3
Mbeek uriaak Pọọlu obeekbe
1 Bọn Nte n̄a, me ikakana ikọ n̄a igwook, ǹkibeek enyi ibe, ìriaak uriaak me ibot kiji, inyi ikọ Okaan̄-ene igwat lek ikana ere geelek, mè ebi ene enyi si ikọ yi umin kubọk enyi enyibe. 2 Ìriaak uriaak si ibe Awaji inyan̄a eji me ubọk ebi ikpak mè ebi ijo ife, mije, ìkare otutuuk ene echieek me lek kè Jisọs Karais. 3 Ire, Okaan̄-ene ìre ogwu atikọ. Ọmọ môtap enyi efuuk me emen, mè ibem enyi, inyi enyi ekanin̄ me ubọk ogwu ochicha, òrere Yọk. 4 Eji mîtoon̄ ejit ibe ke Okaan̄-ene môrọ inyi enyi ekerọ inu geelek eji ebe enyi erọ, mè ekerọ si ikeya efo isi. 5 Kè Okaan̄-ene isa ejit kinyi ifo lek imumechieen̄ eyi Awaji okaan̄be me lek kinyi, mè ukarajit eyi Karais okinyi.
Irọrọ ikwaan̄ îkup me uyọt, irere ugbek ìkanwọn
6 Bọn Nte n̄a, eji mîsa me erieen̄ Okaan̄-ene Jisọs Karais inyi enyi ida ibe, ìkpebe lek kinyi me lek bọn Nte geelek ìrere ugbek, ebi kpekirọ orọmijọn̄ eyi enyi ekween̄be me ubọk kiji, òrere ikekisi ikwaan̄. 7 Enyi me lek kinyi mîriọọn̄ ibe ke îgbe ibe enyi ekekpọ inu me ubọk kiji erọ. Eji kpere ebi una ifi mgbọ eji egọọkbe enyi ikup. 8 Eji kpebọkọ ene geege inorie irie me eji ekakpege ewe. Kpan̄asi ikeya, eji ekisi ikwaan̄ eririeen̄ mè ikarek, mè ikikwukwulu ikeya isa ikikpukpo lek kiji, inyi eji ekaben ufialek kiji ìnikeme ene geege me etete kinyi. 9 Ìkare ibe ke eji kpegbe ebi enyi mekpọbe owot ke eji ebak me lek ikikpọ lek kiji. Ire, eji erọ ikeya, inyi enyi ekpọ inu me ubọk kiji erọ. 10 Eya orọ, mgbọ eji egọọkbe enyi ikup, eji mînyi enyi ikan ibe, “Ene geelek ikasige ikwaan̄, ikarie inorie!”
11 Eji etumu ikọ yi, mije, eji mînọ ibe ke usini kinyi ìre ugbek, kpekirọ inu geege igak ijeje ikana ikikpa ene. 12 Eji mîsa me erieen̄ Okaan̄-ene Jisọs Karais inyi ojelek ife ìkup ikeya ida, mè itaba ema ubọk me utọn̄ ibe egele lek egwook, mè esi ikwaan̄ ekesa ekpọ lek kiban̄. 13 Bọn Nte n̄a, ikachieek ibe efuuk ita enyi me owot irọrọ ata inu.
14 Ikaan̄ ene geelek òjijit irọrọ inu eji egebe inyi enyi me emen ikpa yi, ìgwuun̄ chieen̄ me lek ene ya. Ikachieek ibe ene ya igọọk enyi igbaan̄ irọ inu geege, inyi esip itet ene ya. 15 Ire, ikamọnọ ene ya kubọk ogwu ochicha. Kpan̄asi ikeya, ìtaba ọmọ ubọk me utọn̄ kubọk gwun̄ Nte kinyi.
Òta amọn Pọọlu otọpbe ebi Teselonaika
16 Mgbọ yi, Okaan̄-ene me lek kan̄, ogwu òkinyi ene esuuk, inyi enyi esuuk me oniin̄ kinyi geelek me mgbọ geelek! Okaan̄-ene ikup inyi enyi otutuuk ene!