Jɔna dzɔ shéŋ kii nshiiŋ yi Nyɔ li bɛniiŋ bɛ Ninibɛ
4
Si Nyɔ tɛ kɔɔ nshiiŋ bɛ bɛniiŋ bɛ Ninibɛ-ɛ lɛ, fiee filu tuu fi bee fɛ Jɔna-a kinɔŋa bɛchi dzeti shéŋ. 2 Lɛkɛ li Taa Nyɔ tee le, “Hoo-o, Taa Nyɔ fini nuuŋ nɛɛ fiee fi ntuu ntee mɛɛŋ li kwɛɛŋ wɛɛŋ ni?” Fiɛɛ fiee fi tuu fi fɛ le mbakɛ nletɛ ŋgɛɛŋ Taashi, ntuu ŋkii le ɔ nuuŋ Nyɔ yi kɛmi shéŋ yi dzeeŋ fɛ bɛniiŋ li, yi kɛmi nshiiŋ, yi dzeti yɛ shéŋ tsɛkɛ kɛ, kiŋkɔŋgisɛ ko li bɛniiŋ li ti mɛɛ yɛ kɛ, ɔ ti fikisi mbeechɛ wa li mbɛ bɛ ŋgɛ li bɛniiŋ li. 3 Bɛdɛɛni, “Hoo-o Taa Nyɔ mi nsooŋ bɔ, fi ntsɛ wɛŋ li mi-i, fi fiɛɛ bujɔŋ le ŋkwi yuti fɛ nuuŋ ni ntsiiŋ laaŋ we.” 4 Taa Nyɔ bii li wu-u laa, “Ɔ kɛmi buŋga bu ɔ nuuŋ ɔ dzɔ shéŋ ni?” 5 Jɔna dza bo li kitoŋ kɛɛ, gɛɛŋ fɛ kintsii kimu lɛ kimbɛ ki wiiŋ tɛti le. Gwaŋ kitara, shee lɛ kiyuundɛ ki kitara kilu, tɛŋgi le ŋɛŋ fiee fi gii fi ka bɛ kitoŋ ki Ninibɛ kilu. 6 Taa Nyɔ wu nuuŋ Nyɔ fɛ fikiŋgeetɛ bo fi laaŋ lɛ Jɔna lɛ we le fi fɛ wu fufɛ bujɔŋ. Bɛdɛɛni Jɔna se woo bujɔŋ kinɔŋa kii fikiŋgeetɛ filu. 7 Le butuu woo, Nyɔ tuumi ndzɔɔ yi ji fikiŋgeetɛ filu fi wɔɔbɛ fi wondɛ. 8 Le jobɛ ta Nyɔ tuumi mfiee yimi yi ti buti kimbɛ ki jobɛ tɛti, yi yuusi tsoo. Wiiŋ se bɛndi tɛ li kikoo ki Jɔna yí mbɔɔmɛ wu, tee le, “Fi dzɔɔŋ le ŋkwi bukwɛɛ yuti fɛ nuuŋ ni ntsiiŋ laaŋ we.” 9 Nyɔ se bii li Jɔna laa, “Ɔ kɛmi buŋga bu ɔ nuuŋ ɔ dzɔɔ shéŋ kii Fikiŋgeetɛ fini ni?” Jɔna se tuu le, “Miɔ bɛ buŋga kinɔŋa le ndzɔɔ shéŋ, ndzɔɔ shéŋ nsiiŋ ŋkwi bukwɛɛ.” 10 Taa Nyɔ se tee le, “Sheŋ tɔnyi wɛ kii Fikiŋgeetɛ fini fi ɔ tuu mɛɛŋ ki tɔyɛ kɛ, kɛ le ɔ fɛ fi ko kɛ, fi tuu bo fi ko, le butuu woo fi kwi. 11 Nse ŋgii leeki ŋkɔɔ kɛ nshiiŋ bɛ Ninibɛ kitoŋ kinɔŋa kɛɛ ni? Ki kɛmi bɛniiŋ yɛki bɛnchuki gwii bɛ kitsɔ mbaamfiɛɛ (120,000) bɛ kii yɛ chichi wu bujɔŋ bɛ bubiɛɛ bubee kɛ. Ki kɛmi tɛ kintutu ki nyáŋ fe kinɔŋa.”