Ginpaatubang si Jesus kay Gobernador Pilato
(Mt 27:1-2, 11-14; Mk 15:1-5; Jn 18:28-38)
23
Nagtilindog ro tanan ngato nga nagtilipon ag gindaea nanda si Jesus kay Pilato nga gobernador. 2 Pag-abot idto, gin-umpisahan nanda it pag-akusar si Jesus. Hambae nanda, “Haaktohan gid namon ro tawo ngara nga ginapataeang ro amon nga mga kasimanwa ag ginabawaean sanda nga magbayad it buhis sa Emperador. Ana pa nga ginaako nga imaw hay isaeang ka hari, ro Maneueuwas nga ginpromisa it Dyos.” 3 Ginpangutana ni Pilato si Jesus, “Ikaw baea ro hari it mga Judio?” Nagsabat imaw, “Tama ro imong hambae ngaron.” 4 Ginhambae dayon ni Pilato ro mga pinuno it mga saserdote ag ro abo pa nga mga kaibahan nanda nga nagtililipon idto, “Owa man ako it makita nga krimin nga haobra ku tawo ngara.” 5 Pero nagpinilit gid sanda. Hambae nanda, “Nakalibot eon imaw sa bilog nga nasyon namon ag ginsuesuean nana ro mga tawo agod maggulo paagi sa anang mga ginaturo. Idto pa’t-a ron imaw nag-umpisa sa probinsya it Galilea ag makaron hay nakaabot eon ngani imaw iya sa among probinsya it Judea.”6 Pagkabati kara ni Pilato hay nagpangutana imaw, “TagaGalilea ro tawo ngara ay?” 7 Ro Galilea hay sakop it pagdumaea ni Herodes. Pagkasayod ni Pilato nga tagaidto si Jesus hay ginpapadaea nana si Jesus idto kay Herodes nga hatabuan ma’t-a kato nga idto sa Jerusalem.
Ginpaatubang si Jesus kay Herodes
8 Nalipay gid si Herodes pagkakita nana kay Jesus ay kabuhay eon ro anang handom nga hikita ra. Abo eon abi ro anang habatian parti kay Jesus. Gusto man kunta nana nga makakita it milagro nga himuon ni Jesus. 9 Kaabo-abo ro ginpinangutana ni Herodes kay Jesus pero owa gid ra magsabat. 10 Idto man ro ro mga pinuno it mga saserdote ag ro mga maestro it Kasuguan. Nagatilindog sanda idto ag nagaeupok-eupok gid sanda sa pag-akusar kay Jesus. 11 Bisan si Herodes, pati man ro anang mga gwardya hay nagtuya-tuya ag nag-inintrimis kay Jesus. Pagkatapos, anda imaw nga ginpasuksukan it harianon nga eambong ag ginpapabalik dayon ni Herodes si Jesus idto kay Pilato. 12 Umpisa ku adlaw ngato hay nag-amigo sanday Herodes ag Pilato bisan kato hay magkaaway sanda nga daywa.
