Htoq Ló 4

Mosheq É Matú Alhô Agàn Pé

Mosheq gi, “Yhángmòq, ngo lé a jíng kó, a nghut jáng, ngá é dang lé a gyo kô é za, ‘Haû Yhûmsîng Garai gi, nang lé a htoq shit.’ ga taí kô é nghut jáng, ngò hkâsu kut râ lhú?” ga tû taî ri.

2 Haú hkûn, haû Yhûmsîng Garai gi, “Náng é lòq má haî chung tô lhê lhú?” ga myî ri.

Haû jáng, yhang gi, “Dumbáng.” ga tû taî ri.

3 Haû Yhûmsîng Garai gi, “Haú lé myigùng má dú hkyô kat àq.” ga taî ri.

Mosheq gi, haú lé myigùng má hkyô kat jáng, haû gi, lhângmuì dùt byùq luî, yhang gi, haû mai hpang huî ló ri. 4 Hau htâng, Yhûmsîng Garai gi, yhang lé, “Náng é lòq lhâm kat mù, sho-myi mai she yù àq.” ga taî ri. Haû mù, Mosheq gi, lòq lhâm ê luî, lhângmuì lé ê zui jáng, lhângmuì haû gi, yhâng é lòqhkaû má dumbáng dum dùt byùq bê nghut ri. 5 Haû Yhûmsîng Garai gi, “Shî su kut jáng, Abraham é Garai Gasang, Isak é Garai Gasang eq Yakup é Garai Gasang nghut é, yhángmòq é îchyí îwâ pê é Garai Gasang, haû Yhûmsîng Garai, nang lé htoq shit bê hkyô lé, yhángmòq jíng kôrâ nghut lhê.” ga taî ri.

6 Hau htâng, Yhûmsîng Garai gi, “Náng é lòq lé, wànggàng bu hkaû má kat hâng kat àq.” ga taî ri. Haû mù, Mosheq gi, yhâng é lòq lé, yhâng é wànggàng bu hkaû má kat hâng kat mù, dum she htoq yu é hkûn, lòq sho-kuq gi, yàpjèq nòlì dàp byùq mù, gyo su hpyu byùq bê nghut ri.

7 Haû Yhûmsîng Garai gi, “Ahkuî, lòq lé, náng é wànggàng bu hkaû má dum kat hâng kat àq.” ga dum taî ri. Haû mù, Mosheq gi, yhâng é lòq lé, wànggàng bu hkaû má kat hâng kat mù, dum she htoq yu é hkûn, hí lhê su roq dum dùt bê nghut ri.

8 Hau htâng, Yhûmsîng Garai gi, “Nàng sânghi kut é làklaí alhô agàn lé, yhángmòq a jíng a gyo kô é nghut jáng, htang dàm kut é làklaí alhô agàn lé jíng kôrâ nghut lhê. 9 Nghut kôlhang, làklaí alhô agàn haû í lhum lé, yhángmòq a jíng a gyo kô é nghut jáng, Nile Wuìlàng mâ é wuì ra-tsuí hkam yù mù, kyuq huî é myigùng htoq má hut hkyô kat àq. Haú hkûn, wuìlàng mai nàng hkam yu é wuì gi, myigùng htoq má sui dut byùq râ nghut lhê.” ga taî ri.

10 Mosheq gi, haû Yhûmsîng Garai lé, “Yhûmsîng ê, Náng é duìnhâng zoshâng lé hkyâmsa byi shilaq. Ngò gi, laî ló bê hkûn le, ahkuî, Nàng, ngo lé dáng nyo é hkun mai le, hkâ-nhám lháng hkunhkyó yó sû a nghut. Ngò gi, nhut lai shô lai sû nghut lhê.” ga taî ri.

11 Haû Yhûmsîng Garai gi, yhang lé, “Xângzo byu pé lé, nhut ó tap byî é lhú? Yhángmòq lé, nhut jìt no jit nhang é gi, ó nghut lhê lhú? Yhángmòq lé, myòq myàng nhang é eq myòq jìt nhang é gi, ó nghut lhê lhú? Haû gi, Ngò, Yhûmsîng Garai nghut lhê, a nghut lhí? 12 Ahkuî e ló aq; nàng dáng nyo é má Ngò garúm yû râ; nàng haî taí râ lé Ngò mhoq byi râ nghut lhê.” ga taî ri.

13 Nghut kôlhang, Mosheq gi, “Yhûmsîng ê, Náng é duìnhâng zoshâng ngo lé hkyâmsa byi shilaq. Jeju mai, góyùq lé shèq nhâng àq.” ga taî ri.

