq lé, “Ahkuî, Ngò, Hpara-uq lé hkâsu kut râ hkyô, nàng myàng râ nghut lhê. Yhang gi, Ngá é hpungwup a-tsam bo é lòq yánmai, yhángmòq lé ê nhâng râ nghut lhê; yhang gi, Ngá é hpungwup a-tsam bo é lòq yánmai, yhángmòq lé, yhâng é ming mai hkat htoq kat râ nghut lhê.” ga taî ri.2 Hau htoq agó, Garai Gasang gi, Mosheq lé, “Ngò gi, Yhûmsîng Garai nghut lhê. 3 Ngò gi, Abraham, Isak eq Yakup lé, Wum-o a-tsam dìk shoq bò Sû Garai Gasang dông htoq shit bê nghut lhê; nghut kôlhang, yhángmòq gi, Ngá myîng, Yhûmsîng Garai nghut é hkyô lé a sé kó nghut ri. 4 Ngò gi, byù bíng dông yhángmòq bíng nyi é Hkanan mau haû lé, yhángmòq lé byi râ nghû le, yhángmòq eq dangshikaq tô tô é nghut lhê. 5 Hau htoq agó, Egutuq byu pê èq jùn zô nyi é Isira-elaq byu pê é ngaùhkyûng ngaùyang htê lé Ngò wó gyo bê nghut mù, Ngá é dangshikaq lé myìtbun bê nghut lhê.
6 Haû mù, haû Isira-elaq byu pé lé, ‘Ngò gi, Yhûmsîng Garai nghut lhê; Ngò gi, núngmòq lé, haû Egutuq byu pê é kyaú hkaû mai shuî htoq yû râ nghut lhê. Ngò gi, núngmòq lé, yhángmòq é jùn dut nyi é mai lhoqlhut yû râ nghut lhê; Ngò gi, núngmòq lé, lhâm tô é wum-o bo é lòq èq le, dàm mó byî é dông mai le, hkyi htoq yû râ nghut lhê. 7 Ngò gi, Ngá é byu pé dông núngmòq lé tsing shuî yù mù, núngmòq é Garai Gasang dùt râ nghut lhê. Haú hkûn, Ngò gi, núngmòq lé, Egutuq byu pê é kyaú hkaû mai shuî htoq yu é Sû, núngmòq é Garai Gasang nghut é, haû Yhûmsîng Garai nghut é hkyô lé, núngmòq sé kôrâ nghut lhê. 8 Ngò gi, Abraham, Isak eq Yakup pé lé byi râ nghû dâkam tô é mau má, núngmòq lé shuî ló mù, núngmòq sîng râ matú maumyî haú lé byi râ nghut lhê. Ngò gi, haû Yhûmsîng Garai nghut lhê.’ nghû taî aq.” ga taî ri.
9 Mosheq gi, Isira-elaq byu pé lé haú hkyô taî kyô ri; nghut kôlhang, yhángmòq gi, myìt wum gyuî byùq kô é eq jùn mú lûm wuîhke kô é yánmai, yhâng é dang lé a gyo byi kó nghut ri.
10 Haú hkûn, haû Yhûmsîng Garai gi, Mosheq lé, 11 “Ê mù, yhâng é ming mai Isira-elaq byu pé lé nhang htoq kat râ matú, Egutuq hkóhkam Hpara-uq lé ê taí keq.” ga taî ri.
12 Nghut kôlhang, Mosheq gi, haû Yhûmsîng Garai lé, “Haû Isira-elaq byu pé lháng, ngá é dang lé a gyo kô le nhîng, ngò su nhut shô laí sua é dang lé, Hpara-uq gi, haî mù lhom gyo byi râ lhú?” ga taî ri. 13 Nghut kôlhang, haû Yhûmsîng Garai gi, Mosheq eq Arun lé ji yù mù, Isira-elaq byu pé lé Egutuq ming mai ê shuî htoq lô râ matú hkunmó hkyó luî, Isira-elaq byu pé eq Egutuq hkóhkam Hpara-uq chyáng nhang kat ri.
