Jɔna beŋ gɛɛŋ fintoŋ fi Nyɔ Ninibɛ.
3
Taa Nyɔ tuu ka tee li Jɔna kiŋga kifɛ le, 2 “Dzatsɛ ɔ gɛɛŋ Ninibɛ li kitoŋ ki nɔŋa kɛɛ ɔ dzaaŋ ntoŋ wu ntuu ntee wɛ wɛ li ki-i.” 3 Bɛdɛɛni, Jɔna woo jɛ yi Taa Nyɔ gɛɛŋ Ninibɛ. Ninibɛ wuni tɛ gii nuuŋ kitoŋ ki tɛ gbɛɛŋ ki ko kinɔŋa ki bɛ dzeti jo taa bɛ se naa dansɛ ki lɛnti. 4 Jɔna gɛɛŋ jobɛ chi ŋkosi bɛchi dzɛŋgi li kitoŋ kɛɛ le, “Shɛɔ jo mbaanyɛɛ, Nyɔ lɛɛshɛ Ninibɛ dududu.” 5 Si bɛniiŋ bɛ Ninibɛ baa tɛ woo jɛ yi Nyɔ lɛ, be beŋ li yi-i. Be teeŋ njiru biee li bɛniiŋ bɛchu-u, be liishɛ ndú yi kwe li bwiŋ bɛniiŋ bɛnɔŋa bɛnɔŋa mɔɔ bɛntɛŋ bɛntɛŋ le fi doonchɛ le be fiiki baa shéŋ li bibifi bi bee. 6 Mfi wu ŋkuŋ wu Ninibɛ tɛ woo ntoŋ wuni dza li kabara we liwe, buu biŋkoŋ biee liishɛ nuuŋ ndú yi kwe li bwiŋ shee fɛkwiiŋ li taŋɛ linti. 7 Se buu nchi bɛ dɛndɛ bɛ tee Ninibɛ kwikwi le ŋkuŋ bee bɛ njii bee tee baa le, “Wi kɛ nya kii ni mɔŋ fiee lɛwa kɛ. Kiiŋ wi ni ji fiee, kɛ woŋ fiee kɛ, mɔɔ bɛnaŋ kɛ nshɔ́ɔŋ. 8 Bɛniiŋ bɛchu kɛmi le be liishɛ ndú yi kwe, be liiŋ nyáŋ bɛ ndú yi kwe yimi be ni be dii li Nyɔ-ɔ bɛ shéŋ yi be chi, be chinɛ li biee bibifi bɛ biŋge bi bee bibifi. 9 Ɛ noo wu kii, semukɛ Nyɔ nuuŋ fiiki mbeechɛ we, yi chinɛ shéŋ yi kinɔŋa yi kɛmi kii bee yɛɛ tɛ tuu le lɛɛshɛ bee kɛ.” 10 Si be tɛ fɛ lɛ, Nyɔ ŋɛŋ fiee fi be fɛ si be chinɛ li kiŋge kibee kibifi, se fiiki mbeechɛ we li ŋgɛ wu tɛ nuuŋ le tuumi li bee, ba ntumisɛ nsiŋ.