Ro Mayad nga Balita nga Ginsueat ni
Lukas
Haunang Mga Bisaea
Raya nga sueat hay ginsueat ni Lukas nga isaeang ka doctor nga nagtuo kay Jesus. Imaw man ro nagsueat ku “Ro mga Binuhatan ku mga Apostoles” nga kasugpon nga istorya ku mga binuhatan ni Jesus paagi sa gahom it Espirito Santo nga una sa mga apostoles. Bukon it Judio si Lukas ag ginahambae ku iba nga basi imaw hay isaeang ka Griego nga tagaAntiokia sa probinsya it Syria. Kon amat kato hay nagamunot man si Lukas sa mga pagpamanawon ni Apostol Pablo sa pagturo ku Mayad nga Balita. Ro ginsueatan ni Lukas kara hay ro anang amigo nga si Teofilo. Owa it abong ginsugid parti kay Teofilo mageuwas nga suno sa iba hay isaea imaw nga ka haeangdon nga tawo nga taga-Roma.
Maid-id ro pagsueat ni Lukas kon ano ro mga natabo suno sa sugid ku mga nakasaksi. Abo sa mga natabo nga ginsueat dikara ni Lukas hay ginsueat man nanday Mateo, Markos ag Juan pero abo man sa ginsueat ni Lukas nga owa hasambit sa andang mga ginsueat. Ginsueat dikara ni Lukas nga si Jesus ro Maneueuwas nga ginpromisa it Dyos nga magaeuwas sa tanan nga magatuo kana. Mabasa man dikara nga ginpili it Dyos si Jesus nga magwali ku Mayad nga Balita sa mga pobre. Klaro gid rikara nga maeueuy-on gid si Jesus sa mga nagakinahangean kapin gid ro mga nagamasakit, ro mga ginsudlan it maeain nga espirito ag ro mga ginalisdan.