Garai Gasang, No-aq Eq Dangshikaq Tô É Hkyô
9
Garai Gasang gi, No-aq eq yhang zô nhiktâng wuì lé shimân byî ri; shimân dang haû gi, “Zo myo myhû mù, byù du myô jàt luî, myìdàm htoq má byíng mui e ló keq. 2 Myigùng htoq mâ é gaunyhaú bànshoq, maulat má dâng é nghoqzô pé bànshoq, myigùng htoq má dô é yê é jung hkangmó eq wuìshuq lung-aû má nyi é ngozô pé bànshoq gi, núngmòq lé gyùq chiq gyùq nán kôrâ; yhángmòq lé núngmòq é lòq má àp to byi bê nghut lhê. 3 Kângsoq duì mù, dui lû wún é jung hkangmó gi, núngmòq é matú zoshuq dùt râ nghut lhê. Ngò gi, núngmòq lé, nyui yúng mhan-haq hpoqnòq eq shi pé lé byî é su, ahkuî, Ngò, jung hkangmó lé, núngmòq lé byî lhê.4 Nghut kôlhang, sho má, kângsoq bo é sui rû bo to to gi, núngmòq, sho haú lé ge zo râ a nghut. 5 Ngò gi, teng za núngmòq é kângsoq sui yui chyîn but râ nghut lhê. Gaunyhaú hkangmó lé le bùt râ. Ngò gi, byù yùq hkangmó lé le, yhâng é gu-mang gu-nhá wui é chyungxe sui yui chyîn but râ nghut lhê.
6 Ó yùq nghut kôle, byu é sui lé lhoqhtoq pyâm é nghut jáng,
yhâng é sui lé le, byu èq lhoqhtoq pyám râ nghut lhê;
hkâsu mù gâ le, Garai Gasang gi, Yhâng é gùng zòng alhô eq
dù shoq xângzo byù lé hpan tô é nghut lhê.
7 Núngmòq gi, zo myo myhû mù, byù du myô jàt keq; myìdàm htoq má gyai yhang myô jàt lò mù, haú má myoluq jebe nyì keq.” gâ ri.
8 Hau htâng, Garai Gasang gi, No-aq lé le, yhang eq rahá nghut nyi é yhang zô nhiktâng wuì lé le, 9-10 “Ngò gi, ahkuî, nàng eq le, náng chyáng mai nyi lò râ nghut é, náng é awùt ashín pé eq le, núngmòq eq rahá wuìsanghpo mai htoq lo é, myìdàm htoq má nyi é dui jung hkangmó nghut é, nghoqzô pé, shigu gaunyhaú pé eq tân jung gaunyhaú bànshoq, haû núngmòq eq rahá nghut nyi é dui jung hkangmó eq le, Ngá é dangshikaq tô lhê. 11 Ngò, núngmòq eq tô é Ngá é dangshikaq gi, htângnùng má, hkâ-nhám le, kângsoq dui é lhúnglháng lé, dôwui èq dum lhoqhtûm pyám râ a nghut lo; htângnùng má, hkâ-nhám le, myìdàm lé lhoqhten râ dowuî dum tíng râ a nghut lo nghu é nghut lhê.” ga taî ri.
12 Hau htâng, Garai Gasang gi, “Núngmòq eq le, núngmòq eq rahá nghut nyi é dui jung hkangmó eq le, htâng má nyi lé lô râ pyàt bán bànshoq é matú, Ngò tô é dangshikaq masàt alhô agàn gi, shí dông nghut lhê. 13 Ngò gi, Ngá é wòqgan síng-yang lé, mhut hkaû má tô to bê; haû gi, Ngò eq myìdàm htoq é gyoro mâ é dangshikaq é masàt alhô agàn dùt râ nghut lhê. 14 Ngò, myìdàm htoq má mhut nghop mau zaú nhâng hkangmó, mhut hkaû má wòqgan síng-yang htoq shit râ nghut lhê. 15 Haú hkûn, Ngò gi, núngmòq eq le, kângsoq bo é dui jung lhúnglháng eq le, Ngò tô tô é dangshikaq lé myìtbun râ nghut lhê. Haû mù, hkâ-nhám le, wuì pé gi, dowuî dùt mù, kângsoq dui é lhúnglháng lé dum lhoqhten râ a nghut lo. 16 Mhut hkaû má, wòqgan síng-yang haû htoq shit hkangmó, Ngò gi, haú lé myang mù, Garai Gasang eq myìdàm htoq mâ é kângsoq bo é dui jung lhúnglhâng é gyoro má tô tô é, ahtum abyùq é dangshikaq haú lé myìtbun râ nghut lhê.” ga taî ri.
17 Haû mù, Garai Gasang gi, No-aq lé, “Haû gi, Ngò eq myìdàm htoq mâ é kângsoq bo é lhúnglhâng é gyoro má, Ngò tô tô é dangshikaq masàt alhô agàn nghut lhê.” ga taî ri.
No-aq É Yhang zô Pé
18 Wuìsanghpo mai htoq lo é, No-aq é yhang zô pé gi, Shem, Ham eq Yahpet pé nghut akô. (Ham gi, Hkanân é yhâng wa nghut ri.) 19 Shi bang gi, No-aq é yhang zô pé sum yuq nghut ri; myìdàm htoq má nyi byo myín tô é byu pé gi, yhángmòq mai nyi gyó lo é bang chyat nghut ri.
20 No-aq gi, yò saí zo sû nghut mù, tsibyiq yô rahkyang saî ri. 21 Yhang gi, tsibyiq wing shuq wùt byùq luî, yhâng é zúm hkaû má gùngchîn lèq tô ri. 22 Hkanân é yhâng wa Ham gi, yhâng wa gùngchîn nghut nyi é lé myàng mù, shinggan má nyi tô é yhang gu yhang mang lé taî kyô ri. 23 Nghut kôlhang, Shem eq Yahpet nhiktâng gi, buhîng radung yù mù, yhángnhik é gòqsân htoq má ke luî, nùngzut zùt ê mù, yhángnhik yhâng wâ é gùngchîn lé nghop byî akô. Yhángnhik gi, yhángnhik yhâng wâ é gùngchîn lé a myàng kó sháng gàq ga, yhángnhik é myòqdong lé góshut lhing pyâm akô nghut ri.
24 No-aq gi, yhang tsibyiq wing nâ é mai gyîng lo é hkûn, yhâng ahtoq má, yhang zo je tiq sû yùq hkâsu kut laî é hkyô lé wó sê ri. 25 Haû mù, “Hkanan gi,
dâkam pyâm é hui sháng gàq!
Yhang gu yhang mâng pê é,
jun htoq jùn dùt nyì râ nghut lhê.” ga yhang taî ri.
26 Hau htoq agó, yhang gi,
“Shem é Garai Gasang, haû Yhûmsîng Garai gi, hkungsô wó nyî sháng gàq!
Hkanan gi, Shem é jùna dùt nyì sháng gàq.
27 Garai Gasang gi, Yahpet é maumyî lé lhoqlâm byi sháng gàq;
Yahpet gi, Shem é zúm pé má nyì sháng gàq;
Hkanan gi, yhâng é jùnb dùt sháng gàq.” ga taî ri.