Ro Mayad nga Balita nga Ginsueat ni
MARCOS
Ro Mga Ginhimo ni Juan nga Manogbawtismo
(Mt 3:1-12; Lu 3:1-18; Jn 1:23, 26-27)
1
Ro Mayad nga Balita hanungod kay Jesu-Kristo nga Unga it Dyos hay nag-umpisa tag natuman rato nga 2 ginpasueat it Dyos kato anay kay Propeta Isaias nga,�Magapadaea ako ku akon nga mensahero nga mauna kimo agod pahaumon nana ro imong daean.
3 Imaw ro tawo nga nagasinggit idto sa disyerto, hambae nana,
�Pahauma ro aeagyan it Ginuo. Patadlunga ro anang daean.� �
4 Natabo raya ngara nga ginsueat ni Isaias kat nag-umpisa si Juan it pagwali sa disyerto ag nagpangbawtismo. Naghambae imaw sa mga tawo, �Maghinuesoe kamo sa inyong mga saea ag magpabawtismoa agod patawaron kamo it Dyos.� 5 Abo nga mga tawo halin sa bilog nga probinsya it Judea ag sa syudad it Jerusalem ro nag-adto kay Juan agod magpamati. Gin-ako nanda ro andang mga saea ag ginbawtismohan dayon sanda ni Juan sa suba it Jordan.
6 Ro eambong ni Juan hay ginhaboe nga baeahibo it sapat nga kamelyo, ro anang paha hay panit ag ro anang pagkaon hay apan ag dugos. 7 Nagwinali imaw sa mga tawo, �May maabot masunod kakon nga mas eabaw pa kakon nga maskin gahubad eon lang ku higot it anang sandalyas hay bukon ako it bagay. 8 Pagabawtismohan ko kamo it tubi pero pagabawtismohan nana kamo it Espirito Santo.�
Ro mga Nagkaeanabo Tag Ginbawtismuhan si Jesus
(Mt 3:13-17; Lu 3:21-22)
9 Kat idto pa si Juan sa suba it Jordan hay nag-abot si Jesus halin sa Nazaret nga banwa it Galilea ag nagpabawtismo imaw kay Juan. 10 Pagkabawtismo kana, nagtakas imaw ag hakita nana nga nagbukas ro eangit ag nagapanaog kana ro Espirito Santo nga matsa puti nga salampati. 11 May naghambae dayon halin sa eangit, �Ikaw ro akon nga palangga nga unga. Nalipay gid ako it duro kimo.�
Gintinentar ni Satanas si Jesus
(Mt 4:1-11; Lu 4:1-13)
12 Pagkatapos hay ginpaadto eagi si Jesus it Espirito Santo sa disyerto. 13 Idto imaw nagtenir sa ratong lugar nga may mga mabangis nga sapat sa sueod it kwarenta diyas. Gintinentar imaw ni Satanas pero gindinipara imaw it mga anghel.
Nag-umpisa si Jesus sa Anang mga Ueubrahon sa Galilea
(Mt 4:12-17; Lu 4:14-15)
14 Pagkapriso kay Juan hay nag-adto si Jesus sa probinsya it Galilea ag nagwali imaw it Mayad nga Balita nga halin sa Dyos. 15 Bisan siin imaw mag-adto, nagahambae imaw sa mga tawo, �Ro oras nga gintaeana it Dyos hay nag-abot eon nga ro mga tawo hay puydi eon nga ikatapoe sa mga pinasahi nga sinakpan it Dyos. Hinuesoei ninyo ro inyong mga saea ag magpati sa Mayad nga Balita.�
Ro Pagtawag ni Jesus ku Hauna Nana nga mga Sumueunod
(Mt 4:18-22; 5:1-11)
16 Tag si Jesus hay nagaagi sa baybayon ku Dagatb it Galilea, hakita nana ro daywang ka mangingisda nga magmanghod nga sanday Simon ag Andres nga nagaitsa ku anda nga eaya. 17 Naghambae si Jesus kanda, �Mali eon ay obrahon ko kamo nga mga sumueunod nakon. Akon kamo nga tur-an agod imbis nga isda ro inyong eayahon hay tawo ro inyong kumbinsihon nga magtuo kakon.� 18 Ngani inaywan eagi nanda ro andang pagpangisda ag nagsunod kana agod mangin anang mga sumueunod.
19 Pag-abot nanda sa unahan, hakita ni Jesus ro mga unga ni Zebedeo nga sanday Santiago ag Juan. Nagakaayad sanda ku andang mga lambat sa andang baroto. 20 Ay Jesus dayon sanda nga gintawag nga magsunod kana agod mangin anang mga sumueunod. Ngani gin-aywan nanda ro andang ama ag ro andang mga kabulig sa andang baroto ag nagsunod kay Jesus.
Ginpamayad ni Jesus ro sangka Tawo nga Ginsudlan it Maeain nga Espirito
(Lu 4:31-37)
21 Nag-adto sanday Jesus sa hilapit nga banwa it Capernaum. Kat Adlaw eon nga Inogpahuway hay nag-adto si Jesus sa sinagogac ag nagturo. 22 Hangawa gid ro mga tawo nga nagapamati kana ay sigurado gid imaw ku kamatuuran nga anang ginaturo bukon it pareho ku mga maestro it Kasuguan.d
23 Sa sinagoga ngato hay may tawo nga ginsudlan it maeain nga espirito nga gulpi eang nagsinggit, 24 �Ay a! Ayaw kami pag-intrahi, Jesus nga tagaNazaret. Owa�t-a kita it eabot sa kada isaea. Imo eo�t-a kami nga ieapog sa impyerno agod pinahan ay? Matsa owa ta hakilaea a. Ikaw ro Balaan nga ginpadaea iya it Dyos.�
25 Pero ginsaway imaw ni Jesus. Hambae nana, �Hipos! Guwa kana!� 26 Ginpawaeas dayon it maeain nga espirito ratong tawo ag suminggit it mabaskog bago nagguwa.
27 Nangawa gid it duro ro mga tawo ag nagpaeangutan-an sanda, �Ano ra? Bag-ong klase ro anang ginaturo. Ag gamhanan imaw ay bisan ro mga maeain nga espirito hay nagatuman kon suguon nana.� 28 Ginpinamalita it mga tawo ro natabo ngara ngani nangin bantog si Jesus sa bilog nga probinsya it Galilea.
Abo ro Ginpamayad ni Jesus
(Mt 8:14-17; Lu 4:38-41)
29 Nagguwa ni Jesus sa sinagoga ngato kaibahan sanday Juan ag Santiago hay nag-adto dayon sanda sa baeay nanday Simon ag Andres. 30 Haabutan nanda idto nga nagaeubog ro ay Simon nga panugangan nga bayi tungod may ana nga eagnat ngani ginsugiran eagi nanda si Jesus ku anang kahimtangan. 31 Ginpaeapitan ra ni Jesus, ginbuytan sa alima ag ginbuligan nga makabangon. Naduea dayon ro anang eagnat ag ginserbihan nana sanda.
32 Pagkatunod it adlaw hay gindaea it mga tawo kay Jesus ro tanan nga nagamasakit ag ro mga ginsudlan it demonyo. 33 Ro tanan nga mga tawo sa ratong banwa hay nagtueumpok sa may pwertahan it baeay 34 ag abo nga mga tawo nga may sari-saring mga masakit ro ginpamayad ni Jesus. Ana man nga ginsuboe ro kaabo nga mga demonyo ag owa gid nana pagsugti sanda nga makahambae ay kilaea nanda kon sin-o gid imaw.
Nagwali si Jesus sa Bilog nga Probinsya it Galilea
(Lu 4:42-44)
35 Aga-aga pa, nagbangon eon si Jesus ag nag-adto sa sangka lugar nga owa it kabaeayan ag idto nagpangamuyo. 36 Gin-usoy dayon imaw nanday Simon 37 ag pagkakita nanda kana hay ginhambae nanda imaw, �Tanan�t-a hay nagausoy kimo.� 38 Pero nagsabat si Jesus, �Musyon, mapanaw kita sa kahilapit nga mga banwa. Idto man ako mawali ay ruyon ro akon nga tuyo sa pag-adto riya sa kalibutan.� 39 Ngani naglinibot imaw sa bilog nga probinsya it Galilea nga nagawali sa mga sinagoga ag nagapangsuboe it mga maeain nga espirito sa eawas it mga tawo.
Ginpamayad ni Jesus ro Isaeang ka Aruon
(Mt 8:2-4; Lu 5:12-16)
40 Kaisaea kato, may isaeang ka aruon nga nagpaeapit kay Jesus ag nageuhod ag nagpakitluoy. Naghambae imaw, �Kasayod ako nga mapamayad mo ako kon gusto mo.� 41 Naeuoy gid it duro si Jesus sa aruon. Ginbuytan ra nana ag ginhambae, �Gusto ko nga pamayron ka. Mayad ka eon.� 42 Ag nagmayad eagi ro aruon.
43 Ginpapanaw eagi imaw ni Jesus ag ginbilinan gid, 44 �Ayaw gid magsugid kara bisan kanyo pero umadto ka dayon sa saserdotee ag magpatan-aw. Maghaead ka dayon it sakripisyo para sa imong paglimpyo suno sa Kasuguan ni Moises bilang pamatuod sa mga tawo nga mayad ka eon.�
45 Nagpanaw ro tawo pero ginsinugid nana sa tanan nga anang hisubeang kon paalin imaw ginpamayad ni Jesus. Ngani si Jesus hay indi eon makapanaw it hayag sa mga banwa. Mawron nga idto imaw nagtenir sa mga lugar nga owa it kabeayan. Ugaling hay abo gihapon nga mga tawo ro nag-agto idto kana halin sa iba-ibang mga lugar.