8
Nghut kôlhang, Garai Gasang gi, No-aq lé le, tân jung gaunyhaú bànshoq lé le, yhang eq rahá haû wuìsanghpo má nyi tô é shigu gaunyhaû pé lé le, myìtbûn ri; haû mù, Yhang gi, myìdàm htoq má laì lé nhang kat jáng, wuì gi, yom ló nyî bê nghut ri. 2 Ahkuî, nìk é wuìbúm pé eq mauhkûng dowuî hkum pé lé myhî pyâm bê nghut mù, maulat mai mau a wo byùq lo nghut ri. 3 Haû wuì gi, myìdàm htoq mai yòm shèq yom ló mù, 150 nyí nyí má gi, wuì yom gyó ló bê nghut ri. 4 Haû wuìsanghpo gi, lha-mó nyhit hkyap hkyap, raxe nyhit nyí nyí lé, Ararat bùm htoq má kê gyam to bê nghut ri. 5 Haû wuì gi, raxê hkyap hkyap jé shoq xoq xoq yom gyó ló mù, raxê hkyap é sânghî nyí má, bùm nyuq pé htoq ze lò bê nghut ri.6 Buìnyì myi xê nyí dum laî é htâng má, No-aq gi, yhang saî é wuìsanghpo mâ é hkohot lé hpóng luî, 7 nghoqnòq radu lé nhang htoq kat ri; nghoqnòq haû gi, myìdàm htoq mai wuì kân byùq é hkûn jé shoq dâng ê dâng lò kut wún ri. 8 Hau htâng, yhang gi, myigùng htoq mai wuì yom byùq a yom byùq é lé ê wú râ matú, hpûngkyui radu lé le nhang kat ri. 9 Nghut kôlhang, hpûngkyui haû gi, myìdàm htoq gón má wuì díng tô ashî nghut é yánmai, yhâng é hkyî nang jang a myang hô nghut ri; haû mù, yhang gi, wuìsanghpo hkaû má nyi tô é No-aq chyáng dum dâng taû ló ri. No-aq gi, yhâng é lòq lhâm kat mù, wuìsanghpo hkaû shut, hpûngkyui lé lhom chyup hâng yu ri. 10 Yhang gi, nyhit nyí dum láng yû mù, wuìsanghpo mai hpûngkyui haú du lé dum nhang kat ri. 11 Myínhtâng lé, hpûngkyui haû, yhâng chyáng dum dâng taû lo é hkûn, jum jum za htê hpyit yu é tsanlun haq lé, yhâng é nhut má htê zing tô ri. Haû mù, No-aq gi, myìdàm htoq mai wuì yom byùq bê nghut é hkyô lé sé bê nghut ri. 12 Yhang gi, nyhit nyí dum láng yû mù, hpûngkyui haú du lé dum nhang htoq kat ri; nghut kôle, shí dâm gi, hpûngkyui haû, yhâng chyáng a dum taû lò lo nghut ri.
13 No-aq é chyungxe zànwut 601 zan zàn, lha-mó sânghî hkyap, sânghî nyí má, myìdàm htoq mai wuì haû kân ló byùq bê nghut ri. No-aq gi, wuìsanghpo hkûnghpaú lé hî pyám mú, wú kat é hkûn, myigùng kyuq huî byùq bê nghut é hkyô lé myang kat ri. 14 Lha-mó í hkyap hkyap, 27 nyí nyí má, myìdàm htoq gi, bànshoq yhang kyuq huî byùq bê nghut ri.
15 Haú hkûn, Garai Gasang gi, No-aq lé, 16 “Nàng le, náng é yhûmsîng myhí le, nungzô pé eq yhángmòq é yhûmsîng myhî pé le, wuìsanghpo mai htoq lô keq. 17 Nàng eq rahá nghut nyi é dui jung nghut é nghoq pé, gaunyhaú pé eq, myigùng htoq má dô yê é dui jung hkangmó lé shuî htoq lô àq; haú hkûn, yhángmòq gi, myìdàm htoq má azo myo myo shui luî, myoluq jebe kôrâ nghut lhê.” ga taî ri.
18 Haû mù, No-aq gi, yhâng yhûmsîng myhí, yhang zô pé eq yhang zô pê é yhûmsîng myhî pé eq rahá, htoq lô bê nghut ri. 19 Myìdàm htoq má dui lùp wún jung nghut é, gaunyhaû pé bànshoq, myigùng htoq má dô yê é dui jung bànshoq eq nghoqzô pé bànshoq gi, ra-myû htâng ra-myû, wuìsanghpo mai htoq lo bùm bekô nghut ri.
20 Haú hkûn, No-aq gi, haû Yhûmsîng Garaî é matú, kaúgyàp ralhum saí mù, sansêng é gaunyhaú bànshoq eq nghoqzô pé mai, ra-am lé hkyin htoq yû luî, kaúgyàp htoq má myi nyhé hkungga nhông byî ri. 21 Haû Yhûmsîng Garai gi, namngón é shôm lé nam yù mù, Yhâng é i-myìt má, “Ngò gi, byu pé, zoshâng hkûn mai ashop é myìt bò bang nghut kôle, yhángmòq é yánmai, myìdàm htoq lé dum nhîng pyám râ a nghut lo. Hau htoq agó, Ngò gi, ahkuî za kut é su, kângsoq bo é dui jung bànshoq lé dum lhoqhtûm pyám râ a nghut lo.
22 Myìdàm ru gîng nyì nyì gi,
kyô hkyó kyô shu yòq,
gyòq é nyé é hkyíng,
buì lúm nám eq gyòq nám,
nyí eq myín nghu é,
hkâ-nhám le hkyîng byùq râ a nghut.” gâ taî ri.