Ro Plano nga Patyon si Jesus
(Mt 26:1-5; Mk 14:1-2; Jn 11:45-53)
22
Maeapit lang mag-abot ro Pagtililipon sa Pagdumdum ku Pagkaon it Tinapay nga Owa it Pangpaalsa nga ginatawag man nga Pagdumdum ku Pagtaliwan.a 2 Ro mga pinuno it mga saserdote ag ro mga maestro it Kasuguan hay nagainusoy it ideya kon paalin nanda hipapatay si Jesus pero nahadlok man sanda ay basi magkagulo ro mga tawo.bNakigkunsabo si Judas sa mga Pinuno it mga Saserdote nga Traidoron si Jesus
(Mt 26:14-16; Mk 14:10-11)
3 Nagsueod dayon si Satanas kay Judas nga ginatawag nga Escariote nga sambilog man sa doseng ka sumueunod ni Jesus. 4 Nag-adto imaw sa pinakapinuno it mga saserdote ag sa mga opisyal it mga gwardya it Templo agod makigkunsabo kon paalin nana buligan sanda nga hidakop si Jesus. 5 Nalipay gid sanda ag ginpangakuan nanda si Judas nga taw-an it kwarta. 6 Nagsugot man si Judas ag umpisa kato hay nagbinantay imaw it kahigayunan nga ikapadakop kanda si Jesus nga owa eon it abong tawo.
Ginpapahaom ni Jesus ro Ihapon Para sa Pagdumdum
(Mt 26:17-19; Mk 14:12-16)
7 Nag-abot eon ro primero nga adlaw it Pagtililipon sa Pagdumdum ku Pagkaon it Tinapay nga Owa it Pangpaalsa. Ruyon ro adlaw nga ginapatay nanda ro tiyo it karnero para sa ihapon sa Pagdumdum ku Pagtaliwan. 8 Ngani ginsugo ni Jesus sanday Pedro ag Juan. Hambae ni Jesus, “Panaw eon kamo ag magpahaom ku atong ihapon sa rayang Pagdumdum ku Pagtaliwan.”
9 Nagsabat sanda, “Siin mo ra gusto nga ipahaom namon?” 10 Nagsabat si Jesus, “Adto kamo sa syudad. May inyo idto nga hisubeang nga eaki nga may daea nga sangka banga nga tubi. Sunda ninyo imaw hasta sa sueod it baeay nga anang sudlan. 11 Hambaea dayon ninyo ro tagbaeay nga ginapapangutana maton it maestro kon siin ro kwarto nga pwede nandang gamiton kon mag-ihapon sanda ku anang mga sumueunod makaron nga Pagdumdum ku Pagtaliwan. 12 Daehon dayon kamo it tagbaeay sa ibabaw. May idto nga mabahoe nga kwarto nga una eon ro tanan natong kinahangeanon. Idto ninyo pahauma ro atong ihapon.”
13 Nagpanaw ro daywa ag hapamatud-an nanda nga matuod ro mga ginhambae ngato ni Jesus. Nagpahaom dayon sanda ku tanan nandang kinahangeanon para sa ihapon sa Pagdumdum ku Pagtaliwan.
Ro Primero nga Ihapon nga Magapadumdum ku Kamatayon ni Jesus
(Mt 26:26-30; Mk 14:22-26; 1 Cor 11:23-25)
14 Tag oras eon nga inog-ihapon, nagkaon si Jesus kaibahan ro mga apostoles. 15 Naghambae imaw kanda, “Gusto ko gid-a nga mag-ililiba kita sa pagkaon it rayang ihapon sa Pagdumdum ku Pagtaliwan bago ako mag-antos. 16 Ginahambae ko kinyo nga indi eon ako magkaon it uman kara hasta nga indi matuman ro ana kara nga ginapatungdan. Ruyon ro oras kon siin ro kaeuwasan ku tanan nga pinasahi nga sinakpan it Dyos hay kumpleto eon gid.”
