4
Ichechieek ke Awaji osa isan̄a itip-oyerebet me ibot kè Ebereyam
1 Mgbọ keyi, ìre keke ke eji ebekọt itumu ofolek kè Ebereyam nte nte kiji ukot ikaan̄? Ìre keke ke ọmọ me lek kan̄ oweek isibi? 2 Mebe ke Ebereyam ìkana ogwu ata irọrọ me isi Awaji sa me inu îkọtbe irọ, kè òkaan̄ inu mokọtbe isa ikigugo lek. Ire, gogolek keya kpomore me isi Awaji. 3 Ìre keke ke Ikpa Mbuban otumu ofolek kè Ebereyam? Ikpa Mbuban ìbe, “Ebereyam îchieek ikọ Awaji otumube, Awaji osasa mije keya ifuk ọmọ kubọk ogwu ata irọrọ.”a 4 Ogwu òsi ikwaan̄ îkibọkọ mkpukpe ubọk ikwaan̄ kan̄. Kpekicheche mkpukpe ya inyi ọmọ kubọk uche. Ekikpekpe mkpukpe ya inyi ọmọ mije ikwaan̄ îsibe. 5 Ire, ìkakup ikeya me lek ogwu òchechieek me lek Awaji ogwu òkirọ inyi ebi ijo ekana ebi ata irọrọ. Ubọk geelek ene ya ikarọge ikwaan̄ geege, Awaji ìsa me ichechieek ene ya ifuk ene ya kubọk ogwu ata irọrọ, ìkare me lek ikwaan̄ ene ya osibe. 6 Ikọ yaage si ke ogwu ubọọn̄ Debit otumu, mgbọ îtumube ikọ ofolek ugbana òkukup inyi ene geelek Awaji ofukbe kubọk ogwu ata irọrọ me oniin̄ eyi ikagbaan̄ge me lek isisi ikwaan̄.
7 Debit ìtumu ibe,
“Uga ubelejit okup inyi ebi Awaji otelebe nrọ-nlọ kiban̄ inyi,
mè ichit ijo inu kiban̄!
8 Uga ubelejit okup inyi ene ya
ogwu Okumugwem ìkpoyakabe
ifuk nrọ-nlọ kan̄ itoon̄ me ibot.”b
9 Uga ubelejit eyi ogwu ubọọn̄ Debit otumube ikọ ofolek yi, ìre ìkup inyi ebi efieekbe afi gaalek? Sà ìre îre si lek ebi kpefieek afi? Eji mîwuuk lek ikitumu ibe ke Awaji ìfuk Ebereyam kubọk ogwu ata irọrọ mije ichechieek kan̄. 10 Ìre mgbọ owa ke Awaji ofuk Ebereyam kubọk ogwu ata irọrọ? Ìre mgbọ îfieekbe afi isan̄a, sà ìre sabum înifieek afi? Ìkare mgbọ îfieekbe afi isan̄a. Inu yi îrọ sabum înifieek afi. 11 Eya orọ, efieek Ebereyam afi kubọk iman̄ òriọọn̄ isasa ijeen̄ ibe ke ọmọ îkana ogwu ata irọrọ. Ọmọ ìkana ogwu ata irọrọ ya mije ichechieek îchieekbe me mgbọ ikafieekge afi nu. Mije keyi, Ebereyam ìre ute inyi otutuuk ebi ìchechieek me lek Awaji, mè isa me ikeya ikana ebi ata irọrọ, ubọk geelek kpefieek ema afi. 12 Ebereyam ìre si nte nte otutuuk ebi ìfefieek afi mè ikaan̄ si ichechieek igbaalek ifefieek afi. Ìkare ebi ìfefieek afi gaalek. Îre ebi ìfefieek afi mè ikaan̄ si ichechieek ya eyi Ebereyam nte kiji okaan̄be sabum înifieek afi.
13 Ofifi si, mgbọ Awaji ochieekbe use ibe ke ọmọ môsa otutuuk linyọn̄ inyi Ebereyam mè bọn owot iman kan̄ me ìrot, ìkare mije Ebereyam osun̄be Ikan kè Mosis. Îre mije Ebereyam ochieekbe me lek Awaji, mè isa me ikeya ikana ogwu ata irọrọ. 14 Mije, ire ke îre ebi ìsusun̄ Ikan kè Mosis ebekaan̄ linyọn̄ me ìrot, ìsibi ibe ke ichechieek me lek Awaji ìre inu ikike ikakaan̄ge oruru, use eyi Awaji ochieekbe ya si ìkakup me lek inu geege. 15 Mije, bak me lek ebilene kpekikọt isun̄ otutuuk Ikan kè Mosis, Ikan cha ìkisa unaan̄-ejit Awaji inu. Ire, ere ikan ikakupge, kpekirọn̄ ikan.
16 Eya orọ, use Awaji ochieekbe ya ìkinu inan̄a me ichechieek, inyi ije me atata nnwọn Awaji gaalek. Use ya si ìkup inyi otutuuk bọn owot iman kè Ebereyam. Ìkakup ìnyi ebi ìkisun̄ Ikan kè Mosis gaalek, ìkup si inyi ebi ìkakaan̄ ojelek ichechieek kè Ebereyam. 17 Ikeyi ke ege me Ikpa Mbuban ibe, “Nrọ owu ute inyi owuwa ido.”c Ebereyam ìre nte kiji me isi Awaji ogwu ọmọ me lek kan̄ si ochieekbe me lek, Awaji ogwu òkitap ugwem me emen ebi ìkwakwaan̄. Ọmọ si okisa ikọ otu irom inu isibi me ere inu kpunube.
18 Me ere kpunube ikpọchieen̄ geege, Ebereyam osasa me ikpọchieen̄ ichieek ikọ Awaji otumube, mè isa me ikeya ikana ute inyi owuwa ido. Ike egebe me Ikpa Mbuban, Awaji ìtumu inyi Ebereyam ibe, “Ikeya ke bọn owot iman kwun̄ ebewa ikup.”d 19 Mgbọ Ebereyam okikup ikpọ use ya, îriọọn̄ ibe, mije ọmọ okanbe iso efit acha ge, ke akpalek kan̄ îwọ ikup kubọk eyi nkwukwu ene, mè iriọọn̄ si ibe, mije ukan, ke owot kè Sera nwa kan̄ si îwọ ikup kubọk eyi nkwukwu ene. Ire, ìkachieek ibe ichechieek kan̄ iwọ. 20 Ìkakaan̄ si ejit iba me lek use Awaji ya, kubọk ogwu una ichechieek. Kpan̄asi ikeya, ìtetet lek inye me emen ichechieek kan̄, mè isa itọn̄ inyi Awaji, 21 mije, îriọọn̄ ijaan̄ lek ibe ke Awaji îkaan̄ unye isasa irọ use ya îchieekbe ọmọ iso. 22 Eyi ke Awaji osa ifuk Ebereyam kubọk ogwu ata irọrọ. 23 Usem ya egebe ibe, “Eyi ke Awaji osa ifuk ọmọ kubọk ogwu ata irọrọ,” kpege ibak Ebereyam gaalek. 24 Ire, usem ya ìkup inyi eji si ebi Awaji obofuk kubọk ebi ata irọrọ, eji ebi ìchechieek me lek kan̄, ọmọ ogwu òjojomo Okaan̄ kiji Jisọs Karais me mkpa. 25 Mije, Awaji ìsa Jisọs inyi ibe inikwu mkpa mije ijo inu kiji, mè iyaka ijomo ọmọ me mkpa, inyi iniben itip-oyerebet isan̄a me ibot kiji.