Òso Ikpa Etip Iba Pọọlu Ogebe Ijet
Ebi Teselonaika
1
1 Emi Pọọlu mè Sailas mè Timọti ege ikpa etip yi ijet enyi ebi ntitiin̄ Awaji me ama Teselonaika, ebi ìrere ebi Awaji ogwu Nte kiji mè Okaan̄-ene Jisọs Karais ekaan̄be.
2 Atata nnwọn mè esuuk eyi Awaji Ute mè Okaan̄-ene Jisọs Karais ikup inyi enyi.
Pọọlu îtọn̄ Awaji mè iriaak uriaak me ibot ebi Teselonaika
3 Bọn Nte n̄a, îgbe ibe eji eketọn̄ Awaji mgbọ geelek mije kinyi. Irọrọ ikeyi ìkpọkpọ itat, mije, ichechieek kinyi ìkpọkpọ ikimin, imumechieen̄ enyi ekaan̄be me etete kinyi si ìkpọkpọ ikimin. 4 Eya orọ eji ekisa enyi igugo lek inyi ntitiin̄ Awaji geelek, mije enyi ekatbe ejit, mè ikeke inye me ichechieek kinyi me emen otutuuk ntọ-mkpọ geelek òkinu inyi enyi, mè emen irọrọ ikeme geelek eyi ebi ene ekirọ ikeme enyi.
5 Ike enyi ekekebe inye me emen ufialek chi geelek, ìkijeen̄ ibe ke oyerebet Awaji ìre unen. Mije enyi ekekebe inye, Awaji îfuk enyi kubọk ebi ìgbegbe igọgọọk ikaan̄ uche me lek ugbana eyi mkpulu kan̄, eyi enyi ekibak me lek ibọkọ ufialek chi. 6 Awaji ìre ogwu òkirọ inu òtatat mgbọ geelek. Eya orọ, ogwu itap enyi ufialek me lek, Awaji môtap si ene ya ufialek me lek. 7 Enyi ebi ìkukup me emen ufialek mgbọ keyi, Awaji mônyi enyi melek kiji isiki-efuuk me mgbọ Okaan̄-ene Jisọs môjebe melek ukan̄ òkisasak inan̄a me emen inyọn̄ isibi inu, ọmọ melek unye unye ebi osat kan̄. 8 Mgbọ ya, ebi ekariọọn̄ge Awaji, mè ebi geelek ekachieekge igbagban̄ utọn̄ me lek ata etip eyi Okaan̄-ene Jisọs, Okaan̄-ene môsulu ema osusut. 9 Okaan̄-ene môjijaka ema isi ire mgbọ ikakaan̄ge itata, mè ilap ema isan̄a me isi kan̄, inyi ema ekakaan̄ uche me lek ujamgbugbo mè unye kan̄. 10 Inu chi ìbomọnọ irek me usen Okaan̄-ene mônube inibọkọ itọn̄ me etete ebi kan̄, mè ibọkọ umin me etete ebi geelek ìchechieek me lek kan̄. Enyi si me otu ifuk ebi ìbenyi ọmọ umin mè inwọọn̄ ọmọ, mije, enyi mîchieek me lek ata etip kan̄ eyi eji elookbe enyi. 11 Eya orọ, eji ekiriaak uriaak mgbọ geelek me ibot kinyi ibe mè Awaji kiji irọ inyi enyi eluk ugwem ògbegbe igwen eyi îgwenbe enyi. Eji ekiriaak si uriaak ibe Awaji isa unye kan̄ irọ inyi ata ulọk geelek enyi ekaan̄be irọ iso, mè irọ si inyi inu geelek enyi ekirọ bak me lek ichechieek enyi ekaan̄be ije ijaan̄. 12 Mije, sa me ikeyi, erieen̄ Okaan̄ kiji Jisọs môbọkọ itọn̄ inan̄a me ugwem kinyi. Enyi si mêbọkọ itọn̄ me emen Okaan̄-ene inan̄a me lek atata nnwọn eyi Awaji kiji mè Okaan̄ kiji Jisọs Karais.