17 Nagbuoe dayon imaw it kopa nga may bino ag ginpasaeamatan ra sa Dyos. Naghambae dayon imaw, “Hara, inom kamo kara tanan. 18 Ginahambae ko kinyo nga umpisa makaron hay indi eon ako mag-inom pa it bino hasta sa oras nga nagaselebrar eon idto sa eangit ro tanan nga pinasahi nga sinakpan it Dyos.”
19 Pagkatapos, nagbuoe imaw it tinapay, ginpasaeamatan ra nana sa Dyos, ginpihak-pihak ag gintao kanda. Hambae nana, “Raya ro akong eawas nga ginatao para kinyo. Himua ra ninyo permi sa pagdumdum kakon.”
20 Pagkakaon nanda, nagbuoe eon man imaw it kopa nga may bino ag naghambae, “Ro sueod ku rayang kopa hay nagapalig-on ku bag-o kasugtanan nga ginhimo it Dyos sa tawo ag raya hay ro akon nga dugo nga igauea por dahil kinyo.
21 “Pero, pamati kamo kakon. Ro tawo nga magatraidor kakon hay kaibahan nakon iya sa lamisa. 22 Magataliwan eon ako nga Unga it Tawo suno sa gintaeana it Dyos pero makangingidlis gid ro matabo sa magatraidor kakon.” 23 Pagkabati nanda kara hay nagpaeangutan-an ro mga sumueunod kon sin-o kanda ro gahimo kara.
Ro mga Sumueunod ni Jesus hay Dapat nga Mapainubuson ag Mabinuligon
24 Ku ulihi, nagbinais ro mga sumueunod ni Jesus kon sin-o kanda ro ginakilaea it mga tawo nga pinakaimportante. 25 Ngani naghambae si Jesus kanda, “Ro mga hari iya sa kalibutan hay nagapamintas sa andang mga sinakpan ag gusto ku mga manogdumaea kuno nga tawgon sanda nga mga ‘Manogbulig it mga Tawo.’ 26 Pero bukon dapat kamo it makaruyon tungod kon sin-o ro pinakaimportante kinyo hay dapat na bilangon ro anang kaugalingon nga matsa imaw ro pinakabata nga indi pa ikataha it iba ag ro manogdumaea hay dapat mangin pareho it manogserbi. 27 Sin-o sa daywa ro mas dungganon, ro gakaon sa lamisa o ro nagaserbi kana? Syempre, ro nagakaon sa lamisa. Pero umpisa nga nangin kaibahan ninyo ako hay nagsinerbi eo’t-a ako kinyo.c
28 Kamo ro nag-unong kakon sa mga kalisod nga akong haagyan nga nagtentar kakon nga indi lang magpadayon sa along bueuhaton. 29 Dahil karon hay taw-an ko kamo it otoridad nga maghari pareho ku pagtao karon kakon ku akon nga Ama sa eangit. 30 Ngani padunggan ko kamo ag mangin kaibahan nakon kamo permi sa pagkaon kon magselebrar eon idto sa eangit ro tanan nga pinasahi nga sinakpan it Dyos. Ag padumaeahon ko kamo ku dose nga ka tribo ni Israeld.”
Ginhambae Eagi ni Jesus nga Ipanghiwaea Imaw ni Pedro
(Mt 26:31-35; Mk 14:27-31; Jn 13:36-38)
31 Naghambae dayon si Jesus, “Simon, Simon, pamati kakon. Nageaong si Satanas sa Dyos nga testingan nana kamo nga matsa ginaayag kamo pareho it harina. 32 Pero ginpangamuyuan ko ikaw, Simon, nga indi maduea ro imong pagtuo ag pagkatapos nga makapanumbalik ka kakon hay palig-ona man ro pagtuo ku imong mga igmanghod.” 33 Nagsabat si Simon, “Ginuo, haom ako nga magpapriso ag mamatay kaibahan nimo.” 34 Pero ginsabat imaw ni Jesus, “Patiha ako, Pedro. Bago magpamaeo ro manok sa rayang gabii hay ipanghiwaea mo it tatlong beses nga kilaea mo ako.”
