Kiŋwaati ki
Lu-ut
Elimɛlɛk bee kini kee ninɛ kii dzeeŋ, be gɛɛŋ le be ŋɔɔnɛ Mwa
1
Tɛ̀ nuuŋ mfi wu bɛniiŋ bɛ sɛki bɛnsa tɛ̀ mɛɛŋ be sɛki kwɛɛŋ wu Isɛlɛɛ, bɛmfɔŋ se naa nuuŋ lu, dzeeŋ yi tɛɛmi dza yi kɔɔ li kwɛɛŋ wulu-u. Wi wumu wu li kitoŋ ki Bɛtɛlɛhɛ-ɛŋ lɛ kimbe ki kwɛɛŋ lɛ ki Juda-a, dza bee kwɛsi mɔɔ bɔɔŋ bee bɛ buniŋ bɛfɛ be ninɛ be gɛɛŋ le be ŋɔɔnɛ li kwɛɛŋ wu Mwa-a. 2 Bukooŋ bu wi wulu-u tɛ̀ nuuŋ le Ɛlimɛlɛk, bu kwɛsi-i nuuŋ le Nahomi, mɛ bɔɔŋ bee bɛ buniŋ bɛ bɛfɛ bɛlu nuuŋ le Malɔŋ bɛ Kiliɔŋ. Be tɛ̀ nuuŋ kini ki Ɛflɛta li kitoŋ ki Bɛtɛlɛhɛ-ɛŋ, kimbe ki kwɛɛŋ lɛ ki Juda-a. Be se gɛɛŋ be bo le be ba be tsiiŋ le butsɛ. 3 Si be tɛ̀ nuuŋ le lɛ, Ɛlimɛlɛk wu nyumɛ Nahomi tɛ̀ dza kwi, Nahomi se shɛ nɛɛ bɛ bɔɔŋ bee bɛ buniŋ bɛ bɛfɛ baa kwaa. 4 Bɔɔŋ bɛ buniŋ bani se tɛ̀ dza be dzɔ bukɛɛŋ nuuŋ bɔɔŋ bɛ Mwa. Bukooŋ bu wumu-u tɛ̀ nuuŋ le Opa bu wumu-u se nuuŋ le Lut. Bee be se tɛ̀ tsi nɛɛ si biya yoofi, 5 Malɔŋ bee Kiliɔŋ se dza tɛ̀ be kwiyɛ. Nɛɛlɛ Nahomi se ba nuuŋ nɛɛ kilɛlɛ lɛ, bɔɔŋ bee bɛ buniŋ bɛ bɛfɛ baa nsiŋ mɔɔ nyumi.Lut sɔnɛ le gii biee Nahomi Bɛtɛlɛhɛŋ
6 Nahomi se dza woo li kwɛɛŋ wu Mwa-a le TAA NYƆ bɛɔ lɛ bɛniiŋ bee bɛ Isɛlɛɛ wu nyɛ be bijinɛ. Se bɛchi nachi le dza li kwɛɛŋ wu Mwa-a to lijiŋ bɛ bukɛɛŋ bɛ bɛŋku bɔɔŋ bee lɛ. 7 Se dza fɛ gii nuuŋ fɛɛ bee bukɛɛŋ bɛ bɔɔŋ bee lɛ bɛ bɛfɛ baa, be tuu be giiŋgi lɛ dze le be tuu baa lijiŋ li nshɛ yi Juda-a. 8 Se nuuŋ le, si be tɛ̀ dza le be ni be giiŋgi lɛ, Nahomi dza tuu tee li bukɛɛŋ bɛ bɔɔŋ bee lɛ bɛlu le, “Wi mumkpaŋ mumkpaŋ li be-eŋ ni karisi tuu lijiŋ li ni yih. Nlɛkɔɔ le TAA NYƆ doonchɛ kiŋkɔŋgisɛ li be-eŋ nɛɛ yɛɛŋ si nɛ doonchɛ baa li bɛ tɛ̀ kwiyɛ kituŋ mɔɔ li mi-i lɛ. 9 TAA NYƆ nyɛ beŋ dze yi nuuŋ wi mumkpaŋ mumkpaŋ li be-eŋ kɛmɛ yih yi nuuŋ ni nuuŋ lu nyɛɛkii bee nyumi le.”
Si wu tee lɛ, biee kokɛ be yɛsi be le bɛ shɛ baa yɛɛŋ. Be se munchi kwe be de lɛwe ŋge. 10 Be se tee li Nahomi le, “Wohoo! Tɛ gii tɛ gɛɛŋ nuuŋ lɛ bɛniiŋ bɛnɛ-ɛ!”
