Lut bee Bwaas bikɛ liwɛ
2
Tɛ̀ nuuŋ li mfi wɛ-ɛ, Nahomi tɛ̀ kɛmi wi wube wumu lɛ kimbɛ ki kini ki bɛ nyumi-i Ɛlimɛlɛ-ɛk. Wi wuni tɛ̀ nuuŋ wi wu bɛ kii le ɛ wi, bukooŋ bwee nuuŋ le Bwaas. 2 Le ni nuuŋ jobɛ chimu, Lut wu ŋwaŋ wu Mwa wɛ tɛ̀ dza tee li Nahomi-i le, “Gɛɛ mi ŋgɛɛŋ li yɛ-ɛ ni mbiki mbɔɔnyi giiŋ be lɛjiŋ le mɔɔ nuuŋ noo wu ŋɛŋ mi le, doonchɛ bushi bwee li mi-i.”Nahomi se tee li wu-u le, “Ɔ giiŋgi ŋwanɛŋ!”
3 Nɛɛlɛ Lut se dza bo gɛɛŋ biki bɛniiŋ bɛ tɛ̀ kuuti giiŋ baa lɛjiŋ bɔɔnyi bikoo bi giiŋ lɛ. Fi se dza fi ka le wɛ wu tɛ̀ bɔɔnyi giiŋ lu wɛɛ, tɛ nuuŋ wu Bwaas wi wu kini ki bɛ Ɛlimɛlɛ-ɛk.
4 Fi dza fi ka le, Bwaas kibɛɛ tɛ̀ dza fɛ kitoŋ ki Bɛtɛlɛhɛŋ bɛ tɛ lɛwɛ lɛlu. Le fɛsi, tee li bɛniiŋ bɛ tɛ̀ bɔɔnyi giiŋ baa le, “TAA NYƆ ni nuuŋ bɛ beŋ looo.”
Be se tuu li wu-u le, “TAA NYƆ lɔŋ kimbɔnɛ li wɛ-ɛ looo.”
5 Bwaas bii li wi we wu nimɛ wu tɛ̀ bichi lɛ bɛniiŋ bɛ tɛ̀ kuuti giiŋ baa laa, “Sɔɔnɛ kwɛɛŋ wɛɛ nuuŋ wu noo?”
6 Wi wu nimɛ wɛ tuu le, “Sɔɔnɛ kwɛɛŋ wulu ɛ ŋwaŋ wu Mwa wu tuu biee Nahomi mfi wu tuu dza li kwɛɛŋ wu Mwa-a tuu lani wɛ. 7 Bee bɛ wu lɛkɛ mi le ŋgɛɛ wu ni biki bɔɔnyi bikoo bi giiŋ lɛ, lɛ bɛniiŋ bɛ kuuti giiŋ lɛ lɛjiŋ mɔɔ fɛ bintutu bi giiŋ lɛ. Bɛdɛɛni, lɛ liwɛ bɛchi nimɛ mɛɛŋ ntaantaaŋ nsiiŋ bɛ bo dɛɛni, wu fufɔɔ niiŋ kwaa lɛ kigɔɔnɛɛ lɛkwiiŋ.
8 Bwaas se tee li Lu-ut le, “Ŋwanɛŋ, yikɛ ɔ woo, kiiŋ ɔ ni tuu ɔ dza fɛni le ɔ gɛɛŋ ɔ ni bɔɔnyi giiŋ fɛ wɛ wumu wu gwetɛ-ɛ kɛ. Ba fɛni ɔ ni ɔ bɔɔnyi li bɛsɔɔŋ bɛ bukɛɛŋ beŋ bɛ nimɛ-ɛ bani-i lichiŋ. 9 Ɔ bichi nɛɛ nuuŋ li wɛ wu bɛsɔɔŋ bɛ buni-iŋ soomi giiŋ lu wuni-i, ɔ biki be. Mi nteeɔ kituŋ li bɛsɔɔŋ bɛ buni-iŋ bani-i le kiiŋ be ni be fieŋgisi wɛ kɛ. Mfi wu ndɔɔŋ wondini wɛ, ɔ gɛɛŋ fɛ tɛnɛ nuuŋ fe, ɔ kɔbi dzɔɔ yi bɛsɔɔŋ bɛ buniŋ bɛlu bee be kwɛ, ɔ woŋ.
10 Lut se guumɛ toŋ bushi likwiiŋ, tee li Bwaas li le, “Ɛ kii la fi ɔ doonchɛ ŋwaani kini kiŋkɔŋgisɛ li mi-i ɔ nyɛ bushi bwo li mi-i, mɔɔ fɛ nuuŋ fieŋ mfondɛ ni?
11 Bwaas se tuu li Lu-ut le, “Bɛ tee baa mi kii fiee fichu fi ɔ fɛ li ni nyuma-a mbɛɛchɛ si nyuma tɛ̀ kwi. Mi ŋ'wooɔ kituŋ si ɔ tɛ̀ chinɛ na bee chaa mɔɔ kwɛɛŋ wunɛ ɔ bɛ ɔ tsiiŋ bɛ bɛniiŋ bɛ ɔ ti mɛɛŋ saa be ki kɛɛ kɛ. 12 Nlɛkɔɔ le TAA NYƆ sooŋ wɛ li fiee fi ɔ fɛ-ɛ. TAA NYƆ yi nuuŋ Nyɔ yi bɛniiŋ bɛ Isɛlɛɛ yi ɔ bɛ le ɔ nyiiŋ lɛ bibɛ bi yi-i, deri wɛ weseeŋ li fiee fichu-u.