Mosheq Eq Arun É I-kun Byù Eq Sêng É Hkyô
14 A-ô mâ é gi, yhángmòq é yhûm i-kun pê é gùnchyung pé nghut ri. Isira-elaq é yhang zo zo-mún Rubin é yhang zo yùqzô pé gi, Hanok, Hpalu, Heziron eq Hkarimi pé nghut akô; haú bang gi, Rubin é a-myû koq pé nghut akô. 15 Sime-on é yhang zo yùqzô pé gi, Yemu-ela, Yamin, Ohat, Yahkin, Zohara eq Hkanan myhî chyáng mâ é Sha-ula pé nghut akô; haú bang gi, Sime-on é a-myû koq pé nghut akô. 16 Lewiq é yhang zo yùqzô pê é myìng gi, yhángmòq kâ xûm tô é má cháng jáng, Gerishon, Kohat eq Merari pé nghut akô. Lewiq gi, 137 zân chyungxe dui ri. 17 Gerishon é yhang zo yùqzô pé gi, yhángmòq é yhûmhtu akoq pé má cháng jáng, Lipni eq Shimi nhiktâng nghut akô. 18 Kohat é yhang zo yùqzô pé gi, Amram, Izihara, Hebron eq Uzi-ela pé nghut akô; Kohat gi, 133 zân chyungxe dui ri. 19 Merari é yhang zo yùqzô pé gi, Mali eq Mushi nhiktâng nghut akô. Haú bang gi, yhángmòq kâ xûm tô é má cháng luî, Lewiq é a-myû koq pé nghut akô.
20 Amram gi, yhâng wâ é yhang gu nghut é, yhâng mhoí Yohkebet lé yu é nghut luî, haú yùq gi, yhâng é matú Arun eq Mosheq lé hkû byî ri. Amram gi, 137 zân chyungxe dui ri. 21 Izihara é yhang zo yùqzô pé gi, Kora, Nehpek eq Zihkri pé nghut akô. 22 Uzi-ela é yhang zo yùqzô pé gi, Misha-ela, Elizahpan eq Sihtiri pé nghut akô.
23 Arun gi, Aminadap é yhang zo byìzo, Nashon é yhâng nhammó Elisheba lé yu é nghut mù, haú yùq gi, yhâng é matú, Nadap, Abihu, Ele-aza eq Ihtama pé lé hkû byî ri. 24 Kora é yhang zo yùqzô pé gi, Asira, Elakana eq Abi-asap pé nghut akô; haú bang gi, Kora koq mâ é bang nghut akô. 25 Arun é yhang zo Ele-aza gi, Puhti-ala é yhang zo byìzo rayùq lé yu é nghut mù, haú yùq gi, yhâng é matú, Hpinehasa lé hkû byî ri. Haú bang gi, a-myû koq má cháng mù, Lewiq yhûmhtu pé mâ é gùnchyung pé nghut akô.
26 Shî Arun eq Mosheq gi, haû Yhûmsîng Garaî èq, “Isira-elaq byu pé lé, Egutuq ming mai yhángmòq é a-myû up má cháng mù shuî htoq lô keq.” ga taî é lé myang hkam yù su nhik nghut akô. 27 Yhángnhik gi, Isira-elaq byu pé lé Egutuq ming mai shuî htoq ló râ ga, Egutuq hkóhkâm Hpara-uq lé taí su nhik nghut akô; haú nhik gi, Mosheq eq Arun yhang nghut akô.
Mosheq é matú Arun dang taí byî é hkyô
28 Ahkuî, haû Yhûmsîng Garai, Mosheq lé Egutuq ming má dáng nyo é ayòq abun lé, 29 Yhang gi, Mosheq lé, “Ngò gi, Yhûmsîng Garai nghut lhê. Ngò, nang lé taî é dang bànshoq, Egutuq hkóhkam Hpara-uq lé taî kyo aq.” ga taî ri.
30 Nghut kôlhang, Mosheq gi, haû Yhûmsîng Garai lé, “Ngò gi, nhut shô lai sû nghut lhê mù, Hpara-uq gi, ngá é dang lé hkâsu lhom gyo byi râ lhú?” ga taî ri.