Ro Mayad nga Balita nga Ginsueat ni
MARCOS
Haunang mga Bisaea
Ro nagsueat ku libro ngara hay si Marcos nga unga ni Maria nga tagaJerusalem (Mga Binuhatan 12:12). Bata pa kato imaw tag iya pa si Jesus sa kalibutan. Idto kato pirmi sa baeay ni Marcos nagatilipon ro mga sumueunod ni Jesus kon magpangamuyo sanda sa Dyos. Ngani kilaea gid ni Marcos si Pedro ag ro iba pang mga sumueunod. Abo ro nagapati nga nagtuo si Marcos kay Jesus paagi sa pagturo ni Pedro. Kaeabanan sa mga mangin-aeamon sa Bibliya hay nagahambae nga si Marcos ngara hay imaw man si Juan Marcos nga igkampod ni Barnabas (Col 4:10) nga nagmunot kanday Pablo ag Barnabas ku primero nandang pagbyahe agod magwali ku Mayad nga Balita (Mga Binuhatan 12:25; 13:25). Owa si Marcos nakaiba kay Jesus tag iya pa ra sa kalibutan. Bisan si Marcos hay bukon it sambilog sa dose ka disipulos ni Jesus, kasayod kita nga imaw hay nangin kaibahan ni Apostol Pedro (1 Pedro 5:13), ag kaeabanan man hay nagahambae nga si Pedro ro nagturo kay Marcos kon ano ro mga ginhimo ag ginturo ni Ginuong Jesus.
Ginsueat ni Marcos ro libro ngara sa mga bukon it Judio, eabi gid sa ratong mga tagaRoma. Mawron ngani nga sangkiri eang ro anang gintapoe nga mga ginhambae it mga propeta sa Daan nga Kasueatan sa ana ngara libro. Ginpaathag man ni Marcos ro mga bisaea ag mga kaugalian it mga Judio agod maeubtan ku mga bukon it mga Judio nga gabasa. Basaha sa 3:17; 5:41; 7:1-4, 11, 34.
Ro Mayad nga Balita nga ginsueat ni Marcos hay hanungod kay Jesu-Kristo. Kaeabanan ku mga istorya sa Marcos hay parti sa mga gin-obra ni Jesus nga nagapakita ku anang indi matupungan nga gahom ag otoridad sa pagpatawad it mga saea. Abo gid ro ginasugid dikara parti ku ay Jesus nga pagpamayad it mga masakit ag pagpangsuboe it mga maeain nga espirito sa eawas it mga tawo. May mga ginasugid man sa libro ngara parti sa ay Jesus nga mga ginaturo ag parti man sa anang kamatayon ag pagkabanhaw.