2
Ogwu òfiat Ikan Awaji
1 Bọn Nte n̄a, òfo me lek inunu eyi Okaan̄ kiji Jisọs Karais obokpọk inu, mè chinichini eyi eji melek kan̄ ebegbaan̄ ichichini, eji ekibeek enyi ibe, 2 soso, ikagwat lek ìsisik ejit, mè ìfieek owot mije ukpatu eyi ekikpa ikana ibe ke usen Okaan̄-ene obonu îra inunu iraka. Ubọk geelek ekitumu ibe ke îre eji eben etip yi me nriran, mè ikijeen̄ si me ikọ otu, mè ige itap me ikpa iria ijet enyi, ikachieek! 3 Ikachieek ibe ene geege ifiaan̄ enyi, mije, usen ya ìkabonu, îtata mgbọ ikpele unye-ibot, mgbọ ebi ene mêkije ikeme Awaji ìdadasi ire.
Emen mgbọ unye-ibot ya ke ogwu òfiat Ikan Awaji obosan̄a lek kan̄ isibi. Awaji îwuuk lek isun̄ ibe ke ọmọ môjijaka ene yi me ama yọk. 4 Ene yi môbene lek kan̄ ifo inyọn̄, mè ikije ikeme inu geelek ebi ene ekitọbọ ebum inyi mè ikimọnọ kire Awaji kiban̄. Sa me ibene-lek yi, ene yi môraka inin̄ emen Uwu Mbuban isi isiki ikweek, mè ikitumu ibe ke ọmọ me lek kan̄ ore Awaji. 5 Ìre enyi kpeyaka ikeek ibe ke nkitumu ikọ yi inyi enyi mgbọ ngọọkbe enyi ikup? 6 Enyi me lek kinyi mîriọọn̄ inu òtetet ene yi ikaan̄, inyi ikakọt ìsan̄a lek kan̄ ìsibi mgbọ keyi mege ire mgbọ mgbọ kan̄ môrebe. 7 Mgbọ keyi, unye ya eyi òkirọ inyi ebi ene ekefiat Ikan Awaji ọmọ òwa onween̄be lek ilet ikup ikisi ikwaan̄ me linyọn̄ keyi. Ire, îkaan̄ ogwu òkikpukput. Unye ya ìkpokọt isan̄a lek kan̄ isibi mege ire mgbọ Awaji môsan̄abe ogwu òkikput ọmọ ya isan̄a. 8 Mgbọ ya ke ogwu òfiat Ikan Awaji ya me lek kan̄ obosan̄a lek kan̄ isibi. Ire, Okaan̄-ene Jisọs isinu, môsa efet otu kan̄ ikpan̄ ene ya, mè isa ikpele utoon̄ kan̄ ifiat unye ene ya mè ubọk ikwaan̄ ene ya isan̄a kpai. 9 Ogwu òfiat Ikan Awaji ya ìbonu me unye eyi Yọk, mè ikirọ owuwa inu ukechieen̄, mè ofiaan̄ ofiaan̄ inu ijejeen̄, mè ataak ataak inu ukpook òkup esese esese. 10 Môsa ikpak ikpak lek ataak geelek ifiaan̄ ebi Awaji osun̄be ibe echechep. Ife chi ebechep, mije ema ekachieekge imama atikọ eyi Awaji, eyi mesabe inyan̄a ema isibi.
11 Mije ema ejitbe atikọ yi, Awaji îtap ema ikpele welewele, inyi ema ekechieek ikọ ataak geelek ene geelek otumube inyi ema. 12 Sa me ikeyi, otutuuk ebi ìkinwọọn̄ irọrọ ijo inu, mè ijit ichechieek me lek atikọ Awaji, Awaji môtip ema oyerebet.
Îgbe ibe ebi Awaji ogobobe ekeke enye
13 Ire, bọn Nte n̄a ebi Okaan̄-ene omabe, îgbe ibe eji ekenyi Awaji itọn̄ mgbọ geelek mije kinyi. Awaji ìgobo enyi bene me ibebene, inyi enyi enechieek me lek atikọ kan̄, mè Ekwukwu Mbuban isan̄a enyi isun̄ esese inyi ọmọ, mè ọmọ isa me lek inu chi inyan̄a enyi isibi. 14 Îre ata etip eji elookbe enyi ke Awaji osa igwen enyi itap me emen unyan̄a yi, inyi enyi enegọọk ekaan̄ irek me emen ujamgbugbo eyi Okaan̄ kiji Jisọs Karais. 15 Eya orọ, bọn Nte n̄a, ìkeke ìnye, mè ìtet otutuuk atikọ cha, echi eji ejeen̄be enyi me ikọ otu mè echi eji egebe me ikpa ijet enyi ìnye.
16 Kè Okaan̄ kiji Jisọs Karais me lek kan̄, mè Awaji ogwu Nte kiji, ogwu òmun̄ eji me chieen̄, mè isa atata nnwọn kan̄ inyi eji ukarajit eyi ikakaan̄ge itata, mè irọ inyi eji ekaan̄ atata ikpọchieen̄ me lek kan̄, 17 ikat enyi ejit, mè itap enyi efuuk me owot me emen ata inu geelek enyi ekirọ, mè ata ikọ geelek enyi ekitumu!