Jɔna lɛkɛ li Nyɔ-ɔ
2
Fɛ Jɔna tɛ nuuŋ lɛ nsuuŋ yɛ shéŋ, bɛchi lɛki li Taa Nyɔ yi nuuŋ Nyɔ ye. 2 Tɛ lɛki tiiti le, “Hoo-o Taa Nyɔ, fɛ mbee nuuŋ li ŋgɛ-ɛ mi nteeŋ wɛ ɔ woo mi. Fɛ mbee nuuŋ li kwɛɛŋ wu bɛŋku-u fɛkwiiŋ, mi nde li wɛ-ɛ ɔ woo kwe yɛŋ. 3 Ɔ bee ɔ finchi mi, mi nseri mi mbɔɔ fɛkwiiŋ fɛtɛ kibɛɛ, mɔɔ lɛ dzɔɔ li lɛkwiiŋ kibɛɛ, dzɔɔ lɛɛndi lɛ mi-i lɛwe, biŋkuŋku-u bi tɛɛmi bi dzɔɔ lɛ se kɛti lɛ mi-i lɛwe. 4 Mbee mbeechi le ɔ kooŋɔ bɛ mi li bushi bwo-o, se nuuŋ le mbeenchɔɔ le ŋgii ŋɛŋ yi ya yi muntofi yi waaŋ bɛ lii yɛɛŋ. 5 Dzɔɔ tɛ baanyɛ mi, mbɛchi nsukini, dzɔɔ yi nyɔŋa baanyɛ mi dududu kitɔɔ ki lidzɔɔ liiŋ kikoo keŋ. 6 Mbee nseri fɛtɛ, fɛ bɛŋkumɛ bɛɛchi, li kwɛɛŋ wu wi ti giiŋgi ŋkaarisɛ tɛ naa nuuŋ lu kɛ. Se nuuŋ le, Hoo-o Taa Nyɔ wu Nyɔ yɛŋ, ɔ se buu mi fɛ sechi fɛɛ mɛɛŋ we. 7 Mfi wu mbee ŋkwi-i, mi ŋkimi wɛ Taa Nyɔ, nse mi nlɛkɛ li wɛ-ɛ, ɔ woo nlɛkɛ wɛŋ li yi ya yi muntofi yi waaŋ li. 8 Bɛniiŋ bɛ guundi bɛnyɔ bɛ lɔɔlɔ, lɛɛ baa kimbɔnɛ ki bee nuuŋ be kɛmɛ li Taa Nyɔ-ɔ. 9 Se nuuŋ le li mi-i, ŋgii ni n'yuuti jumi chi n'yɔɔnchɛ nyɛɛ kiyɔɔni li wɛ-ɛ. Ŋgii mfɛ fintofi mɔɔ fiee fi mbee ŋkaachɛ ŋgii mfɛ li wɛ-ɛ. Ɛ wɛ kwaa ɔ nuuŋ ɔ fi wi” 10 Jɔna lɛkɛ li Nyɔ-ɔ lɛ, Taa Nyɔ se yɔ li nsuuŋ yilu yi yaŋ Jɔna libuka.