Yi tkꞌol Jacow yi banl tibaj Efraín tu Manasés
48
1 Itzun bantz yi teleꞌn tiemp, nintzun opon stziblal twiꞌ Ẍep yi yabiꞌẍ yi taj. Beneꞌn tzun Ẍeptz tan tilweꞌn nin eꞌ xom nin yi cob cyꞌajl teꞌj, yi Manasés tu Efraín. 2 Ma yi cyoponeꞌn nintzun aꞌlchij tetz wutzileꞌn Jacow yi nsken chopon Ẍep tan tilweꞌn. Yi tbital yi xtxolbileꞌj nintzun buch tibtz tan cꞌoleweꞌn wi txꞌach. 3 Itzun taltz tetz Ẍep:—Nicyꞌ yi atin tzaj le amaꞌl yi na biꞌaj Luz, cwent Canaán, ja ẍchaj tib Kataj Ryos tzinwutz, yi Kataj yi na xcyeꞌ te cyakil, nin ja takꞌ iꞌ banl swibaj. 4 Na nin tal swetz: “Ma jaluꞌ Jacow, sjalok wiꞌnin acyꞌajl waꞌn. Nin yi eꞌ acyꞌajlaꞌtz sjalok wiꞌnin chixonl sbneꞌ opon tunintz.a Nin yi aẍaꞌtz cxocopon tetz chimam cyen cobox nación. Nin swakꞌeꞌ yi amaꞌleꞌj, yi Canaán, scyetz chixonluꞌ tetz ben kꞌej ben sakꞌ”, stzun Ryos bantz swetz. 5 Ma jaluꞌ Ẍep, yi cob atz acyꞌajl yi nchitzꞌij tzoneꞌj Egipto yi ntaxk nuꞌl wetz, yi tal Efraín tu Manasés, nchaꞌtz eꞌ wetz jaluꞌ chi quitaneꞌn Rubén tu Simeón. 6 Poro kol chijal mas atz acyꞌajl, eꞌ awetz sbneꞌ. Ej nin tantuꞌ yi quitzꞌun quitzicy quib ẍchibneꞌ tu Efraín nin Manasés stzꞌakꞌlok nin cyetz chiꞌherens. 7 Te yi wajeꞌn tzaj Padan-aram, nin yi kuleꞌn Canaán, choꞌn tzun quimeꞌn yi kꞌajtzun atxuꞌ. Muꞌẍt cuntuꞌ tan koponeꞌn le tnum Efrata yi quimeꞌn iꞌ. Choꞌn tzun mukxeꞌn cyentz waꞌn, taꞌsteꞌnintz tzi beꞌ, yi beꞌaꞌtz yi na ucuꞌl Efrata, yi jaluꞌ na biꞌaj Belén,b stzun Israel bantz.
8 Ma yi beneꞌn tilol Israel chiwutz yi eꞌ cyꞌajl Ẍep, nintzun jaktz:
—¿Naꞌ scyetz eꞌ yi cob yajeꞌj?
9 —Yaꞌstzun yi cob incyꞌajl yi ntakꞌ Ryos swetz te yi atin tzoneꞌj Egipto, stzun Ẍep bantz.
—Yi ko yaꞌtz yi eꞌ acyꞌajl baꞌn bin chiẍkankoꞌc tzaj tzinxlaj na swakꞌeꞌ imbanl squibaj, stzun wutzileꞌn Israel bantz tetz Ẍep.
10 Qui nintzun aꞌw mas wutz Israel tan paj yi nsken tijin. Nintzun eꞌ ben ẍkansal Ẍep yi cob cyꞌajlaꞌtz swutz wutzileꞌn taj. Toqueꞌn tzun Israel tan chimoxeꞌn tzaj nin tan stzꞌubleꞌn xak chitziꞌ. 11 Nchaꞌtz ben tloltz tetz Ẍep:
—I bin jaluꞌ Ẍep, Ryos nmakꞌon puntil sketz tan kilolt kib junt tir tzawuchꞌ, nin tan cheꞌ wajskel yi cob acyꞌajleꞌj, stzun Israel.
