Dinggám Dam Hpuzô É Hkyô
10
Hau htâng, haû Yhûmsîng Garai gi, Mosheq lé, “Hpara-uq lé ê hui aq; Ngò gi, yhángmòq chyáng Ngá é làklaí alhô agàn shí pé wó kut shit sháng gàq nghû, yhâng é i-myìt lé le, yhâng é zaugun wui é i-myìt lé le lhoqhtan to byî é ru nghut lhê. 2 Hau htoq agó, nàng le, náng é zodù wuì eq náng é gashû pé le, Ngò, Egutuq byu pé lé hká dông htân htân kut é hkyô eq yhángmòq chyáng Ngá é làklaí alhô agàn hká dông kut shit é hkyô wó taî kyo râ matú le, Ngò gi, haû Yhûmsîng Garai nghut é hkyô lé núngmòq wó sé râ matú le nghut lhê.” ga taî ri.3 Haû mù, Mosheq eq Arun gi, Hpara-uq chyáng ê mù, yhang lé, “Hebre byu pê é Garai Gasang, haû Yhûmsîng Garai taî le, ‘Nàng gi, Ngá é hí má myìt lhoqnyhûm râ matú, hkâ-myháng jé shoq he-ngìk nyì râ lhú? Ngá é byu pé gi, Ngo lé wó noqkuq kó sháng gàq, yhángmòq lé nhang kat àq. 4 Yhángmòq lé nhang kat râ lé, nàng he-ngìk pyâm é nghut jáng, Ngò gi, nàpmá, náng é ming má dinggám nhang kat râ nghut lhê. 5 Haú pé gi, myigùng lháng a myàng loshoq myì htoq lé nghop pyám râ nghut lhê. Haú pé gi, núngmòq wó tô é, lìkwò gyó htâng má ra-tsuí zo myìt tô é bànshoq lé le, núngmòq é yò pé má yùq tô é sikgâm hkangmó lé le, zô pyám kôrâ nghut lhê. 6 Núngmòq é îchyí îwâ pé nghut nghut, núngmòq é mó wuî nghut nghut, shí mau má lé nyi é mai hkû-nyí jé shoq a myang wú wú kô é, dinggám haú jûm gi, náng é yhûm má le, náng é zaugun wui é yhûm má le, Egutuq byù bànshoq bâng é yhûm má le, byíng zan to râ nghut lhê.’ gâ ri.” ga taî ri. Hau htâng, Mosheq gi, Hpara-uq chyáng mai nùnghtáng lhik mù htoq ló bê nghut ri.
7 Hpara-uq é zaugun wuì gi, Hpara-uq lé, “Byù shí yùq gi, hkâ-myháng jé shoq ngá-nhûng é matú dumzo dùt nyì râ lhú? Yhángmòq é Garai Gasang nghut é, haû Yhûmsîng Garai lé ê wó noqkuq kó sháng gàq, byù haú bang lé nhang kat àq. Egutuq ming htên byòq byùq bê lé nàng a sé shi lhî?” ga taî akô nghut ri.
8 Haû mù, Mosheq eq Arun lé Hpara-uq chyáng shuî lò kôjáng, Hpara-uq gi, “Núngmòq é Garai Gasang nghut é, haû Yhûmsîng Garai lé ê noqkuq keq; nghut kôlhang, ô pé ê râ nghut é lé taî kyô wú keq.” ga taî ri.
9 Mosheq gi, “Ngá-mòq ê jáng, haû Yhûmsîng Garaî é hí má poî ê kut râ nghut é yánmai, ngá-mòq é mangzo mang-aû zojí zoshâng wuì, ngá-mòq é yùqzo byìzô pé, ngá-mòq é sau bainám pé eq no myang pé bànshoq ê râ nghut lhê.” ga taî ri.
10 Hpara-uq gi, “Ngò, núngmòq eq rahá núngmòq é myiwe zoshâng wuì lé nhang kat é nghut jáng, haû Yhûmsîng Garai gi, núngmòq eq rahá nghut nyî sháng gàq! Sidìq keq! Núngmòq gi, myìt goí bò bang ru nghut ri myhî-nhung. 11 Bànshoq bang a ge ê! Yùqgè wuì za ê mù, haû Yhûmsîng Garai lé ê noqkuq keq; haû gi, núngmòq dûng nyi é hkyô yhang nghut bê.” ga taî ri. Haû mù, Hpara-uq é hí mai Mosheq eq Arun lé hkat htoq kat bekô nghut ri.
12 Haú hkûn, haû Yhûmsîng Garai gi, Mosheq lé, “Dinggám pé gi, Egutuq ra-ming gón má htoq jé lé mù, yò pé má yùq é jung hkangmó lé le, lìkwo èq bàt hkyut myhit tô é jung hkangmó lé le, zô myhui pyám râ matú, náng é lòq lé Egutuq ming htoq má lhâm kat àq.” ga taî ri.