11 Se nuuŋ le, Nahomi tee li bee le, “Bɔɔŋ beŋ, kaari yɛɛŋ! Nɛ biki mi kii la? Nɛ beechi le mmɛɛŋɔ ntuu ŋkɛmi bɔɔŋ lɛ shéŋ bɛ gii be nuuŋ buniŋ bɛnɛ ni? 12 Nɛ tuu yɛɛŋ lijiŋ, bɔɔŋ beŋ! Nɛ giiŋgi finɛ, kifɛ mi ndoŋɔ ŋge li ntuu ŋkɛmɛ nyu-uŋ. Ɛ mbee mɛɛŋ mbichi limfwe li fiee li, mɔɔ nuuŋ le mbee ŋkɛmɛ nyuŋ butuu bu bɛŋ buni tɛɛ wu tɛ biɛ bɔɔŋ bɛ buniŋ, 13 nɛ gii nɛ taaŋ nsiiŋ gɛɛŋ bo mfi wu be ta be mɛsi ni? Nɛ gii nɛ ba ŋgɛnu lɛ buniŋ bamu-u nsiŋ ni? Wohoo bɔɔŋ beŋ. Fi lochɛ fiɛɛ mi-i ŋge yɛki mɔɔ fɛ be-eŋ, kifɛ TAA NYƆ baaɔ dzaa nuuŋ li mi-i.”
14 Si wu tee lɛ be tuu be munchi kwe be dii. Opa kokɛ ni nyumi tee le bɛ shɛ baa, se nuuŋ le Lut tɛ̀ shiŋ wu libwiŋ bushimu. 15 Nahomi se tee le, “Ŋɛŋgɛ si kwana tuu lijiŋ lɛ bɛniiŋ bee li mɔɔ lɛ bɛnyɔ bɛ be-e. Ɔ tuu fio lijiŋ nɛ ni nɛ karisi.
16 Se nuuŋ le, Lut tɛ̀ tuu tee fiee le, “Kiiŋ ɔ ni ɔ fieŋgisi mi le nchinɛ li wɛ-ɛ ni ŋkarisi ntuu lijiŋ kɛ. Fɛ ɔ giiŋgi fe, ɛ fe fɛ ŋgii ni ŋgiiŋgi. Fɛ ɔ tsiiŋ fe, ɛ fe fɛ ŋgii ni ntsiiŋ. Bɛniiŋ bo gii be ni be nuuŋ bɛniiŋ beŋ, se Nyɔ ya ni yi nuuŋ Nyɔ yɛŋ tɛ. 17 Fɛ ɔ kwi fe, ɛ fe fɛ ŋgii ŋkwi, ɛ nɛɛ fe tɛ fɛ bɛ gii bɛ diyɛ mi. TAA NYƆ ŋwɛɛ nɛɛ bɛ mi, ɛ ŋwɛki bɛ mi, ŋwɛɛ yaa lɛ, ɛ nɛɛ fiee fi detɛ ɛ kwe kwaa yi nuuŋ yi gatɛ tɛɛ wɛ. 18 Le Nahomi tuu ŋɛŋ le Lut nyitinɔɔ le ni biki wu, mɛɛŋ ki tuu kɛ le tee fiee kɛ.
19 Bɛdɛɛni bee wu bɛfɛ se dza be giiŋgi, be dɛndɛ be gɛɛŋ be fɛsi Bɛtɛlɛhɛŋ. Si be tɛ gɛɛŋ be fɛsi le lɛ, kitoŋ kilu kichu tɛ̀ sɛɛsɛ kii be. Bukɛɛŋ bɛ le se biiti laa,“Wuni nuuŋ nɛɛ Nahomi ni?”
20 Nahomi se tee li be-e le, “Kiiŋ nɛ ni tuu nɛ ni nɛ teenyi mi le Nahomiª kɛ. Nɛ teenyi mi dɛɛni nuuŋ le Mara,ª kifɛ Nyɔ yi Buŋga Buchu fɛ yɛ ntsɛ wɛŋ lochɛ ŋge. 21 Ntɛ dzɛti fɛni ɛ mi n'yisɛ, se nuuŋ le TAA NYƆ kaarɔɔ bɛ mi bɔ kilɛlɛ. Nɛ tuu teenyi mi le Nahomi kii la? TAA NYƆ lɔŋɔ ŋgɛ li mi-i. Nyɔ yi Buŋga Buchu lɔɔ yɛ mi.
22 Ɛ ni si Nahomi bee Lut wu kwɛɛ ŋwani wu tɛ̀ nuuŋ ŋwaŋ wu Mwa tɛ̀ dza Mwa be to lijiŋ Bɛtɛlɛhɛŋ ni. Be tɛ̀ to lijiŋ nuuŋ mfi wu bɛ tɛ bɛɛchi giiŋª yi kofɛ.