Yi titzꞌeꞌn junt tir Jesús ẍchixoꞌl almaꞌ
(Mr 16.1-8; Lc 24.1-12; Jn 20.1-10)
28
1 Itzun bantz yi nsken icyꞌpon jun kꞌej uleꞌn, chin bixeꞌ skil nin te yi bajx kꞌej te sman, yi chibeneꞌn Luꞌch Mat tu junt Luꞌch tan tilweꞌn kale oc cyent yi wankil Jesús. 2 Na chopon cunin yi yucaneꞌn yi txꞌotxꞌ tan jun chin wutzileꞌn coblajnob, nin cuꞌul jun ángel cwent Ryos. Yi tponeꞌn yi ángel tzi jul, nin octz tan patxꞌqueꞌn len yi cꞌub yi at tzi jul, nin cuꞌ cꞌolchoktz tibaj. 3 Wiꞌnin litzꞌuneꞌn wutz yi jun ángelaꞌtz, nin yi beꞌch tetz, chin stum nin. 4 Yi quilol yi eꞌ sanlar yi xtxolbileꞌj, wiꞌnin chixobeꞌn, ninin eꞌ baj yentijtz taꞌn. 5 Toqueꞌn tzun yi ángel tan yol scyetz eꞌ xnaꞌn. Itzun taltz:—Qui bin cxobwok, na na el intxum tetz yi na cxtzanwok tan joyleꞌn Jesús, yi jun yi jeꞌ pajij swutz pasyon. 6 Quiꞌct at tzoneꞌj. Ja wiꞌt itzꞌij junt tir, chi alijt cyen taꞌn. Or itetz, xmaywok cyen kale oc cyent. 7 Ma jaluꞌ, quibeneꞌnk lajkeꞌl tan talcheꞌn scyetz yi eꞌ ẍchusbeꞌtz yi ja wiꞌt itzꞌij junt tir ẍchixoꞌl almaꞌ. Alwok scyetz yi bajxpon iꞌ Galilea. Yaꞌstzun quilwit wutz. Tinaꞌtz cuntuꞌ inyol yi tajweꞌn tan walol tzitetz, —stzun yi ángel ban scyetz.
8 Yi quibital yi xnaꞌn yi xtxolbileꞌj, lajkeꞌl nin cyeleꞌntz tzi jul. Cyꞌaꞌnt nin xoꞌwtz cyaꞌn, nin cyꞌaꞌnt nin tzatzintz cyaꞌn yi chibeneꞌn tzꞌitpuj tan talcheꞌn stziblal scyetz yi eꞌ ẍchusbeꞌtz Jesús. 9 Te yi na chixon tbeꞌ, ẍchaj tib Jesústz ẍchiwutz, nin tal jun yos scyetz. Inti eꞌ cyetz, nin oc chiẍkansal quib te Jesús tan cꞌuꞌlajeꞌn, nin tan kꞌaleꞌn tkan.
10 —Quil cxobwok, ntin alwok quen scyetz eꞌ witzꞌun yi tajweꞌn tan chibeneꞌn jalen Galilea. Squileꞌ inwutz choneꞌj, —stzun iꞌ scyetz.
Yi xtxolbil yi cyal eꞌ sanlar
11 Te yi na chixon yi eꞌ xnaꞌn tbeꞌ, nin eꞌ ben cobox scyeri eꞌ sanlar tnum tan takꞌleꞌn part scyetz eꞌ wiꞌtz ajcaw, nin scyetz paleꞌ. 12 Chibeneꞌn tzun yi eꞌ wiꞌtz ajcaw scyeꞌj yi eꞌ chibajxom yi eꞌ judiy tan xtxumleꞌn yi mbi cuꞌn chiban. Yi bixeweꞌn chitxumuꞌn, nin cyakꞌ wiꞌnin pwok scyetz eꞌ sanlar tan qui cyalol yi mbi bajij, 13 nintzun cyaltz scyetz:
—Baꞌn cyaluꞌ: ‘Te yi na kawit lakꞌbal tzi jul, ja chopon yi eꞌ ẍchusbeꞌtz Jesús tan telseꞌn tzaj yi wankil tjul,’ cheꞌchuꞌ sban. 14 Ej nin kol tbit yi gobernador yi xtxolbileꞌj, kocopon tan tocseꞌn cꞌuꞌl iꞌ tan qui toqueꞌn tan chibuchleꞌnuꞌ, —cheꞌch eꞌ wiꞌtz ajcaw scyetz eꞌ sanlar.
15 Sajeꞌn tzun chitzꞌamol yi pwok nin eꞌ bentz tan talcheꞌn yi mbi cunin txolij scyetz. Iteꞌn xtxolbilaꞌstz na cyal yi eꞌ judiy jaluꞌ.
Yi eꞌ beneꞌn ẍchakol Jesús yi eꞌ apostl
(Mr 16.14-18; Lc 24.36-49; Jn 20.19-23)
16 Inti yi eꞌ ẍchusbeꞌtz Jesús, nin eꞌ bentz jalen Galilea. Eꞌ jeꞌ wi jun wutz yi alijt tan Jesús scyetz. 17 Yi quilol wutz Jesús, nintzun eꞌ cuꞌ mejloktz swutz tan cꞌuꞌlajeꞌn. Poro ilenin at cobox yi chicabej chicꞌuꞌl teꞌj. 18 Toqueꞌn tzun ẍkansal tib Jesús scyeꞌj, nintzun taltz:
—Akꞌij wetz inkꞌej tan cawuꞌn tcyaꞌj, nin tan cawuꞌn wuxtxꞌotxꞌ. 19 Chaꞌstzun te quibeneꞌnk chixoꞌl cyakil yi jilwutz wunak beneꞌn tziꞌn wi munt. Chuswokeꞌ te weri inchusuꞌn; nin banwokeꞌ bautizar tan biꞌ Intaj, nin tan wetz imbiꞌ yi in Cyꞌajol, tu yi biꞌ yi Espíritu Sant. 20 Chuswokeꞌ yi tajweꞌn tan chibnol taneꞌn cyakil yi caꞌwl yi alijt waꞌn tzitetz. Baꞌn kꞌukeꞌ icꞌuꞌl yi xomchin tziteꞌj jalen yil tzaj wiꞌ yi tiempeꞌj, —stzun Jesús bantz scyetz. Amén.