Mosheq Eq Myi Duq Nyi É Mhanpúng
3
Ahkuî, Mosheq gi, yhâng tsa Yehtiroa gâ é Midi-an byu pê é hkyangjong hpô é sau bainám hpúng pé zúng ri; yhang gi, sau bainám hpúng pé lé, tû tap yòso shut kôn e é nghut mù, haû Garai Gasâng é bùm nghut é Horep bùmb má ê jé ri. 2 Haú má, haû Yhûmsîng Garaî é maumang lagyo gi, yhang lé, mhanpúng hkaû mai dùq htoq nyi é myishâm má, lé htoq shit ri. Mosheq gi, mhanpúng má myi duq nyî kôlhang, mhanpúng haû a nyé gyó byùq é lé myang ri. 3 Haû mù, Mosheq gi, “Haî mù mhanpúng hê a nyé gyó é lhú? Maúhpo hkyô hê lé ngò ê wú wú bá.” ga myìt yu ri.4 Haû Yhûmsîng Garai gi, yhang ê wú râ ga e ló é lé myàng jáng, Garai Gasang gi, mhanpúng hkaû mai, “Mosheq! Mosheq!” ga yhang lé wùt kat ri.
Haú hkûn, Mosheq gi, “Ngò shî má nyi lhê.” ga tû taî kat ri.
5 Garai Gasang gi, “Hkâchyâng htèp lé lo; náng é hkyî-tsung hkyut pyám aq; hkâsu mù gâ le, haû nàng yàp tô é jowò gi, chyoiyúng é jowò nghut lhê.” ga taî ri. 6 Hau htâng, Yhang xoq taî é gi, “Ngò gi, náng wâ é Garai Gasang, Abraham é Garai Gasang, Isak é Garai Gasang eq Yakup é Garai Gasang nghut lhê.” gâ ri. Haû su ga jáng, Mosheq gi, Garai Gasang lé a wám wú é yánmai, yhâng é myòqdong lé nghop pyâm ri.
7 Haû Yhûmsîng Garai gi, “Ngò, Egutuq ming má nyi é Ngá é byu pé asho awui hpuzô nyì kô é hkyô lé gè gè yhang myàng byi bê nghut lhê. Yhángmòq lé ùp é jùnsîng pê é yánmai, yhángmòq hpuzô é ngaùhkyûng ngaùyang htê lé, Ngò wó gyo byi bê nghut luî, yhángmòq hpu hkê nyi é hkyô lé, Ngò myìt tê byî lhê. 8 Haû mù, Ngò gi, Egutuq byu pê é lòq mai yhángmòq lé hkyi yù mù, maumyî haû mai yhángmòq lé shuî htoq ló luî, Hkanan byù, Hiti byù, Amori byù, Perizi byù, Hiwi byù eq Yebusi byu pé nyi é, myìhpún bo é eq mau dâm làm nghut é, byo-î eq no-naú yui é mau má shuî ló râ matú gyó lé é nghut lhê. 9 Wú aq, Isira-elaq byu pê é ngaùhkyûng ngaùyang htê gi, Ngá chyáng jé hkyâng bê nghut ri; yhángmòq lé, Egutuq byu pê èq hkâsu kut zìk zo zìk shuq nyi é lé Ngò myàng bê nghut lhê. 10 Haû mù, nàng, ahkuî e ló aq. Ngò gi, nang lé, Ngá é byù nghut é Isira-elaq byu pé lé, Egutuq ming mai ê shuî htoq lô râ matú, Hpara-uq chyáng nhang kat lhê.” ga taî ri.
11 Nghut kôlhang, Mosheq gi, Garai Gasang lé, “Ngò gi, hkâsû é byù wá nghut luî, Hpara-uq chyáng ê mù, haû Isira-elaq byu pé lé, Egutuq ming mai ê wó shuî htoq lô râ lhú?” ga taî ri.
12 Haú hkûn, Garai Gasang gi, “Ngò, nàng eq rahá nghut nyî râ nghut lhê. Hau htoq agó, Ngò, nang lé nhang kat é masàt lhô gi, shí dông nghut râ nghut lhê; Nàng gi, byù haú bang lé, Egutuq ming mai shuî htoq yu é hkûn, bùm shî má, Garai Gasang lé noqkuq râ nghut lhê.” ga taî ri.
