5
Oruru eji ekaan̄be inan̄a me lek ichechieek
1 Eya orọ, mije Awaji ofukbe eji kubọk ebi ata irọrọ sa me ichechieek, eji mîkup me esuuk melek Awaji inan̄a me lek Okaan̄ kiji Jisọs Karais. 2 Sa me lek kan̄, ogwu eji echieekbe me lek, ke eji ekaan̄ irek me lek atata nnwọn eyi eji ekupbe me emen mgbọ keyi. Eji mîbele ejit enenen, mije, eji mîkaan̄ ikpọchieen̄ ibe ke eji mêgọọk ikaan̄ uche me lek ujamgbugbo eyi Awaji. 3 Ìkare eya gaalek. Eji ekibele ejit si me emen ufialek eji ekibọkọ, mije, eji mîriọọn̄ ibe ke ufialek chi ìkijeen̄ eji ubọk ekikat ejit. 4 Ukarajit okekirọ inyi eji ekeluk ata ugwem eyi Awaji obọkọbe itap. Ata ugwem eyi Awaji obọkọbe itap okekinyi eji ikpọchieen̄. 5 Ikpọchieen̄ òkup ikeyi ìkakifiin̄ ene ìtele, mije, Awaji înyi eji imumechieen̄ kan̄ imin enenen me emen ejit kiji. Imumechieen̄ yi ìje me ubọk Ekwukwu Mbuban ogwu Awaji ochebe inyi eji. 6 Mije, mgbọ mgbọ Awaji okembe, mgbọ eji ekakaan̄ge unye geege isasa inwọnọ unaan̄-ejit Awaji, Karais onunu inikwu mkpa mije kiji ebi ìkirọ ijo inu. 7 Ìkiyọyọt enenen sabum ene ònokwu mkpa me ibot ogwu ata irọrọ. Ire, usini mgbọ, ene ge môkọt ichieek ikwukwu mkpa me ibot ogwu ata ene. 8 Ire, Awaji îjeen̄ imumechieen̄ kan̄ me lek kiji me oniin̄ òsisibi esese. Mije, mgbọ eji ekupbe me emen ijo inu kiji ke Karais okwu mkpa me ibot kiji.
9 Me mgbọ keyi, mije mkpa kan̄, Awaji îben itip-oyerebet isan̄a eji me ibot. Eyi ògak eya ìre ke eji mênwọnọ unaan̄-ejit Awaji sa me lek kè Karais.
10 Mije, ire Awaji isa mkpa ogwu Gwun̄ itap esuuk me etete kan̄ melek kiji me mgbọ eji erebe ebi ochicha kan̄, me mgbọ keyi eji ekanabe ebi òma melek kan̄, ọmọ ìkpolọlọ inyanyan̄a eji isibi mije ugwem Gwun̄ kan̄ ojomobe me mkpa iniluk. 11 Ire, ìkayaka me ikeya gaalek. Eji mîbele ejit mgbọ keyi eji melek Awaji ekigbaan̄ inu irọ inan̄a me lek Okaan̄ kiji Jisọs Karais, ogwu òrọrọ inyi eji enekana ebi òma melek Awaji.
Esese inu òkup me ugwem kè Adam mè eyi Jisọs Karais
12 Ijo inu ìnan̄a me lek ene ge inin̄ linyọn̄. Mkpa onanan̄a me lek ijo inu ya înin̄ si linyọn̄. Ikeya ke mkpa osa inu inyi otutuuk ebilene, mije, otutuuk ebilene mîrọ ijo inu. 13 Mije, sabum eninyinyi Ikan, ijo inu òwa me linyọn̄. Ire, ire kpunu ikan, kpekifuk ijo inu ene okirọ. 14 Ire, mkpa îkpan̄ ene me linyọn̄ keyi bene me ukot kè Adam na re ukot kè Mosis, mè ikpan̄ ire lek ebi ekarọge ojelek ijo inu Adam orọbe mgbọ îrọn̄be Ikan Awaji. Adam ìkup kubọk ogwu esabe itọ me lek ene ya ogwu òbonunu, òrere Jisọs Karais.
15 Ire, Adam mè ogwu òbonunu ya kpere ìkike, mije, uche Awaji onyibe me ikike ìkakup kubọk nrọ-nlọ kè Adam. Iin̄, nrọ-nlọ eyi ene ge gaalek, òrere Adam, îsa mkpa ijet owuwa ene. Ire, atata nnwọn eyi Awaji melek uche Awaji eyi ònan̄a me lek atata nnwọn eyi ogwu ene ge ya, òrere Jisọs Karais, môso ire lek otutuuk ene igak ikeya. 16 Ofifi si, uche Awaji onyibe me ikike ìkakup kubọk mkpukpe ijo inu eyi ene ge, òrere Adam, orọbe. Oyerebet ìnu mije ijo inu ge gaalek, mè isa itip-oyerebet igbaalek inu. Ire, uche Awaji ìnu me mgbọ owuwa ebi ene erọbe ijo inu, mè iniben itip-oyerebet isan̄a ebilene me ibot. 17 Îre mije ijo inu eyi ene ge gaalek orọbe ke mkpa onan̄a me ibot ene ge ya inikikpan̄ owuwa ene. Ikeya si, inu ene ge gaalek si, òrere Jisọs Karais, orọbe îmin enenen igak unye mkpa. Ebi geelek ìbọbọkọ ogbogbo atata nnwọn eyi Awaji, mè ibọkọ si uche ata irọrọ eyi Awaji onyibe me ikike, ife cha mêre ebi ìbekitim ikpan̄ me ugwem keyi inan̄a me lek kè Jisọs Karais.
18 Mije keya, ike ikwaan̄ ijo irọrọ ge gaalek osabe itip-oyerebet ijet otutuuk ebilene, ikeya si ke ikwaan̄ ata irọrọ ge gaalek orọ inyi eben itip-oyerebet esan̄a otutuuk ebilene me ibot, mè isa si ugwem ijet otutuuk ebilene. 19 Ike owuwa ene ekanabe ebi ijo mije unye-ibot ene ge, ikeya si, owuwa ene mêkana ebi ata irọrọ inan̄a me lek isisiki ibot eyi ene ge.
20 Ikan kè Mosis ìnu inenirọ inyi otutuuk ebilene eriọọn̄ ibe ke ema mêkirọ ijo inu. Ire, ere nrọ-nlọ okimumana, ere ya si ke atata nnwọn eyi Awaji okimumana ichit. 21 Ìkup ikeyi, inyi: Ike ijo inu okitọ ikọ, mè ikisa mkpa ijet ebi ene, ikeya si, atata nnwọn eyi Awaji môkitọ ikọ si, mè ikirọ inyi ebi ene ekana ebi ata irọrọ, mè ekaan̄ ugwem ikakaan̄ge itata inan̄a me lek Okaan̄ kiji Jisọs Karais.