Quiꞌc junt Ryos yi choꞌnk chi Kajcaw
135
1 Kakꞌeꞌ kakꞌajsbil tetz Kajcaw.Kakꞌeꞌ kakꞌajsbil tetz Kajcaw, nin yi eꞌuꞌ yi eꞌuꞌ ẍchakum iꞌ cyakꞌeꞌuꞌ chikꞌajsbiluꞌ tetz.
2 Yi eꞌuꞌ yi ateꞌuꞌ xe najbil iꞌ tu yi eꞌuꞌ yi ateꞌuꞌ wutzkꞌanil yi najbil iꞌ,
3 tircuꞌn kakꞌeꞌ len kakꞌajsbil tetz iꞌ, na wiꞌnin banl talmaꞌ iꞌ skeꞌj.
Kakꞌeꞌ kakꞌajsbil tetz na na el kꞌajab iꞌ skeꞌj.
4 Nin jeꞌnak xtxaꞌol iꞌ Jacow tan xconeꞌn tetz iꞌ, yi Jacowaꞌtz yi na aꞌlchij Israel tetz.
5 Nchaꞌtz na el katxum tetz yi ketz Kajcaw, yi kaRyosil, cyaꞌl jun yi choꞌnk chi iꞌ tetz.
Quiꞌc jun ryos yi choꞌnk chi iꞌ.
6 Nin yi iꞌ tetz na xcyeꞌ tan banleꞌn alchok takleꞌnil yi na taj. Mpe ik tziꞌn tcyaꞌj nka tzoneꞌj wuxtxꞌotxꞌ nka xe mar.
7 Baꞌn na tanqꞌueꞌn tib yi sbakꞌ taꞌn jalen tziꞌn tcyaꞌj. Nin na cuꞌ xlitzꞌ taꞌn tetz techl yi na saj aꞌbal. Ej nin tan iꞌ at cyekꞌekꞌ.
8 Yi Kajcawaꞌtz iꞌ akꞌon chicaws yi eꞌ aj Egipto na nin eꞌ quim yi eꞌ bajx chinitxaꞌ taꞌn.
Nin nkꞌeꞌtz ntin yi eꞌ wunak, ma na nicyꞌnin yi bajx cyal yi cyawun.
9 Ja ẍchaj iꞌ wiꞌnin eꞌchk milawr scyetz yi eꞌ aj Egipto. Ẍchaj iꞌ wiꞌnin milawr tetz yi faraón scyuchꞌ yi eꞌ mas ajcaw yi ateꞌ xlaj iꞌ.
10 Ja chiquim wiꞌnin wunak tulak eꞌchk nación, nin wiꞌnin wiꞌtz rey eꞌ quim taꞌn.
11 Ja quim yi chireyil yi eꞌ amorreo taꞌn yi na biꞌaj Sehón.
Nin ja quim chireyil aj Basán taꞌn yi na biꞌaj Og.
Nchaꞌtz yi eꞌ rey yi ateꞌ Canaán ja chiquim taꞌn.
12 Ma yi chiꞌamaꞌl yi eꞌ reyaꞌtz ja takꞌ iꞌ sketz, yi oꞌ tetz tanum, yi oꞌ xonl Israel.
13 Wajcaw, yi teruꞌ biꞌuꞌ snaꞌwsok sbneꞌ opon tunintz na quil sotzuꞌ tetz ben kꞌej ben sak.
14 Tzꞌocopon Kajcaw tan banleꞌn xtisyaꞌ skaxoꞌl yi oꞌ tetz tanum. Nin tzꞌelepon kꞌajab iꞌ skeꞌj.
15 Cyakil yi chiryosil yi eꞌ wunak banij cuntuꞌ quitaneꞌn tan oro nka tan sakal, na wunak tuꞌ bnol tetz.
16 At chitziꞌ taneꞌn poro qui na chijilon.
At chiwutz taneꞌn poro qui na chixmayin.
17 At chiẍchin taneꞌn poro qui na quibit jun yol.
Qui na chiyuc quib, na quiꞌc chixew at.
18 Nin yi eꞌ bnol cyetz, na elepont yi niꞌcuꞌn eꞌ tu chiryosilaꞌtz.
Nchaꞌtz yi eꞌ yi na kꞌukeꞌ chicꞌuꞌl te eꞌchk ryosaꞌtz, niꞌcuꞌn eꞌ scyuchꞌ.
19 Ma yi oꞌ ketz yi oꞌ xonl Israel, kakꞌeꞌ bin kakꞌajsbil tetz Kajcaw.
Nchaꞌtz yi eꞌ kapaleꞌil, tajweꞌn tan cyakꞌol chikꞌajsbil tetz iꞌ.
20 Nin nchaꞌtz yi eꞌ xonl Leví, tajweꞌn tan cyakꞌol chikꞌajsbil tetz Kajcaw.
Cyakil oꞌ yi na kek ẍchiꞌ Kajcaw, kakꞌeꞌ kakꞌajsbil tetz iꞌ.
21 Kakꞌeꞌ bin kꞌej Kajcaw yi najlij le tnum Jerusalén, yi at wi Sión.
Kakꞌeꞌ kakꞌajsbil tetz iꞌ.