Hkówá A Wó É Za Tsohtung Saî É Hkyô
5
Hau htâng má, Mosheq eq Arun gi, Hpara-uq chyáng ê mù, “Isira-elaq é Garai Gasang, haû Yhûmsîng Garai taî le, ‘Ngá é byu pé, yòso má ê mù, Ngá é matú poî ê kut byi kó sháng gàq, yhángmòq lé nhang kat àq.’ gâ ri.” ga ê taî akô nghut ri.2 Hpara-uq gi, “Yhûmsîng Garai haû ó wá nghut mù, ngò, Yhâng é dang gyo luî, Isira-elaq byu pé lé nhang kat byi râ lhú? Yhûmsîng Garai haû lé ngò a sé; ngò gi, Isira-elaq byu pé lé nhang kat râ a nghut.” ga tû taî ri.
3 Haú hkûn, yhángnhik gi, “Hebre byu pê é Garai Gasang gi, ngá-mòq eq hui bê nghut lhê. Haû mù, Yhang gi, ngá-mòq lé, wúm èq, a nghut jáng, sham èq sat pyám lò âbe; ngá-mòq lé, sum nyí so hkyô wê é yòso shut ê nhâng mù, ngá-mòq é Garai Gasang nghut é, haû Yhûmsîng Garai lé hkungga ê nhông byi nhâng àq.” ga taî akô.
4 Nghut kôlhang, Egutuq byu pê é hkóhkâm gi, “Mosheq eq Arun ê, núngnhik gi, haî mù luî, a-myû shí bang lé, yhángmòq é múzó lhoqkyô byi kôrâ lhú? Taû ló mù, núngmòq é mú ló kut keq!” ga taî ri. 5 Haû htoq agó, Hpara-uq gi, “Wú keq, ahkuî, shí mau má nyi é a-myû shí bang gi, rajùm rayò yhang nghut bê; núngnhik gi, yhángmòq lé, mú a zui nhâng kut nyi akô nhung!” ga dum taî ri.
6 Haú nyí má yhang, Hpara-uq gi, ùp é jùnsîng pé eq a-myû haú lé wú gôn é bang lé, 7 “Núngmòq gi, a-myû shí bang lé, tsohtung saí râ matú hkówá hkâbyi lo kó; yhángmòq yhang, ó le ô é matú hkówá ê ho yù kó sháng gàq. 8 Nghut kôlhang, tsohtung lé gi, hí lhê myhó yhang saí nhâng ra râ nghut lhê; hkâ lhoqyôm nhâng kó; yhángmòq gi, lagon kôluî shèq, ‘Ngá-nhûng é Garai Gasang lé hkungga ê nhông byi sháng.’ ga wùt ngau bum akô nghut ri. 9 A-myû shí bang gi, mhaû é dang pé lé hká u a gyô nyì loshoq, mú zuî nyì kó sháng gàq, yhángmòq lé je lhoqhkyik lhoqngú nhâng keq.” ga hkunmó hkyô ri.
10 Haû mù, ùp é jùnsîng pé eq wú gon bang gi, htoq ê luî, a-myû haú bang lé, “Hpara-uq taî le, ‘Ngò gi, núngmòq lé hkówá a byi lo râ nghut lhê. 11 Ê mù, hká má nghut kôle, ó le ô é matú hkówá ê ho yù keq; nghut kôlhang, núngmòq kut é mú gi, ra-tsuí lháng ge lhoqyôm râ a nghut.’ gâ ri.” ga ê taî akô nghut ri. 12 Haû mù, a-myû wuì haú bang gi, Egutuq ra-mau gón, hkówá é malaî chûng râ matú hkô-ngut a-túm ahtâng lé ho tsîng yu akô nghut ri. 13 Haû jùnsîng pé gi, “Núngmòq hkówá wó é hkun lhê su, núngmòq lé nyí wuî kut nhang é mú lé lhoqpán râ dùt lhê.” ga, châng baú châng chyûn akô nghut ri. 14 Hpara-uq é jùnsîng pé gi, yhángmòq wò hun tô é, Isira-elaq byù mâ é wú gon bang lé, “Núngmòq gi, haî mù luî, anyí-nap le, hkû-nyí le, hí lhê su, núngmòq saí âng é tsohtung lé a ban saí kô é lhú?” ga dang htân taí luî, nhuq bàt akô nghut ri.
15 Haû mù, Isira-elaq byù mâ é wú gon bang gi, Hpara-uq chyáng ê jé kômù, “Nàng gi, haî mù luî, náng é duìnhâng zoshâng wuì ngá-mòq lé shí dông kut lhê lhú? 16 Náng é duìnhâng zoshâng wuì ngá-mòq lé, hkówá gi, a byi lo kó; nghut kôle, ‘Tsohtung saí keq.’ ga taî akô. Náng é duìnhâng zoshâng wuì ngá-mòq gi, nhuq bàt é huî nyi ri; nghut kôlhang, shut é gi, náng é byu pé shèq ru nghut ri.” ga ê taî akô nghut ri.
17 Hpara-uq gi, “Núngmòq lagon luî nghut ri; núngmòq lagôn akô! Haû mù shèq, núngmòq gi, ‘Yhûmsîng Garai lé hkungga ê nhông sháng.’ ga taî nyi bum akô nghut ri. 18 Ahkuî, mú ló zui keq. Núngmòq lé hkówá ra-tsuí le byi râ a nghut; nghut kôle, núngmòq saî pán râ é tsohtung lé gi, masàt tô é myhó saí byî nyì ra râ nghut lhê.” ga taî ri.
19 Haû Isira-elaq byù mâ é wú gon bang gi, “Núngmòq, nyí wuî saí âng é tsohtung lé a ge lhoqyôm râ nghut lhê.” ga lhom taî kat é yánmai, wuîhke jamjau mó huî bê nghut é hkyô lé sê gyo bekô nghut ri. 20 Yhángmòq gi, Hpara-uq chyáng mai htoq lô kô é hkûn, yhángmòq lé hui râ matú láng tô é Mosheq eq Arun lé huî akô nghut ri. 21 Haú hkûn, yhángmòq gi, yhángnhik lé, “Haû Yhûmsîng Garai gi, núngnhik lé wú mù, jéyáng sháng gàq! Núngnhik gi, ngá-mòq lé, Hpara-uq eq yhâng é zaugun wui hí má myìng hten nhâng mù, ngá-mòq lé sat râ matú, yhángmòq é lòq má shâm kat byi bekô nghut ri.” ga taî ri.
Hkyi Htoq Yû Râ Matú Garai Gasang Danghtum Htûm É Hkyô
22 Mosheq gi, haû Yhûmsîng Garaî chyáng dum taû ló mù, “Yhûmsîng Garai ê, Nàng gi, haî mù, byù shí bang lé wuîhke jamjau hkyô byî lhê lhú? Haî mù luî lhú? Hau é matú, Nàng, ngo lé nhang kat é lhú? 23 Ngò gi, Hpara-uq chyáng ê mù, Náng é myìng mai yhang lé ê nyo é hkûn mai yhang, yhang gi, byù shí bang lé wuîhke jamjau hkyô byi bê nghut ri; nghut kôle, Nàng gi, Náng é byu pé lé a hkyi xe yù shi nghut ri.” ga taî ri.