7
Haû Yhûmsîng Garai gi, No-aq lé, “Shí i-pyàt mâ é bang má, nàng za díngmán sû nghut é lé, Ngò myàng bê nghut é yánmai, nàng eq náng é yhûmbyù wuì bànshoq bang gi, wuìsanghpo má wang ló keq. 2 Nàng gi, sansêng jung gaunyhaú a-myû hkangmó mâ é, azìng alo nyhit zúm zúm lé le, a sansêng jung gaunyhaú a-myû hkangmó mâ é, azìng alo razúm zúm lé le, 3 nghoq a-myû hkangmó mâ é, azìng alo nyhit zúm lé le, shuî hâng chûng mù, myìdàm htoq má a-myui dùt nyì râ matú, haú pé lé rago nyhi to aq. 4 Ngò gi, ahkuî mai nyhit nyí jé jáng, myìdàm htoq má, myi xê nyí myi xê myìn mau wô nhâng mù, Ngò hpan tô é dui jung hkangmó lé, myìdàm htoq mai chyut lhoqhtûm pyám râ nghut lhê.” ga taî ri.5 Haû mù, No-aq gi, haû Yhûmsîng Garai mai yhang lé hkunmó hkyô é bànshoq lé kut bê nghut ri.
6 No-aq gi, myìdàm htoq má dowuî díng lo é hkûn, chyungxe zànwut 600 zàn bò bê nghut ri. 7 Haú hkûn, No-aq le, yhang zô nhiktâng wuì le, yhang myi le, yhang zô nhiktâng wui é yhûmsîng myhî pé le, dowuî díng lô mù, haû wuìsanghpo má hpang wang ló bekô nghut ri. 8-9 No-aq lé, Garai Gasang hkunmó hkyô tô é eq rajung za, sansêng é eq a sansêng é gaunyhaû pé, nghoq pé eq myigùng htoq má dô yê é dui jung bànshoq, azìng alo razúm zúm kut luî, No-aq chyáng lé jé kômù, haû wuìsanghpo má wàng bekô nghut ri. 10 Ahkuî, haû nyhit nyí laî é hkûn, myìdàm htoq má dowuî díng dòq lò bê nghut ri.
11 No-aq é chyungxe zànwut 600 zàn, lha-mó í hkyap hkyap, 17 nyí nyí má, gyai yhang nìk é wuìbúm pé bùq shun htoq lo lhê, mauhkûng mâ é dowuî hkum bóng lo lhê, dùt bê nghut ri. 12 Haû mù, myìdàm htoq má, myi xê nyí myi xê myìn yhang maú wo nyi ri.
13 Haû dowuî díng lo é nyí má yhang, No-aq eq yhang zô nhik wuî Shem, Ham eq Yahpet le, yhang myi eq yhang zô nhiktâng wui é yhûmsîng myhî pé sum yuq le, haû wuìsanghpo má wàng bekô nghut ri. 14 Yhángmòq eq rahá, tân jung gaunyhaú hkangmó le, yhâng a-myû eq yhang, shigu gaunyhaú bànshoq le, yhâng a-myû eq yhang, myigùng má dô yê é dui jung hkangmó le, yhâng a-myû eq yhang, nghoq hkangmó le, yhâng a-myû eq yhang, dùng dap é jung hkangmó pé le, shuî chung akô nghut ri. 15 Kâng bo jung bànshoq mâ é razúm zúm, No-aq chyáng lé jé kômù, wuìsanghpo haú má wàng bekô nghut ri. 16 Haû má wang é gaunyhaû pé gi, No-aq lé, Garai Gasang hkunmó hkyô tô é eq rajung za, dui jung hkangmó mâ é azìng alo nghut ri. Haú hkûn, haû Yhûmsîng Garai gi, yhang lé hkum myhî lhûng pyám bê nghut ri.
17 Dowuî gi, myìdàm htoq má, myi xê nyí yhang díng jàt nyi é nghut mù, wuì myô díng jàt lo é eq rajung za, wuìsanghpo haû le, myìdàm htoq mai myhâng shoq byôm toq ló bê nghut ri. 18 Myìdàm htoq má, wuì gi, jàt myô lò mù, gyai yhang díng jàt lo é hkûn, wuìsanghpo haû le, wuì htoq má myû byôm dòq ló bê nghut ri. 19 Myìdàm htoq má, wuì gi, díng shèq díng myhang ló mù, mauhkûng gón é a-ô mâ é bùm myhâng pé bànshoq gi, myùp byùq bê nghut ri. 20 Wuì gi, bùm pé lé díng nghop lai mù, bùm pê htoq 15 dúng myhâng shoq díng nhon to bê nghut ri. 21 Myìdàm htoq má dui lùp wún é kângsoq dui jung hkangmó nghut é, nghoq pé, shigu gaunyhaú pé, tân jung gaunyhaú pé, myìdàm htoq má yông lhing wún bum é dui jung bànshoq eq, waxâng zo wuî bànshoq gi, shi htûm byùq bê nghut ri. 22 Yhûmsing é nhô má kângsoq bo é, myigùng htoq má nyi é jung hkangmó gi, shi byùq bê nghut ri. 23 Myìdàm htoq má nyi é dui jung hkangmó gi, lhoqhtûm pyâm é hui bê nghut ri; byu pé, gaunyhaú pé, myigùng htoq má dui lùp wún é dui jung pé eq maulat nghoqzô pé gi, myìdàm htoq mai lhoqhtûm pyâm é hui bekô nghut ri. No-aq eq, haû wuìsanghpo má yhang eq rahá nghut nyî bang za myìt gyó tô akô nghut ri.
24 Haû dowuî gi, myìdàm htoq má 150 nyí yhang díng tô ri.