Ginsentensyahan si Jesus nga Ieansang sa Krus
(Mt 27:15-26; Mk 15:6-15; Jn 18:39-19.16)
13 Ginpatawag dayon ni Pilato ro mga pinuno it mga saserdote ag ro mga manogdumaea it mga Judio ag ro kaabo nga mga tawo nga nagapaeamantaw. 14 Ginhambae nana sanda, “Gindaea ninyo kakon ro tawo ngara ay sininyo hay ginasue-suean nana ro mga tawo agod magrebelde. Gin-imbistigar ko imaw sa atubang mismo ninyo, pero kon kakon hay owa man nana hiobra ro krimin ngato nga ginpinabangod ninyo kana. 15 Imaw man ron kon kay Herodes ay ginpapabalik nana ngani iya katon ro tawo ngara. Owa imaw it gin-obra nga dapat imaw sentinsyahan it kamatayon. 16 Ngani ipalatigo ko eang imaw ra ag buhian pagkatapos.” [ 17 Kada Pagtililipon sa Pagdumdum ku Pagtaliwan hay obligado imaw nga magbuhi it sangka priso nga ginpili it mga tawo.]a 18 Pero nagsilinggit ro tanan nga mga tawo, “Patya ron imaw! Si Barrabas ’t-a ro amon!” 19 (Si Barrabas hay ginpriso dahil kaibahan imaw sa kinagulo nga natabo tag nagrebelde anay sanda ku anang mga kaibahan kuntra sa gobyerno it Roma sa syudad it Jerusalem ag nakapatay imaw.) 20 Gusto ni Pilato nga buhian si Jesus ngani naghingyo imaw it uman sa mga tawo 21 pero nagsininggit sanda, “Ieansang imaw sa krus! Ieansang imaw sa krus!” 22 Pangatlong beses eon sanda nga ginhambae ni Pilato, “Ham-an? Ano gid ro gin-obra nana nga saea? Kon kakon hay owa imaw it haobra nga krimin agod sentensyahan imaw it kamatayon. Ngani ipalatigo ko eang imaw ag pagkatapos hay buhian.” 23 Pero nagpinilit gid sanda ag nagsininggit nga dapat ieansang si Jesus sa krus. Ku ulihi hay ro andang gusto’t-a ro natuman. 24 Ngani nagdesidir lang si Pilato nga pasugtan ro ginainsistir ku mga tawo. 25 Ginbuhian nana ro ginpili it mga tawo, tag ratong napriso dahil kaibahan imaw ku mga rebelde ag nakapatay. Pero gintugyan nana sa mga suldado si Jesus agod matuman ro gusto it mga tawo kana.
Gineansang si Jesus sa Krus
(Mt 27:32-44; Mk 15:21-32; Jn 19:17-27)
26 Pagkatapos, gindaea ku mga suldado si Jesus agod ieansang sa krus. Tag nagapanaw sanda, may hasubeang sanda nga sangka tawo nga si Simonb ro ngaean nga tagaCirene nga bag-ong abot halin sa uma. Anda nga binira si Simon ag ginpapas-an kana ro krus ag ginpasunod imaw kay Jesus.
27 Kaabo-abo nga mga tawo ro nagsinunod kay Jesus pati mga bayi nga nagatinangis ag nagainueahab dahil sa kaeuoy kana. 28 Pero nagbalikid kanda si Jesus ag naghambae, “Mga bayi nga tagaJerusalem, ayaw ninyo ako pagtangisi, kundi tangisi ninyo ro inyong mga kaugalingon ag ro inyong mga unga. 29 Akon kinyo raya nga ginahambae dahil sigurado nga maabot ro mga inadlaw nga mahambae ro mga tawo nga, ‘Mas mayad ro kahimtangan ku mga bayi nga mga baog ag owa gid it ginpasuso.’ 30 Rato man ro oras nga mahambae ro mga tawo sa mga bukid nga ‘Tup-ayi kami agod matabuanan kami!’c 31 Kon raya ro andang ginahimo kakon nga pareho it kahoy nga buhi, mas grabi pa gid ro matabo kinyo nga mga Judio nga pareho it patay ag mamaea eon nga kahoy.”d
32 May daywa pa nga mga kriminal nga ginsentensyahan man it kamatayon nga gindaea kaibahan ni Jesus paadto sa lugar nga pagaeansangan kanda. 33 Pag-abot nanda sa lugar nga ginatawag nga “Lugar it Bungo” hay anda nga gineansang si Jesus sa krus. Gineansang man nanda sa krus ro daywang ka kriminal ngato. Ro krus ku isaea hay sa ay Jesus nga tuo ag ro ana ku sambilog hay sa waea. [ 34 Naghambae si Jesus, “Ama, patawara sanda ay owa sanda kasayod ku andang ginaobra.”]e Tapos, nagpagabot-gabot ro mga nageansang kay Jesus kon kanyo hiadto ro anang eambong.
35 Nagtilindog idto ro mga tawo ag nagpinamantaw pero ro mga manogdumaea it mga Judio hay nagtinuya-tuya kay Jesus. Hambae nanda, “Gineuwas nana ro iba, abi kon anang euwason ro anang kaugalingon kon matuod gid nga imaw ro Maneueuwas nga ginpromisa it Dyos ag anang pinili.” 36 Gin-inintrimis man si Jesus ku mga soldado. Ginpaeapitan nanda imaw ag ginsumbilan it maaslom nga bino.f 37 Ginhambae nanda imaw, “Euwasa abi ro imong kaugalingon kon matuod gid nga hari ka it mga Judio!”
