3
1 Ire ikeya, ìre keke ke irere ogwu Ju osa inwọn igak ekarege ogwu Ju? Sà ìre keke ke ifefieek afi osa inwọn igak ekafieekge afi? 2 Me atikọ, irere ogwu Ju îkaan̄ owuwa oruru me agan̄ geelek. Me adasi irek, îre ebi Ju ke Awaji osa ikọ kan̄ itap me ubọk.
3 Ire usini kiban̄ kpekeke inye me emen inu ema echieekbe me lek, ìre eya môkọt irọ inyi Awaji ikakeke ìnye me emen use îchieekbe ema? 4 In̄-in̄, eya ìkpokọt irọ! Awaji ìkpolọlọ irere ogwu atikọ, ìrere ibe ke otutuuk ebilene ìre ebi ataak, kubọk egebe me Ikpa Mbuban ibe,
“Sa me ikeyi, ire otumu ikọ, ikọ kwun̄ ìbore atikọ.
Ire osi oyerebet, oyerebet ìbonwọnwọn owu.”a
5 Ire ijo inu kiji irọ inyi ata irọrọ eyi Awaji isibi utoon̄ ijaan̄, ìre keke ke eji ebetumu? Ìre eji mêtumu ibe ke unaan̄-ejit Awaji onaan̄be inyi eji ìkatat? Ifuk-ibot ebilene ke nkisa igbini ikọ yi. 6 In̄-in̄, ìkare ikeya! Mije, ire Awaji ìkare ogwu ata irọrọ, ìre ìbojeje ikọt isibi oyerebet me ibot ebi linyọn̄? 7 Ofifi ene môkọt igbini si ibe, ire ugwem ataak kan̄ itap ubọk irọ inyi atikọ Awaji isibi utoon̄, mè irọ inyi Awaji isa me ikeya ibọkọ itọn̄, ìre Awaji ìjeje ikitip ọmọ oyerebet si ibe ke ọmọ ìre ogwu ijo? 8 Mebe ke îre ikeya ke îkup, inu eji mekijeen̄ ìre, mè eji otutuuk ene ekpọkpọ ekerọ ijo inu, inyi ata inu ikinu. Ire, ìkare ikeya ke eji ekijeen̄. Me atikọ, usini ene mêkitumu eji ifiat, mè ikikpa inyi ebi ene ibe ke eyiyi ore inu eji ekijeen̄. Itip-oyerebet eyi Awaji obotip ema îgbe.
Kpunu ogwu ata irọrọ me linyọn̄
9 Mgbọ keyi, ìre keke ke eji ebeyaka itumu? Ìre eji ebi Ju mînwọn igak ebi ofifi ife? Eji kpenwọn igak ema kubọk ge! Eji mîwuuk lek ijeen̄ ibe ke otutuuk ene ìre ìkike, ebi Ju mè ebi kpere ebi Ju, ema otutuuk ìre ebi ijo. 10 Mîge si me Ikpa Mbuban ibe,
“Kpunu ene geege òrere ogwu ata irọrọ,
kpunu kubọk ge!
11 Kpunu ene geege òkikọt igobo inu eyi Awaji itet,
kpunu si ene geege òkiweek Awaji.
12 Otutuuk ene mîtele Awaji,
mè ifiat isan̄a, kpeyaka ikup me lek inu geege.
Kpunu ene geege òkirọ inu òtatat,
kpunu kubọk ge!b
13 Ikọ òkisibi ema me emen ebek ìkijọ
kubọk udọn̄-ufuun̄ ekachitge otu.
Ema ekisa alọm kiban̄ itumu ikọ ifiaan̄ ene ifiin̄.c
Ikọ òkinan̄a ema me otu isibi ìkifiat ene
kubọk iwot òkup me otu ijo ulu.d
14 Ijo ikọ, mè ogbo ojot ema otu.e
15 Ema kpekifiat mgbọ isasan̄a ugwem ene.
16 Ere geelek ema erebe, ema ekifafiat inu igwook,
mè èketap ebi ene me ufieejit mè ichep.
