Bwaas dzɔ Lut li kwɛɛŋ li
4
Be tɛ̀ yeti lɛ, nuuŋ ɛ Bwaas shɛ wu yɛɛ wu gɛɛŋ fɛ kito-oŋ wu shee fɛ fweeŋ wu mbaŋ wu bɛ tɛ̀ shiiŋ bɛ shiiti bɛnshefu fe-e. Fi se ka le, wi wu kini ki bɛ Ɛlimelɛ-ɛk wu fɛtaaŋ kibɛɛ wu Bwaas tɛ̀ gii tiiti kii wu wɛ, tɛ̀ dza fɛsi fe, Bwaas se tee li wuu le, “Sinɛŋ karɛ ɔ shee fɛni!” Mwɛ ka shee.2 Bwaas tsaa buniŋ yoofi lɛ bɛkaaŋ bɛ fɛ kitoŋ kilu-u linti, tee li bee le, “Bɛ yɛɛŋ nɛ sheeyɛ fɛni!” Be se biee be bɛ be sheeyɛ. 3 Tee li wi wu be wu kini wu fɛtaaŋ kibɛɛ wu kɛmi le ni suuti kini wɛ-ɛ le, “Nahomi wu tuu dza li kwɛɛŋ wu Mwa-a wu kaari wu to fɛni wɛ, kabinɔɔ kintsii ki Ɛlimelɛ-ɛk wu ŋwaanɛŋ wusɛŋ. 4 Bɛɛdɛni mbeechɔɔ le ntee wɛ kii fiee filu nse ŋkweŋgi le ɔ go kintsii kilu li bɛniiŋ bɛ sheeyɛ fɛni limfwe, mɔɔ li bɛkaaŋ beŋ bani limfwe. Ɔɔ gii ɔ sooŋ kintsii kilu, ɔ sooŋ. Se nuuŋ le ɔɔ nuuŋ tɛ sooŋ kɛ, ɔ tee mi ŋkɛɛ. Ntiitɔɔ ni kifɛ wi wumu mɛɛŋ yɛ lu limfwe wu nuuŋ sooŋ kintsii kilu fuki wɛ nse ntuu mbiki kɛ”
Wi wulu se tuu li wu-u le, “Ŋgii nsooŋ kintsii kilu.”
5 Bwaas se tee li wu-u le, “Mfi wuɔ kɛmɛ kintsii kini li Nahomi kɛɔ dzɔ ɔ tɛ mɔɔ Lut wu ŋwaŋ wu Mwa wu nuuŋ kwɛɛ ŋku, ke se ɔ gɛɛ bukooŋ bu ŋku-u li bishɛyɛ bilu.”
6 Si Bwaas tɛ̀ tee lɛ, wi wu kini wu fɛtaaŋ wulu se tee fiee le, “Si fi nuuŋ lɛ mmɛɛŋ yɛ ntuu nsooŋ kɛ, kifɛ ɛ mi nsooŋ, kpɛ gii nuuŋ li mbieŋ bishɛyɛ. Dzɔɔ kintsii keŋ ɔ sooŋ. Nnuuŋ ntɛ nsooŋ kɛ.”
7 (Tɛ̀ gii nuuŋ mfi wu ŋkosi ntsɛ wu kwɛɛŋ wu bɛniiŋ bɛ Isɛlɛɛ tɛ̀ nuuŋ le, ɛ wi suundi fiee fi wi wumu-u kɛ le kosinɔɔ fiee, wi buu kikpɔ nyɛ li wi wumu wɛɛ le tɔɔŋ fiee fi ka. Fini tɛ̀ nuuŋ si bɛ gii bɛ nachi biee li kwɛɛŋ wu Isɛlɛɛ.)