38 May ginbutang man nga karatula sa may ibabaw ku anang ueo nga raya ro nakasueat: “Raya ro Hari it mga Judio”.
39 Ro sambilog sa daywang ka kriminal nga gineansang kaibahan ni Jesus hay nag-insulto kana. Hambae nana, “Bukon abi it ikaw ro Maneueuwas nga ginpromisa it Dyos? Euwasa abi ro imong kaugalingon ag pati man kami.” 40 Pero ginpangisgan imaw ku anang kaibahan. Hambae kana, “Owa ka’t-ing nahadlok sa Dyos ay? Dapat mahadlok ka ay kondenado ka man pareho kana. 41 Bagay gid ma’t-a nga kitang daywa hay pinahan sa saea naton nga gin-obra pero imaw ’t-a ngara hay owa it saea.” 42 Ginhambae dayon nana si Jesus, “Jesus, dumduma man ako kon maghari ka eon.” 43 Nagsabat si Jesus, “Matuod rang ginahambae kimo nga sa daya gid nga adlaw hay makaibahan ka nakon sa paraiso.”
Namatay si Jesus
(Mt 27:45-56; Mk 15:33-41; Jn 19:28-30)
44 Tag mga alas dose eon it udtruadlaw hay nagdueom ro bilog nanda nga nasyong hasta it alas tres it hapon 45 ay owa naghayag ro adlaw. Idto sa Templo hay gulpi eang nga napihak ro madamoe nga kurtina.h 46 Nagsinggit dayon si Jesus, “Ama, ginatugyan ko kimo ro akon nga espirito!” Pagkahambae nana kara hay nabugtuan dayon imaw it ginhawa. 47 Pagkakita ku kapitan it mga suldado ku natabo hay gindinayaw nana ro Dyos. Hambae nana, “Matuod gid-a nga matarong ro tawo ngara!”
48 Ro kaabo nga mga tawo nga idto nagtililipon agod magsaksi ku mga nagkaeatabo hay nag-ueuli eon nga nagabayo ku andang dughan tanda ku andang kasubo.
49 Ro mga kakilaea ni Jesus pati ro mga bayi nga nagsinunod kana halin sa Galilea hay idto nagatilindog sa maeayo-eayo ag nagapinamantaw ku mga nagkaeanabo.
Gineubong si Jesus
(Mt 27:57-61; Mk 15:42-47; Jn 19:38-42)
50,51 May sangka tawo nga si Jose ro ngaean nga tagaArimatea nga sambilog sa mga banwa it Judea. Mayad ag matarong nga tawo si Jose. Nagapaabot gid imaw sa oras nga maghari eon ro Dyos anang mga pinasahi nga sinakpan.i Myembro imaw it Sanedrin ag bukon ra imaw it kompormi sa plano ag gin-obra ku anang mga kaibahan sa konseho ngato. 52 Nag-adto si Jose kay Pilato ag ginhinyo nga itao kana ro eawas ni Jesus. 53 Pagkatapos, gintae-tae nana sa krus ro eawas ni Jesus ag ginputos it maeahaeon nga tela. Ginbutang na dayon rato sa eueubngan nga ginsinsil sa dalipi. Owa pa gid it kinaeubong sa eueubngan ngato. 54 Hapon eon dato it adlaw nga ginatawag nga Adlaw it Pagpahaom para sa Adlaw it Inogpahuwayj ag madali lang mag-upisa ro Adlaw it Inogpahuway.
55 Ro mga bayi nga nagsinunod kay Jesus halin sa Galilea hay nagsunod kay Jose ag hakita nanda kon siin ro eueubngan ag kon paalin ginbutang idto ro eawas ni Jesus. 56 Nagpanaw dayon sanda ag nagpahaom it sari-saring mahumot nga bueong ag banyos nga gamiton nanda sa eawas ni Jesus. PagkaAdlaw it Inogpahuway hay nagpahuway sanda sa pagtuman sa Kasuguan.