17 Ema kperiọọn̄ inu esuuk orebe.f
18 Ukpook Awaji geege kpunu me emen kiban̄.”g
19 Mgbọ keyi, eji mîriọọn̄ ibe, inu geelek Ikan kè Mosis okitumu, ke ìkitumu inyi ebi ìkup me irak Ikan ya, inyi otu ebilene ichit, mè ekakaan̄ inu ebesa itumu inyan̄a lek kiban̄. Sa me ikeyi, ema mêriọọn̄ ibe ke otutuuk ebi linyọn̄ ekup me irak oyerebet Awaji. 20 Kpunu ene geege òbokọt ikana ogwu ata irọrọ me isi Awaji inan̄a me isusun̄ Ikan kè Mosis. Kpan̄asi ikeya, inu Ikan kè Mosis okirọ ìre irọrọ inyi ene iriọọn̄ ibe ke ọmọ ìre ogwu ijo me atikọ.
Ichechieek gaalek ke ene obosa ikana ogwu ata irọrọ
21 Me mgbọ keyi, Awaji îjeen̄ eji oniin̄ eyi kan̄ eyi ene môsabe ikana ogwu ata irọrọ me isi Awaji. Oniin̄ ata irọrọ keyi ìkagbaan̄ me lek Ikan kè Mosis. Ikan kè Mosis mè inu ebi Nriran egebe îrọ oniin̄ ata irọrọ keyi inye. 22 Awaji ìkirọ mè ene ikana ogwu ata irọrọ me isi kan̄ inan̄a me lek ichechieek ene ya ochieekbe me lek kè Jisọs Karais. Awaji ìkirọ inu yi inyi otutuuk ebi geelek ìchechieek me lek kè Jisọs Karais, mè ìre ebi Ju, mè ìyaka ire ebi kpere ebi Ju. Kpunu esese geege òkukup. 23 Mije, otutuuk ene mîrọ ijo inu, kpekọt ikaan̄ ujamgbugbo eyi ònan̄a me ubọk Awaji. 24 Ire, bak me lek atata nnwọn eyi Awaji onyibe eji me ikike, Awaji ìkayaka ìtip eji oyerebet, mije, Karais Jisọs îfaka eji isibi me emen itip-oyerebet Awaji. 25 Awaji ìsasa Karais inyi ibe inikwu mkpa me ibot ebilene kubọk ngwugwa esabe irọ esuuk, inyi ọmọ itele ijo inyi ebi geelek ìchechieek me lek kè Karais. Awaji ìrọ inu yi isasa ijeen̄ ibe ke ọmọ ìre ogwu ata irọrọ. Mije, Awaji îsa me ujọn̄ọ ukarajit kan̄ ikpọ chieen̄ ilọ me lek ijo inu ebilene erọbe me mgbọ òraraka, ìkasulu ema osusut. 26 Awaji ìrọ inu yi, inyi ọmọ isa ijeen̄, me mgbọ keyi, ibe ke ọmọ ìre ogwu ata irọrọ, mè ogwu òkirọ unen, mè ire si ogwu òkisan̄a itip-oyerebet isan̄a me ibot ebi geelek ìchechieek me lek kè Jisọs.
27 Ire ikeya, inu eji ekisa ìgugo lek ya ìkup me owa? Ìkayaka ìkup! Ìre keke orọ mè ikayaka ìkup? Ìre mije eji esun̄be Ikan kè Mosis? In̄-in̄, ìkare! Îre mije eji echieekbe me lek kè Jisọs Karais. 28 Mije, eji ekitumu ibe ke Awaji ìkisan̄a ene itip-oyerebet me ibot sa me ichechieek, ìkare sa me isusun̄ Ikan kè Mosis. 29 Ìre Awaji ìre Awaji ebi Ju gaalek? Ìre ìkare ọmọ yaage ore Awaji ebi kpere ebi Ju? Iin̄, me atikọ, ọmọ yaage ore si Awaji ebi kpere ebi Ju, 30 mije, Awaji ge gaalek okup. Ọmọ si obosan̄a itip-oyerebet isan̄a me ibot ebi Ju, òrere ebi efieekbe afi, sa me lek ichechieek ema echieekbe me lek kè Jisọs Karais, mè isan̄a si itip-oyerebet isan̄a me ibot ebi kpere ebi Ju sa me lek ichechieek yaage si. 31 Ìre ìsibi ibe ke eji mîsa ichechieek yi inigwak Ikan kè Mosis isan̄a? In̄-in̄, ìkare ikeya. Kpan̄asi ikeya, eji ekirọrọ inyi Ikan kè Mosis ikeke inye.