13 Haû mù, Mosheq gi, yhâng é dumbáng lé Egutuq ming htoq má lhâm kat jáng, haû Yhûmsîng Garai gi, ra-mau gón má ra-nyí buìgyùm chap, ra-myin mau yhang, buìhtoq laì mùt nhang ri. Htang nàpkyó gi, laì haû mai dinggám jûm jé lô bê nghut ri. 14 Dinggám jûm gi, Egutuq ra-ming gón má htîm wàng luî, ra-ming gón é jowò hkangmó má ajùm ayò byíng zan to bê nghut ri. Haû sû é dinggám wúm gi, hí hpyang hkâ-nhám le a jòq wú, htâng má le dum jòq râ a nghut. 15 Haú pé gi, myigùng htoq bànshoq lháng nòq byùq shoq nghop pyám bekô nghut ri. Haú pé gi, lìkwo èq bàt htâng má myìt gyó tô é, yò pé má yùq é jung hkangmó lé le, sikgâm pé mâ é shi pé lé le, bànshoq zô myhui pyám bê nghut ri. Egutuq ming gón mâ é sikgâm eq mhan-haq hpoqnòq pé má nyui é haî lháng a dàp to lo nghut ri.
16 Hpara-uq gi, Mosheq eq Arun lé hân hân wùt yù mù, “Ngò gi, núngnhik é Garai Gasang nghut é, haû Yhûmsîng Garai lé le, núngnhik lé le shut bê nghut ri. 17 Ahkuî, ngo lé mara radàm dum hkyut byi mù, ngá chyáng mai, shi htên byùq ló é wúm shî lé yu pyám byi râ matú, núngnhik é Garai Gasang nghut é, haû Yhûmsîng Garaî chyáng kyû bo dung byi keq.” ga taî ri.
18 Haú hkûn, Mosheq gi, Hpara-uq chyáng mai htoq ló luî, haû Yhûmsîng Garai lé kyûdûng ri. 19 Haû mù, haû Yhûmsîng Garai gi, htan dik é buìwàng hkyam mâ é laì lé lò nhâng mù, dinggám haú pé lé mùt tâng yù luî, Nhông Nè má mùt hkyô hâng pyám mù, Egutuq ming mâ é jowò hká má lháng radu le a myìt gyó to lo nghut ri. 20 Nghut kôlhang, haû Yhûmsîng Garai gi, Hpara-uq é myìt lé lhoqhtan to byî é nghut mù, yhang gi, Isira-elaq byu pé lé a nhang kat shi nghut ri.
Mauchut Tuq Dùt É Dam Hpuzô É Hkyô
21 Haû Yhûmsîng Garai gi, Mosheq lé, “Egutuq ming má, lòq èq lháng wó záng sop shoq í mu é, mauchut tuq dùt byùq sháng gàq, náng é lòq lé maulat shut lhâm kat àq.” ga taî ri. 22 Haû mù, Mosheq gi, yhâng é lòq lé maulat shut lhâm kat jáng, Egutuq ra-ming gón má, sum nyí yhang mauchut tuq dùt byùq bê nghut ri. 23 Haû mù, rayùq eq rayùq le a myang lhûm é htoq agó, sum nyí yhang ó le ô é jowò mai a wó htòt dùt byùq akô nghut ri. Nghut kôle, Isira-elaq byu pé nyi é jowò pé má gi, myòq myang akô nghut ri.
24 Haú hkûn, Hpara-uq gi, Mosheq lé ji yù mù, “Haû Yhûmsîng Garai lé ê noqkuq keq. Núngmòq é myi zo wuì le, núngmòq eq rahá bo ê kó sháng gàq; núngmòq é sau bainám pé eq no myang pé lé za nyhi to keq.” ga taî ri.
25 Nghut kôlhang, Mosheq gi, “Nàng, ngá-mòq lé, ngá-mòq é Garai Gasang nghut é, haû Yhûmsîng Garai lé ê nhông byi râ matú, hkungga pé eq myi nyhé hkungga pé lé yu ê nhâng ra râ nghut lhê. 26 Ngá-mòq é shigu gaunyhaú pé le, ngá-mòq eq rahá cháng ra râ nghut lhê; hkôdòq ralhum lháng ge myhit to râ a nghut. Haú pé mâ é ra-am lé gi, ngá-mòq é Garai Gasang, haû Yhûmsîng Garai lé noqkuq é má chûng râ nghut lhê; nghut kôle, haû jowò má a jé jé gi, Yhûmsîng Garai lé noqkuq é hkûn hká pé lé chûng râ lé, ngá-mòq a sé shî é nghut lhê.” ga taî ri.
27 Nghut kôlhang, haû Yhûmsîng Garai gi, Hpara-uq é myìt lé lhoqhtan to byî é nghut mù, yhang gi, yhángmòq lé a kâm nhang kat nghut ri. 28 Haû mù, Hpara-uq gi, Mosheq lé, “Ngá hí mai htoq ló byùq àq! Ngá hí má a dum htoq shit loshoq sidìq nyì àq! Nàng, ngá é myòqdong lé myang é buìnyì má gi, shî râ nghut lhê.” ga taî ri.
29 Haú hkûn, Mosheq gi, “Nàng taî é eq rajung za, ngò, náng é hí má hkâ-nhám le dum htoq shit râ a nghut lo.” ga tû taî ri.