Kiŋwaati ki
Jɔna-a
Fiee fi nuuŋ lɛ Kiŋwaati ki Jɔna kini
Kiŋwaati ki Jɔna kini numi yɛ si biŋwaati bimu bi bɛntomfɔŋ bɛ Nyɔ-ɔ bamu, bi tiiti kinɔŋa nuuŋ biee bi Nyɔ tɛ tee be le be tee li bɛniiŋ li, kiŋwaati kini nuuŋ nuuŋ filoŋ fi tɛ ka bɛ Ntomfɔŋ wu Nyɔ wumu wu tɛ wɛki le faaŋ ŋgɛnu fintoŋ fi Nyɔ-ɔ. Nyɔ tɛ tee li Jɔna le gɛɛŋ Ninibɛ tee li bɛniiŋ li, le ŋgɛ bɛɛɔ lɛ bee. Ninibɛ wuni tɛ gii nuuŋ kitoŋ kinɔŋa li kwɛɛŋ wu Asiria, nuuŋ Asiria tɛ gii nuuŋ bɛniiŋ bɛ mbani bɛ kitoŋ ki Isɛlɛɛ. Jɔna tɛ kɔŋgisi yɛ le gɛɛŋ bɛ ntoŋ wu Nyɔ fe kɛ kifɛ tɛ kii le Nyɔ nuuŋ tɛ lɛɛshɛ Ninibɛ kɛ, le gii kɔɔ nuuŋ bu nshiiŋ lɛ bɛ be. Nyɔ se fɛ bɛ ŋgɛ bɛ lɛ Jɔna kinɔŋa se beŋ le gɛɛŋ fintoŋ fi Nyɔ-ɔ. Fi se ka chɛɛŋ le Nyɔ tɛ mɛɛŋ ki lɛɛshɛ kɛ kitoŋ kɛɛ kɛ. Jɔna bɛchi ŋuŋini dzeti shéŋ bɛ Nyɔ kii li wu-u, Nyɔ tɛ kɛmi yɛ le yi kɔɔ nshiiŋ bɛ bɛniiŋ bamu fuki bɛniiŋ bɛ Isɛlɛɛ nsiŋ kɛ.
Kiŋwaati kini doonchi si Nyɔ kɛmi buŋga li biee bichu bi wu tɔŋ bi wuki wu. Se nuuŋ le, li fiee fichuchu Nyɔ nuuŋ Nyɔ yi kɔŋgisi bɛniiŋ kinɔŋa tuu kɛmi ŋge yi nshiiŋ li bee. Ti bɛɛ fekisi bubiɛɛ bu bɛniiŋ bɛ dii li wu-u yuti fɛ nuuŋ lɛɛshɛ be mɔɔ nuuŋ bɛniiŋ bɛ mbani bɛ bɛniiŋ bee bɛ Isɛlɛɛ.
Bikoo bi biee bi nuuŋ lɛ kiŋwaati kini
Jɔna faaŋ ŋgɛnu fintoŋ fi Nyɔ-ɔ 1:1-17
Jɔna lɛkɛ li Nyɔ-ɔ 2:1-10
Jɔna beŋ gɛɛŋ fintoŋ fi Nyɔ-ɔ Ninibɛ 3:1-10
Jɔna dzɔ shéŋ kii nshiiŋ yi Nyɔ li bɛniiŋ bɛ Ninibɛ 4:1-11