13 Mosheq gi, Garai Gasang lé, “Dangtú, ngò gi, haû Isira-elaq byu pê chyáng ê jé mù, yhángmòq lé, ‘Haû núngmòq é îchyí îwâ pê é Garai Gasang gi, ngo lé, núngmòq chyáng nhang kat ri.’ nghû taî kyo jáng, yhángmòq gi, ngo lé, ‘Yhang é myìng haî gâ ri lhú?’ ga lhom myi kôjáng, ngò gi, yhángmòq lé hkâsu nghû taî kyo râ lhú?” ga taî ri.
14 Garai Gasang gi, Mosheq lé, “Ngò nghut nyi é eq rajung za ‘Ngò nghut lhê.’ Nàng gi, haû Isira-elaq byu pé lé, ‘Ngò nghut lhê gá Su èq, ngo lé, núngmòq chyáng nhang kat ri.’ nghû taí ra râ nghut lhê.” ga taî ri.
15 Hau htoq agó, Garai Gasang gi, Mosheq lé, “Isira-elaq byu pê chyáng, ‘Haû Yhûmsîng Garaic, núngmòq é îchyí îwâ pê é Garai Gasang, Abraham é Garai Gasang, Isak é Garai Gasang eq Yakup é Garai Gasang gi, ngo lé núngmòq chyáng nhang kat ri.’ nghû ê taí aq.
Haû gi, ahtum abyùq é Ngá myîng nghut nyi lhê;
myìng haú lé gi, pyàt bán hkangmó bûn nyì kôrâ nghut lhê.
16 E ló aq; Isira-elaq byu pê é sûwún wuî lé ê ji tsing luî, yhángmòq lé, ‘Núngmòq é îchyí îwâ pé é Garai Gasang, Abraham, Isak eq Yakup pê é Garai Gasang nghut Sû, haû Yhûmsîng Garai gi, ngo lé htoq shit luî, “Ngò gi, núngmòq lé lé kûm wú mù, núngmòq lé Egutuq ming má kut kô é hkyô lé myàng bê nghut lhê. 17 Ngò gi, Egutuq ming má núngmòq hpu hkê nyi é mai, núngmòq lé shuî htoq ló luî, Hkanan byù, Hiti byù, Amori byù, Perizi byù, Hiwi byù eq Yebusi byu pé nyi é, byo-î eq no-naú yui é mau má shuî ló râ matú danghtum htûm to bê nghut lhê.” ga taî ri.’ nghû taí aq.
18 Haû Isira-elaq byu pê é sûwún wuî gi, náng é dang lé lhom gyo byi râ nghut lhê. Haû mù, nàng eq sûwún wuî haú bang gi, Egutuq hkóhkam chyáng ê mù, yhang lé, ‘Hebre byu pê é Garai Gasang, haû Yhûmsîng Garai gi, ngá-mòq eq hui bê nghut lhê. Haû mù, ngá-mòq lé, yòso shut sum nyí hkyô sô ê nhâng luî, ngá-mòq é Garai Gasang, haû Yhûmsîng Garai lé hkungga ê nhông byi nhâng laq.’ nghû ê taí keq. 19 Nghut kôlhang, Egutuq ming mâ é hkóhkâm gi, a-tsam mó bo é lòq èq zìk huî é za a nghut jáng, núngmòq lé nhang kat râ a nghut é hkyô lé, Ngò sê lhê. 20 Haû mù, Ngò gi, Ngá é lòq lé lhâm kat luî, Egutuq ming má Ngò kut râ nghut é maúhpo múzó hkyô bànshoq dông mai, yhángmòq lé lhoqhkyop pyám râ nghut lhê. Hau htâng má shèq, yhang gi, núngmòq lé nhang kat râ nghut lhê.
21 Ngò gi, byù shí bang lé, Egutuq byu pê é hí má myòqdong wó nhâng râ nghut mù, núngmòq gi, htoq ló é hkûn, lòq kôm dùt kôrâ a nghut. 22 Myiwe yùq hkangmó gi, yhâng é yhûmkyo myhí eq yhâng yhûm má nyi é myiwe myhî chyáng mâ é ngùn zèhkoq, hîng zèhkoq eq bumê pé dûng yù mù, núngmòq é yhang zo byìzo yùqzô pé lé hut kôrâ nghut lhê. Haû mù, núngmòq gi, Egutuq byu pê é zè chyut wó lú sing yù pyám kôrâ nghut lhê.” ga taî ri.