8 Nɛɛlɛ, si wi wu kini wu fɛtaaŋ kibɛɛ wɛ tuu tee le Bwaas go, se biee buu kikpɔ kee nyɛ li Bwaas li.
9 Bwaas tuu tee li bɛkaaŋ li bɛ li bɛniiŋ bɛchu fe-e le, “Beŋ bani nɛ leŋ baa lɛ nsa wɛ-ɛŋ lɛjiŋ bɛŋ yani le mi ŋgoɔ fiee fichu li tsaŋ yi Nahomi fi tɛ̀ nuuŋ fi Ɛlimɛlɛ-ɛk, mɔɔ fiee fichu fi tɛ̀ nuuŋ fi Kili-ɔŋ mɔɔ fi Malɔ-ɔŋ. 10 Li ntawu fe-e, Lut wu ŋwaŋ wu Mwa wu kwɛɛ ŋku Malɔ-ɔŋ le ni nuuŋ ni yih wɛŋ kituŋ. Fi fiɛɛ lɛ le nse ŋgɛɛ bukooŋ bu ŋku-u li bishɛyɛ biee li le se kiiŋ bukooŋ bwee ni la lɛ bɛŋwaani-i lɛnti kɛ lɛ bɛniiŋ bɛ fɛ kitoŋ kibee lɛnti kɛ. Beŋ bani nɛ leŋ baa lɛ nsa wɛ-ɛŋ lɛjiŋ bɛŋ.
11 Nɛɛlɛ bɛniiŋ bɛchu bɛ tɛ̀ nuuŋ fɛ kinshewu ki fɛ fweeŋ wu mba-aŋ mɔɔ bɛkaaŋ baa se tee le, “Tɛ leŋ baa lɛ nsa wa-a lɛjiŋ kituŋ. TAA NYƆ fɛ le kwɛɛŋ wu bɛɛ li wɛ-ɛ yih wuni ni nuuŋ si Lachɛ bee Leya bɛ tɛ̀ taashɛ be gwaŋ yih yi Isɛlɛɛ. Tɛ lɛki baa li TAA NYƆ-Ɔ le ɔ gɛɛŋ fio nuuŋ limfwe lɛ kini ki Ɛflata-a bɛ ki Bɛtɛlɛhɛŋ kichu. 12 Tɛ lɛki baa tɛ le bɔɔŋ bɛ TAA NYƆ gii nyɛ li wɛ-ɛ kɛti li sɔɔnɛ kwɛɛŋ wuni-i naa be fɛ kini ko nuuŋ si kini ki Pɛlɛ-ɛs ki Tama tɛ biɛ nyɛ li Juda-a kɛɛ.
Kini ki Bwaas
13 Bɛdɛɛni, Bwaas se dzɔ Lut li kwɛsi-i. Le ka kintaa bee wu, TAA NYƆ fɛ wu kɛmɛ fwe, se biɛ ŋwaŋ wu nyuŋ. 14 Bukɛɛŋ bɛ le bɛ be tee li Nahomi-i le, “N'yɔɔnchɛ ni nuuŋ li TAA NYƆ yi nyɛ wɛ ŋwanɛ ŋwaŋ bɛŋ. Tɛ lɛki baa le bukooŋ bwee naa bu gɛɛŋ kwɛɛŋ wu Isɛlɛɛ kwikwi! 15 Ŋwaŋ wuni gii naa bɛ bɛ ntsɛ wu fwɛŋ li wɛ-ɛ, tuu ni bichi lɛ wɛ-ɛ mfi wu ɔ naa ɔ doŋ. Kwɛɛ ŋwana wuni wu biɛ ŋwaŋ wuni kɔŋgisɔɔ wɛ, wu yaaɔ mɔɔ bɔɔŋ bɛ buniŋ mfomɛnyaaŋ li wɛ-ɛ. 16 Nahomi se fi ŋwaŋ wulu gɛɛ fɛ yeeŋ, se kisi wu. 17 Bukɛɛŋ bɛ fɛ kintsii kɛɛ se bɛ be nyɛ bukooŋ bu ŋwa-aŋ wulu-u le Obɛ, be tuu be gɛɛŋ limfwe bɛ ntefu le, “Nahomi kɛmɔɔ ŋwaŋ wu nyuŋ.” Obɛ tɛ̀ ta tuu to te Jɛɛsi wu tɛ̀ nuuŋ te Mfɔŋ Daafi.