12 Teleꞌn tzaj tzun tcyꞌal Ẍep yi eꞌ cyꞌajl wi tkan yi taj, nintzun cu joklok iꞌ swutz jalen cweꞌn poneꞌn yi wutz plaj wuxtxꞌotxꞌ. 13 Itzun yi jeꞌn txiclok nintzun ben tan ẍchꞌineꞌn tzaj Efraín tan yi jalaj kꞌab yi sbal ma Manasés tan yi jalajt kꞌab yi max. Nintzun eꞌ octz taꞌn xlaj yi taj. Choꞌn tzun cyajeꞌn cyen Efraín le max Israel, ma yi Manasés le sbal. 14 Poro yi jeꞌn tkꞌol Israel kꞌab chiwiꞌ, choꞌn tzun tajeꞌn cyꞌen yi sbal twiꞌ Efraín yi caꞌp cyꞌajol, ma yi max, choꞌn tajeꞌn nin twiꞌ Manasés yi bajx cyꞌajol. Pasyoniꞌn tzun ban yi kꞌab iꞌ chiwiꞌ. 15 Yaꞌstzun ban Israel tan takꞌleꞌn banl tibaj Ẍep tu yi eꞌ xonl sbneꞌ opon tunintz. Nin te yi ateꞌn yi kꞌab Israel ẍchiwiꞌ yi eꞌ cyꞌajl Ẍepaꞌtz itzun taltz:
“Yi chiRyosil intaj Isaac tu incyꞌeꞌx Abraham, nin yi iteꞌn nin wetz inRyosilaꞌtz, yi qꞌuicyꞌlom wetz jetz yi witzꞌleꞌnix,
16 tu yi ángel yi nchincolon tkꞌab yi eꞌchk takleꞌn cachiꞌ, takꞌ tzaj Iꞌ yi banl squibaj yi cob xicyeꞌj. Na tan eꞌ quil sotz imbiꞌ tu chibiꞌ intaj Isaac tu Abraham. Nink jal wiꞌnin chinitxajil. Nink chipucꞌun wi munt,” stzun Israel bantz.
17 Poro yi tilol Ẍep yi xtxolbileꞌj qui nin cu swutz yi choꞌn tajeꞌn cyꞌen yi jalaj kꞌab sbal twiꞌ Efraín, nintzun bentz tan telseꞌn yi jalaj kꞌab sbal yi taj twiꞌ Efraín nin icyꞌ tkꞌol twiꞌ Manasés. 18 Nintzun taltz:
—¡Quiꞌ taꞌ, nkꞌeraꞌtz ntulejuꞌ! na je teꞌtz yi bajxnakeꞌj. Takꞌeꞌnuꞌ yi jalaj kꞌabuꞌ yi sbaluꞌ twiꞌ iꞌ.
19 Qui nintzun cujij yi wutzileꞌn Jacow, nin taltz tetz:
—Na el intxum tetz, nin ja wiꞌt wil yi nchaꞌtz Manasés tzꞌocopon tetz jun tnum, nin sjalok kꞌej. Poro yi titzꞌun, sjalok mas kꞌej swutz yi stzicy. Sjalok wiꞌnin nación tan tetz xonl.
20 Yi tkꞌol Israel yi banl squibaj yi cob cyꞌajl Ẍepaꞌtz nin xcon yi cobox yoleꞌj taꞌn:c
—Cyakil cuꞌn yi eꞌ inxonl xconk yi ibiꞌ cyaꞌn tan takꞌleꞌn chibanl squibaj chinitxaꞌ nin scyaleꞌ: “Nink sban Ryos tzaweꞌj chi ban scyeꞌj Efraín tu Manasés,” stzun Jacow bantz.
21 Tan yi xtxolbileꞌj oc Efraín tetz bajx tan Jacow.
—Ma jaluꞌ Ẍep, chinquimok wetz, poro Ryos stzꞌaꞌtok tziteꞌj nin xpakxokwok taꞌn le chiluwar yi eꞌ kamam kateꞌ. 22 Ja wakꞌ mas ara herens ẍchiwutz yi eꞌ awutzicy, na atz yi amaꞌl yi elnaktzaj incolpil ẍchikꞌab yi eꞌ amorreo yi koqueꞌn tan oyintziꞌ scyuchꞌ. Yi jun amaꞌlaꞌtz iꞌtz yi Siquem,d nin awetz sbneꞌ, stzun Jacow bantz.