47
1 Nintzun ben Ẍeptz tan talcheꞌn stziblal tetz faraón. Nin taltz tetz: “Ja chuꞌl intaj scyuchꞌ wutzicy yi najlcheꞌ Canaán. Ja wiꞌt chuꞌl le amaꞌl Gosén. Cyꞌaꞌn len cyakil chimeꞌbiꞌl cyaꞌn. Ej nin xomcheꞌ cyawun scyeꞌj,” stzun iꞌ bantz. 2 Nintzun eꞌ jeꞌ xtxaꞌol oꞌ scyeri eꞌ stzicy tan tajskel faraón chiwutz. 3 Ma yi cyoponeꞌn nintzun oc faraón tan jakleꞌn scyetz:—¿Mbi jilwutz akꞌunil na aꞌw itaꞌn?
—Taꞌ, yi ketz, yi oꞌ ẍchakumuꞌ, oꞌ len pstor cneruꞌ chi chisajleꞌn eꞌ kamam kateꞌ. 4 Chaꞌstzun te ja kuꞌl tan kanajeweꞌn tzoneꞌj, na quiꞌct kawaꞌ Canaán. Ej nin quiꞌct muꞌẍt tal chꞌim tetz chiwaꞌ yi eꞌ kawun. Chaꞌstzun te elk kꞌajabuꞌ skeꞌj nink takꞌuꞌ amaꞌl sketz tan kanajeweꞌn tul yi amaꞌl Gosén, cheꞌch eꞌ bantz tetz faraón.
5 Beneꞌn tzun tlol faraón tetz Ẍep:
—Ma jaluꞌ Ẍep, ja bin chuꞌl yi ara taj scyuchꞌ yi eꞌ awutzicy tzaweꞌj. 6 Baꞌn bin chinajeꞌ tul alchok luwaril cwent Egipto. Poro baꞌn tzawakꞌ amaꞌl scyetz tan chinajeweꞌn cyen le amaꞌl Gosén na iꞌtz yi luwar mas balaj tzoneꞌj Egipto. Ej nin ko at cobox chixoꞌl yi chin list nin eꞌ, baꞌn choꞌc awaꞌn tan chiqꞌuicyꞌleꞌn yi eꞌ wetz wawun, stzun faraón bantz.
7 Nchaꞌtz ben tcyꞌal Ẍep yi taj tan tajskel faraón wutz. Itzun yi cyocomponeꞌn swutz nintzun kꞌajlan Jacow tetz nin takꞌ banl tibaj. 8 Jakol tzun faraón tetz Jacow.
—¿Jatnaꞌ yobuꞌ taꞌ?
9 —Yi mero bintzij Taꞌ, ja chinxon beneꞌn tziꞌn wuxtxꞌotxꞌ mas jun cient tu junaklajix yob. Poro qui nin mben xcon mas intiemp ẍchiwutz yi eꞌ inmam inteꞌ. Ej nin te yi cobox yobaꞌtz at balaj nin at ploj yi ja noj quen tzinwutz, stzun Jacow bantz.
10 Yi tlol Jacow yi xtxolbilaꞌseꞌj nintzun eꞌ jatx quib tu faraón. 11 Inin tzun tulej Ẍeptz quib yi tal faraón tetz. Nintzun takꞌ yi balaj amaꞌl tetz taj scyuchꞌ yi eꞌ stzicy. Choꞌn tzun chinajeweꞌn swutz yi amaꞌlaꞌtz yi na biꞌaj Ramsés.a 12 Nchaꞌtz toy Ẍep ixiꞌn triw tetz chiwaꞌ yi wutzileꞌn taj, scyuchꞌ yi eꞌ stzicy, tu cyakil yi eꞌ xonl iꞌ.
Yi tajtzaꞌkl Ẍep tan jaleꞌn meꞌbiꞌl faraón
13 Itzun bantz beneꞌn nintzun ban loꞌon yi weꞌj. Nin cyaꞌl nin na jaleꞌt triw. Wiꞌnin tzun wunak eꞌ quimtz tan weꞌj Egipto. Ej nin nchaꞌtz nkꞌeꞌtz ntin Egipto, ma na nchaꞌtz Canaán. 14 Ma yi triw yi nsken wiꞌt chamxij tan Ