Lut 3

Lut biee ntifi yi Nahomi kɛmɛ nyuŋ

Le tuu ni nuuŋ mfi wumu, Nahomi ni nyumɛ Lut se dza tee li wu-u le, “Ŋwanɛŋ, ŋgii nlee ki ŋgɔɔŋ kɛ nyuŋ li wɛ-ɛ, ke ɔ se ni ɔ kɛmi ya yih, biee se dɛndɛ bɛ wɛ lɛ dze yi dzeeŋ li kɛ ni? 2 Mɔɔ ɔ kiiɔ le Bwaas wu beŋ nɛɛ bɛsɔɔŋ bɛ bukɛɛŋ lɛ bee bɛ nimɛ-ɛ giiŋgi nɛ shiiŋ bɛ wu wuni, ɛ wi wu kini kisɛŋ ni? Bichɛ ɔ ŋɛŋ, gii ni nuuŋ fɛ bɛ suŋgi giiŋ fɛɛ butuu bu bɛŋ buni fɛɛti giiŋ. 3 Bɛdɛɛni, tsootsɛ yi ya, ɔ fwa mɛɛŋ mɛ sɛɛndi ni shuuŋŋ, ɔ chuumɛ mɔɔ ndú ya yi shaaŋ ŋge, ɔ bɔɔ fɛ bɛ suŋgi giiŋ fɛlu. Se nuuŋ le, mfi wu ɔ bɔɔ, kiiŋ ɔ ni fɛ le kɛɛ le ɔ wɛ fe mɛɛŋ saa ki mɛɛshi kɛ le ji biee, woŋ mɔɔ biee kɛ. 4 Mfi wu giiŋgi le giiŋ ɔ bichi kintsii ki gimi fe bujɔŋ. Nɛɛlɛ ɔ se gɛɛŋ ɔ tsaaki ndu yi li bikaa biee li. Ɔ giŋ fe, gii tee wɛ fiee fi ɔ gii ɔ fɛ.”

5 Lut se tuu li wu-u le, “Fiee fichu fi ɔ tee ŋgii mfɛ.”

6 Bɛdɛɛni Lut se dza biee bɔɔ fɛ bɛ tɛ suŋgi giiŋ fɛlu, fɛ nɛɛ si ni nyumi bee tee li wu-u. 7 Le Bwaas ji biee, woŋ biee yi dzɔɔŋ wu, biee dza gɛɛŋ gimi fɛ kintutu ki giiŋ lɛ fɛŋgooŋ. Si tɛ giŋ lɛ, Lut se biee wɛɛŋ nyɛɛkii gɛɛŋ tsaaki ndu yi li bikaa biee li giŋ fe. 8 Le ni nuuŋ butuu kintikinti, yi dzakɛ te la wulu yi kofi wu ni wuuu. Dza fiiki yi, fi se ka le kwɛɛŋ tɛ gimi li bikaa biee li lichiŋ. 9 Se bii laa, “Ɛ wɛ noo?”

Lut se tuu le, “Ɛ mi Lut wi wa wu nimɛ. Baanyɛ mi lɛ bibɛ bio-o lɛkwiiŋ, kifɛ ɛ wɛ wi wu bɛ te nyumɛŋ wu fɛtaaŋ kibɛɛ.

10 Bwaas se tee li Lu-ut le, “TAA NYƆ lɔŋ kimbɔnɛ li wɛ-ɛ ŋwanɛŋ. Kiŋge ki dzeeŋ ki ɔ doonchi dɛɛni kini yaa kɛɛ ki ŋkosi. Bee nuuŋ ɔ dza ɔ gɛɛŋ lɛ bɛsɔɔŋ bɛ buni-iŋ mɔɔ nuuŋ bɛ kifoo lɛ kɛ bɛ kwa-a, se nuuŋ le ɔ mɛɛŋɔ lɛ beeyɛ ki gɛɛŋ kɛ. 11 Ŋwanɛŋ, li dɛɛni, kiiŋ ɔ ni ɔ chɛndi kɛ! Ŋgii mfɛ fiee fichu fi ɔ bii. Ɔ kii le bɛniiŋ bɛchu bɛ nuuŋ fɛ kitoŋ kini-i tɛɛ be kii baa le ɔ wɛ kwɛɛŋ wu shaaŋ. 12 Ɛ chɛɛŋ le nnuuŋ wi wu kini ko wu fɛtaaŋ, se nuuŋ le, wi wumu wɛ lu wu nuuŋ nɛɛ wi wu kini wa wu fɛtaaŋ kibɛɛ wu yɛki mi. 13 Ba ɔ ni ɔ nuuŋ fɛni butuu bu bɛŋ buni, ke butuu woo fɛŋwɛɛŋ ɛ gii gɛɛ wɛ si wi wu kini we wu fɛtaaŋ kibɛɛ, kɛ ɛ bujɔŋ. Se nuuŋ le, ɛ mɛɛŋ ki kɔɔŋgi kɛ le fɛ kee kimbɛ ki wi wu kini-i kɛ, kɛ ɛ fiee fi TAA NYƆ wu nuuŋ lu kii fe, kɛ ŋgii mfɛ keŋ kimbɛ ki wi wu kini-i li wɛ-ɛ. Kaari ɔ ni ɔ gimi nsiiŋ butuu woo.

14 Bɛdɛɛni, Lut se giŋ li bikaa bi Bwaas lichiŋ gɛɛŋ bo fɛ lɛkuuŋ tɛ bo le woo. Se nuuŋ le, tɛ tuu dza we lɛkuuŋ mɛɛŋ fii si nuuŋ wi tɛ jiiŋgi wi wumu kɛ lɛ. Bwaas se tee li wu-u le, “Kiiŋ ɔ ni fɛ wi kɛɛ le kwɛɛŋ tuu bɛ fɛ bɛ tuu be suŋgi giiŋ fɛɛ kɛ.” 15 Bwaas se tuu tee li wu-u le, “Bɛ bɛ ndu ya yi lifa ɔ dɛŋ fɛni.” Nɛɛlɛ, Lut biee dɛŋ. Bwaas se fichɛ giiŋ si bɛŋkaa bɛfɛ bɛ fiee fɛ ndu yilu-u, biee tsaaki wu, se dza tuu michi giiŋgi fɛ kito-oŋ. 16 Le gɛɛŋ chiiŋ ni nyumi, ni nyumi bii li wu-u laa, “Ɔ tuu ɔ dɛndɛ niŋ ŋwanɛŋ?”

Lut se naanyɛ fiee fichu fi Bwaas bee fɛ li wu-u. 17 Tuu taa fe le, “Bee tee li mi-i le ŋkɛmi yɛ le ŋkaari nto lijiŋ lɛ ni nyumɛ-ɛŋ bɔ kilɛlɛ kɛ, wu se fichɛ giiŋ yini bɛŋkaa bɛfɛ bɛ fiee wu nyɛ li mi-i.”

18 Nahomi se tee le, “Ŋwanɛŋ, ɔ tɛŋgi! Ɔ gii ɔ ŋɛŋ si biee gii naa bi dɛndɛ bi nuuŋ. Te la wulu nuuŋ tɛ fufɛ fuki fɛ wu nachɛ nsa wulu bɛŋ nsiŋ kɛ.”