Kiŋwaati ki
Jɔna-a
Jɔna faaŋ ŋgɛnu fintoŋ fi Nyɔ-ɔ
1
Taa Nyɔ tɛ tee li Jɔna ŋwanɛ Amita jobɛ chimu le, 2 “Dzatsɛ fɛni ɔ gɛɛŋ Ninibɛ, kitoŋ kinɔŋa kɛɛ ɔ dzaaŋ li kii, kifɛ biee bi bee bibifi bɛ biɛɛ bi chiiŋ mi.” 3 Jɔna se tuu dza giŋgii nuuŋ Taashi le kiifɔɔ li bushi bu Taa Nyɔ. Bɔɔ Jopa gɛɛŋ ŋɛŋ yi yi dzɔɔ, yi tɛ wɛki le yi gɛɛŋ taashi. Se sooŋ yih yee, lɛ le lɛnti le ni giiŋgi Taashi bɛ bɛniiŋ bɛ yi yi dzɔɔ yɛɛ, le kiifɔɔ li bushi bu Taa Nyɔ. 4 Se nuuŋ le Taa Nyɔ tɛ toŋ mfiee yi tɛɛmi li dzɔɔ yi nyɔŋa yɛɛ, kiŋkuŋku ki tɛɛmi se nduŋgi bɛ dzɔɔ yilu ki leki le ki shaanshɛ yi yi dzɔɔ yɛ. 5 Bɛniiŋ bɛchu bɛ tɛ nindi lɛ yi yi dzɔɔ yɛɛ tɛ kɛmɛ chɛnɛ, wi mumkpaŋ mumkpaŋ bɛchi dii li nyɔ ye le yi fi be. Be se buushi bɛntɛ bɛ tɛ nuuŋ lɛ yi yi dzɔɔ yɛɛ be lɔnyi li dzɔɔ, le yi fuutɛ kii yi ni seri li dzɔɔ. Fi tɛ kɛti lɛ ɛ Jɔna bɔɔ lɛ kintsii kimu lɛ yi yi dzɔɔ yɛɛ lɛnti wu giŋ geki chilefɛ. 6 Ŋkunɛ yi yi dzɔɔ yɛ se buŋɛ Jɔna tee li wu-u le, “Dza we, fi geeŋ fi ɔ liiti fio bulefu? Dzatsɛ we ɔ teeŋ ya yi nyɔ, semukɛ yi kɔɔ nshiiŋ bɛ bee tɛ tɛ kwiyɛ kɛ.” 7 Bɛniiŋ bɛ yi yi dzɔɔ yɛɛ se tee li yi yi bee le, tɛ fiɛɛŋ yɛɛŋ tɛ kɛɛ laa bubiɛɛ buni biee bee kii noo le. Le be fiɛŋgɔɔ, yɛɛŋ kɔɔ Jɔna. 8 Si fi tɛ doonchɛ lɛ, be se bii li Jɔna laa, “Tee bee wi wu ŋgɛ wuni biee bee kii wu. Ɔ ti nindi nuuŋ la? Ɔ buti fɛŋ? Ɔ nuuŋ wi wu kwɛɛŋ wu la? Ɔ nuuŋ wi wu baŋ?” 9 Jɔna tuu le, “Ɛ mi wi wu Bɛhiburu, ŋguundi li Taa Nyɔ-ɔ, Nyɔ yi liboo, yi tɛ fɛ dzɔ́ɔ yi nyɔŋa bɛ nshɛ.” 10 Yí tɛ bɛŋ be kinɔŋa, be bii li wu-u laa, “Ɛ la fi ɔ mɔŋ ni?” Be tɛ bii lɛ kifɛ be tɛ kɛɛ le Jɔna tɛ kiifi bu kiifɛ le la li buushi bu Nyɔ-ɔ. Kifɛ tɛ saa wu tee be. 11 Si kiŋkuŋku kilu tɛ nduŋgi ki giiŋgi li mfwe bɛ buŋga lɛ, be se bii li Jɔna laa, “Ɛ la fi tɛ gii tɛ ge bɛ wɛ kiŋkuŋku kini se chikɛ?” 12 Tuu li bee le, “Buu yɛɛŋ mi nɛ lɔŋ li dzɔɔ yi nyɔŋa yini, se yi chikɛ. Ŋkiiɔ le ɛ kii mi wu kiŋkuŋku ki tɛɛmi kini bɛɛ lɛ be-eŋ. 13 Bɛniiŋ bɛ lɛ yi yi dzɔɔ yɛɛ tɛ tuu be gwenini le be tuu yi yi dzɔɔ yɛ fɛŋgo-oŋ be chiindi bɛ buŋga bu bee buchu be mɔŋ siŋ, kifɛ kiŋkuŋku ki tɛɛmi kilu tɛ giiŋgi bu limfwe. 14 Le fi nuuŋ lɛ, be de li Taa Nyɔ le, “Hoo-o Taa Nyɔ, tɛ suŋgi baa bɔ le kiiŋ ɔ ni woyɛ bee kii ntsɛ wu wi wuni kɛ, kiiŋ ɔ ni gɛɛ kwe yi wi wuni fɛ besɛ fa kɛ, kifɛ tɛ wo baa wu mɛɛŋ fiee ki fɛɛ kɛ, “Hooo Taa Nyɔ, ɔ fɛɔ fi nuuŋ si ɔ bee ɔ kɔŋgisi le fi nuuŋ.” 15 Be se chofi Jɔna be lɔŋ li dzɔɔ, dzɔɔ yilu se chikɛ ni nshiiŋŋ. 16 Fini tɛ fɛ bɛniiŋ bɛ tɛ nuuŋ lɛ yi yi dzɔɔ yɛɛ chɛŋ Taa Nyɔ ŋge be nyɛ muntofi li Taa Nyɔ-ɔ be tuu be fɛ bɛŋkaachɛ li yi-i. 17 Taa Nyɔ buu nsuuŋ yi nyɔŋa yi bɛ yi miyɛ Jɔna. Jɔna tɛ tsi lɛ nsuuŋ yɛ shéŋ jo taa fɛnshaaŋ bɛ butuu.