Quil chiyucan yi eꞌ yi choꞌn kꞌuklij chicꞌuꞌl te Kajcaw
125
1 Cyakil yi eꞌ yi choꞌn kꞌuklij chicꞌuꞌl te Kajcaw, niꞌcuꞌn quitaneꞌn cyeꞌtz chi taneꞌn yi wiꞌwtz Sión yi cyaꞌl na xcyeꞌ tan yuqueꞌn muꞌẍ tal, nin iẍnin ateꞌ cyeraꞌtz sbneꞌ opon tunintz.2 Chi taneꞌn yi tnum Jerusalén yi at eꞌchk wiꞌwtz solteꞌj, chaꞌtz taneꞌn Kajcaw, at iꞌ scyeꞌj yi eꞌ tetz tan chiqꞌuicyꞌleꞌn cyakil tiemp.
3 Yi eꞌ mal wunak yi na chicawun jaluꞌ nkꞌeꞌtz cyakil tiemp ẍchicawunk le yi amaꞌl yi takꞌnak Ryos scyetz yi tanum. Na qui na taj iꞌ yi nink chixom yi tetz tanum te yi yab ajtzaꞌkl yi na chixom yi eꞌ wunakaꞌtz teꞌj.
4 Wajcaw, elk kꞌajabuꞌ scyeꞌj yi eꞌ balaj wunak. Bneꞌuꞌ jun baꞌn scyetz yi eꞌ yi jicyuch te cyajtzaꞌkl.
5 Poro yi eꞌ yi na chixom te eꞌchk yab ajtzaꞌkl, lok takꞌuꞌ chicaws chi na tulejuꞌ yi eꞌ mas mal nak.
¡Lok jal tzatzin paz le tnum Israel!