13 Lut se tee li wu-u le, “Taa wɛŋ, ɔ doonchɔɔ shéŋ yi dzeeŋ li mi-i nɛɛ ŋge. Ɔ deenɔɔ shéŋ yɛŋ, ɔ yɔ li mi-i wi wu nimɛ lɛ dze yi kiŋkɔŋgisɛ-ɛ, mɛɛŋ mɔɔ ki kɔchɛ kɛ wi wu nimɛ wa wumu kɛ.”
14 Le ni nuuŋ mfi wu biee bijɛ, Bwaas se tee li Lu-ut le, “Bɛ fɛni ɔ ji kibele! Ɔ bootini ɔ fuundi li mbiiŋ li!” Nɛɛlɛ, Lut se biee bɛ shee li bɛniiŋ bɛ tɛ̀ kuuti giiŋ baa lichiŋ. Bwaas se nyɛ wu fɛ giiŋ yi bɛ wɔɔŋ li. Fi ji ni, fukɛ, yimi shɛ. 15 Lut tuu dza we le gɛɛŋ tuu ni bɔɔnyi giiŋ, Bwaas se tee li bɛsɔɔŋ bɛ buniŋ bee baa le, “Gɛɛ yɛɛŋ wu ni bɔɔnyi nɛɛ mɔɔ li bintutu bi giiŋ lɛ lichiŋ. Kiiŋ wi ni ni gaashi wu kɛ. 16 Nɛ baayi tɛ yimi li bintutu-u, nɛ lɔnyi li wu-u ni biki bɔɔnyi. Kiiŋ nɛ ni nɛ wami wu kɛ.
17 Nɛɛlɛ, Lut tɛ̀ shi bɔɔnyɛ giiŋ liwɛ lulu nsiiŋ gɛɛŋ bo lɛ fɛmfo-o, se sooŋ yi bo si ŋkaa wu nyɔŋa tɛɛ. 18 Si tɛ̀ sooŋ lɛ dzɔ koo bɛ yi fɛkuuŋ gɛɛŋ doonchɛ giiŋ yi wu shi wu bɔɔnyɛ yilu li ni nyumi-i, se buu giiŋ yi bee saa wu ji wu fukɛ yi shɛ yɛɛ nyɛ li ni nyumi-i.
19 Ni nyumi se bii li wu-u laa, “Ɔ bee ɔ gɛɛŋ ɔ shi ɔ bɔɔnyi bikoo bi giiŋ lɛ bini fɛŋ? Bee nuuŋ liwɛ wu noo li, li ɔ bee ɔ nindi? Kimbɔnɛ ni ki nuuŋ li wi wu bee wu ŋɛŋ wɛ wu doonchɛ bushi bwee li wɛ-ɛ wɛ.”
Lut se biee tee ni nyumi wi wu bee gɛɛŋ wu shi nindi li wu-u, tee le bukooŋ bu wi wulu-u bee le Bwaas”
20 Nahomi se biee tee li kwɛɛ ŋwani wuni-i le, “Nyɔ lɔŋ kimbɔnɛ li mwɛ-ɛ tɛ. Nyɔ mɛɛŋ yɛ ki baa kɛ dzaa le yi ni yi doonchi kiŋkɔŋgisɛ ki yi-i li bɛniiŋ bɛ mɛɛŋ lu-u, kɛ bɛ kwiyɛ kituŋ kɛ! Nahomi se tuu tee li Lu-ut le, “Wi wuni wɛ wi wu kini kisɛŋ wu fɛtaaŋ kibɛɛ nuuŋ wi wu kɛmi le ni suuti kini.”
21 Lut ŋwaŋ wu Mwa wɛ se tuu tee le, “Fi nɔŋa nuuŋ le, bee tee li mi-i le ni mbiki li bɛniiŋ bee bɛ nimɛ-ɛ lichiŋ gɛɛŋ bo mfi wu be mɛɛshi ŋ'wechɛ we kwi.
22 Nahomi se tee li Lut kwɛɛ ŋwani-i le, “Ŋwanɛŋ, fi fiɛɛ bujɔŋ le ɔ gɛɛŋ nɛɛ bɔɔŋ bee bɛ bukɛɛŋ ɔ ni ɔ nindi bɛ be, yɛki fɛ nuuŋ ɔ gɛɛŋ li wi wumu wɛ bɛ gɛɛŋ bɛ ni bɛ ŋwɛki bɛ wɛ.
23 Nɛɛlɛ, Lut se buti giiŋgi biki li bɛsɔɔŋ bɛ bukɛɛŋ lɛ bɛ nimɛ-ɛ bɛ Bwaas baa bɔɔnyi bikoo bi giiŋ lɛ nsiiŋ gɛɛŋ bo mfi wu bɛ tɛ̀ mɛɛshi bɛ sooŋ giiŋ bɛ ndza. Tɛ nuuŋ li mfi wɛɛ Lut mɛɛŋ tsiiŋ bee ni nyumi.