14 Haú hkûn, haû Yhûmsîng Garai gi, Mosheq lé nhik-yo naû mù, “Nàng gi, nungmang Lewiq byù Arun wó lhê, a nghut lhí? Yhang gi, dang dàt nyò sû nghut é lé Ngò sê lhê. Yhang gi, nang lé, lé hui râ ga hkyô má lé lo nyì bê nghut mù, nang lé myàng jáng, yhang gabú râ nghut lhê. 15 Nàng gi, yhang lé lhom nyò mù, yhâng é nhut má dang pé kat byi ra râ nghut lhê; Ngò gi, núngnhik dáng nyo é má garúm yû râ; núngnhik haî taí râ lé mhoq byi râ nghut lhê. 16 Yhang gi, náng é matú byu pé lé dang nyô byi râ nghut mù, yhang gi, náng é nhut dùt byi mù, nàng gi, yhâng é matú, Garai Gasang dông dùt râ nghut lhê. 17 Hau htoq agó, nàng gi, dumbáng shi èq làklaí alhô agàn wó kut sháng gàq, dumbáng shî lé náng é lòq má chung to aq.” ga taî ri.

Egutuq Ming Shut Mosheq Taû Ló É Hkyô

18 Haû mù, Mosheq gi, yhâng tsa Yehtiro chyáng taû ló mù, yhang lé, “Egutuq ming má nyi é ngá é a-myû suisho wuì gi, chyungxe dui nyi bum ashi kô làq, ló wú râ matú, ngo lé taû ló nhâng àq.” ga taî ri.

Yehtiro gi, “Ngón za taû ló aq.” ga tû taî ri.

19 Haû Yhûmsîng Garai gi, Midi-an mau má, Mosheq lé, “Egutuq ming má taû ló aq; hkâsu mù gâ le, nang lé sat nau é bang bànshoq shi byùq bê nghut ri.” ga taî ri. 20 Haû mù, Mosheq gi, yhâng yhûmsîng myhí eq yhang zô nhiktâng lé shuî yù mù, loze má ji nhâng luî, Egutuq ming shut htoq e ló bekô nghut ri. Yhang gi, Garai Gasâng é dumbáng lé le, yhâng é lòq má chung tô ri.

21 Haû Yhûmsîng Garai gi, Mosheq lé, “Egutuq ming má nàng taû jé ló é hkûn, Ngò, nang lé a-tsam byi luî, kut nhang é maúhpo múzó pé bànshoq lé, Hpara-uq é hí má kut shit àq. Nghut kôlhang, Ngò gi, a-myû haú lé, yhang a nhang kat shirâ matú, yhâng é i-myìt nhiklhum lé lhoqhtan to râ nghut lhê. 22 Haú hkûn, Hpara-uq lé, ‘Haû Yhûmsîng Garai taî le, “Isira-elaq gi, Ngá é zo-mún nghut lhê; 23 haû mù, Ngò, nang lé, ‘Ngo lé ê wó noqkuq sháng gàq, Ngá zo lé nhang kat àq.’ nghû taî bê nghut lhê. Nghut kôlhang, nàng gi, haú lé he-ngìk pyám luî, yhang lé a nhang kat nghut ri; haû mù, Ngò gi, náng é yùqzo zo-mún lé sat pyám râ nghut lhê.” gâ ri.’ nghû taí aq.” ga taî ri.

24 Hkyôwuì má nghut nyi é hkûn, Mosheq ló bíng é jang má, haû Yhûmsîng Garai gi, yhang lé hui mù, sat pyám râ haq htung ri. 25 Nghut kôlhang, yhang myi Zihpora gi, paihpoi lùq shâmhto lé yù mù, yhang zô é ahpyo-kuq hpyit yû luî, Mosheq é hkyî má ê záng byi mù, “Gè gè yhang, nàng gi, ngá é matú sui dap yùqgè nghut ri.” ga taî ri. 26 Haû mù, haû Yhûmsîng Garai gi, Mosheq lé lhut to bê nghut ri. Zihpora gi, “Sui dap yùqgè.” ga taî é hkûn, ahpyo-kuq hpyit hkyô lé taí nau é nghut ri.

27 Haû Yhûmsîng Garai gi, Arun lé, “Yòso má ê mù, Mosheq lé ê hui aq.” ga taî ri. Haû mù, Arun gi, Garai Gasâng é bùm má Mosheq lé ê hui mù, yhang lé bo-puq puq byî ri. 28 Haú hkûn, Mosheq gi, haû Yhûmsîng Garai, yhang lé taí nhang é dang lhúnglháng eq hkunmó hkyô é dông kut nhang é làklaí alhô agàn hkyô bànshoq lé taî kyô ri.

29 Mosheq eq Arun gi, Isira-elaq byu pê é sûwún wuî bànshoq lé shuî tsîng yù mù, 30 haû Yhûmsîng Garai mai Mosheq lé taî é gû lhúnglháng lé Arun taî kyô ri. Mosheq le, a-myû wui é hí má làklaí alhô agàn pé kut shit é nghut luî, 31 yhángmòq gi, lùmjíng bûm bekô nghut ri. Yhángmòq gi, haû Yhûmsîng Garaî èq, yhángmòq lé myìt chiq byî nyi é hkyô lé le, yhángmòq hpû nyì shô nyi é lé myàng byi bê hkyô lé le, wó gyo kôjáng, ngóm gòp mù, noqkuq akô nghut ri.