Ginpapahaom ni Jesus ro anang mga Sumueunod sa Pag-atubang it mga Kalisod
35 Naghambae dayon si Jesus sa anang mga sumueunod, “Tag ginpapanaw ko kamo ku hauna ngato nga owa ko kamo pagpadaeha it kahita, bag ag sandalyas, ginkueang baea kamo?” “Owa gid,” sabat nanda. 36 Hambae pa gid ni Jesus kanda, “Pero makaron, kon magpanaw kamo, daeha ro inyong kahita ag bag kon may inyo. Kon owa kamo it espada hay baligyaan ro inyong pangsanib agod makabakae kamo. 37 Himua ninyo ron dahil ginahambae ko kinyo nga dapat nga matuman rondayang ginsueat ngara sa Sagrado nga Kasueatan parti kakon nga:
‘Ginbilang imaw nga isaea sa mga nagabaliwala sa kasuguan it Dyos’.
Rondaya mismo nga ginsueat parti kakon hay madali lang matuman.”e 38 Nagsabat ro anang mga sumueunod, “Hara, Ginuo, may among daywang ka espada.” Hambae ni Jesus, “Hipos eon! Indi eon don naton pag-istoryahan.”
Nagpangamuyo si Jesus sa Getsemani nga sa Ubos it Bukid it Olibo
(Mt 26:36-46; Mk 14:32-42)
39 Tapos, nagguwa si Jesus sa syudad ag nag-adto sa Bukid it Olibo pareho ku ana permi nga ginaobra. Nagmunot kana ro anang mga sumueunod. 40 Pag-abot nanda idto, naghambae imaw kanda, “Pangamuyo kamo nga indi kamo matentar.” 41 Nagpaeayo-eayo dayon imaw kanda ag nageuhod ag nagpangamuyo. 42 Hambae ni Jesus, “Ama, kon mahimo hay indi mo lang ako pagpaagihon sa grabi nga kasakit nga akon nga aeatubadngon. Pero ro imong pagbuot ro dapat matuman, bukon it akon.” 43 [May nagpakita dayon nga anghel halin sa eangit nga nagpabaskog ku anang buot. 44 Matsa maeupok ro anang dughan ngani nagpangamuyo pa gid imaw. Ginpinanghueasan imaw it dugo nga nagtaeabilis ag nagtueo sa eugta.]f 45 Pagkapangamuyo nana, nagtindog imaw ag nagbalik sa anang mga sumueunod. Haabutan nana sanda nga hakatueugan sa andang kasubo. 46 Ginhambae sanda ni Jesus, “Ham-an it nagakinatueog kamo? Bangon eon ag magpangamuyo agod indi kamo matentar.”
Gintraidor ag Gindakop si Jesus
(Mt 26:47-56; Mk 14:43-50; Jn 18:3-11)
47 Nagahambae pa si Jesus kat may nag-abot nga abo nga mga tawo ag ginapangunahan sanda ni Judas nga sambilog sa doseng ka sumueunod. Nagpaeapit imaw kay Jesus ag ana ra kunta nga ginaharuan. 48 Pero ginhambae imaw ni Jesus, “Haro pa ring gamiton sa pagtraidor kakon nga Unga it Tawo, Judas?” 49 Pagkapan-o ku mga kaibahan ni Jesus nga matsa maeain eo’t-a ro matabo hay naghambae sanda, “Hay ano, Ginuo, pangeab-on namon sanda ra?” 50 Pero linabo eagi it sambilog kanda ro ulipon ku pinakapinuno it tanan nga saserdote. Ag nautas ro anang tuo kara nga dueunggan. 51 Naghambae si Jesus, “Tama eon don!” Ana dayon nga ginbuytan ro dueunggan ku ratong ulipon ag ginpamayad. 52 Ginhambae dayon si Jesus ro mga pinuno it mga saserdote, ro mga opisyal it mga gwardya it Templo ag ro iba pang mga manogdumaea it mga Judio nga nagadakop kana, “Ano ay? Matsa rebelde’t-a ako nga nagdaea pa kamo it espada ag bakulo sa pagdakop kakon. 53 Adlaw-adlaw hay gakilita kita idto sa Templo pero owa ninyo ako kato pagdakpa. Pero nag-abot eon ro inyong oportunidad nga gintaeana it Dyos ag gintaw-an eon ro nagahari sa kadudueman it oportunidad nga himuon ro anang gusto kakon.”
Ginpanghiwae ni Pedro nga Kilaea Nana si Jesus
(Mt 26:57-58, 69-75; Mk 14:53-54, 66-72; Jn 18:15-18, 25-27)
54 Gindakop dayon nanda si Jesus ag gindaea sa baeay it pinakapinuno it tanan nga saserdote. Nagsunod man si Pedro pero idto imaw sa maeayo-eayo. 55 Idto sa may lagwirta it ratong baeay hay may kaeayo ag idto dapit nagpueungko ro mga tawo. Nag-iba man kanda si Pedro. 56 Hakita imaw idto it sangka sueuguon nga bayi tag hahayagan imaw it kaeayo. Tinueok ku bayi si Pedro ag naghambae, “Kaibahan gid nana ro tawo ngara ho!” 57 Pero nagbalibad ’t-a si Pedro. Nagsabat imaw, “Tao kimo, nga bayi ka! Owa’t-a ako kakilaea ku tawo ngato.”
58 Maangan-angan hay may eaki nga nakapan-o kay Pedro. Hambae ku eaki, “Kaibahan ka gid-ing nanda.” Pero nagbalibad gid si Pedro, “Bukon a!”
59 Pagkataliwan it mga sang oras, may eaki nga ginapinilit na gid-a nga magkaibahan sanday Pedro ag Jesus. Hambae nana, “Matuod gid-a nga kaibahan gid nana ro tawo ngara ay tagaGalilea man ra imaw!”g 60 Pero nagsabat si Pedro, “Tao’t-a ra! Owa’t-ang kasayod ku imo ngarong ginahinambae!” Tag nagahambae pa si Pedro hay may nagpamaeo nga manok. 61 Dikato man naglingot ro Ginuo ag ana nga gintueok si Pedro ag hadumduman ni Pedro ro ginhambae it Ginuo nga, “Bago magpamaeo ro manok sa rayang gabii hay ipanghiwaea mo it tatlong beses nga kilaea mo ako.” 62 Gumuwa dayon si Pedro sa lagwirta ag nagtinangis imaw it pwerti.
Si Jesus hay Gin-intrimis, Ginbakoe ag Gin-insulto
(Mt 26:67-68; Mk 14:65; Jn 19:1-3)
63 Si Jesus ma’t-a hay gin-inintrimis ag ginbinakoe ku mga nagagwardya kana. 64 Anda imaw nga gintabunan sa mata ag ginbueus-bueusan it tueop ag paghinambaeon dayon, “Tugmaha abi kon sin-o ro nagtueop kimo.” 65 Ag gin-ininsulto pa gid nanda imaw ag ginpinasipaeahan.
Gin-imbistigar si Jesus sa Atubang it Sanedrin
(Mt 26:59-66; Mk 14:53-64)
66 Kat agahon eon, nagtililipon ro mga manogdumaea it mga Judio, ro mga pinuno it mga saserdote, ag ro mga maestro it Kasuguan ag anda dayon nga gindea si Jesus sa atubang it tanan nandang kaibahan sa Sanedrin. 67 Naghambae sanda, “Sabta kami kon ikaw ro Maneueuwas nga ginpromisa it Dyos.” Pero nagsabat si Jesus, “Bisan sabton ko pa kamo hay indi gid gihapon kamo magpati 68 ag kon magpangutana man ako kinyo hay indi gid ninyo ako pagsabton. 69 Pero umpisa makaron, ako nga Unga it Tawo hay magapungko sa tuo it Makagagahom nga Dyos.” 70 Nagpangutana dayon sanda tanan, “Kon mawron hay ikaw baea ro Unga it Dyos?” Nagsabat si Jesus kanda, “Tama ro inyong hambae ngaron.” 71 Pagkatapos hay naghambae sanda, “Ham-an it mausoy pa abi kita it iba pang testigo? Habatian eon naton ro ana mismong ginhambae!”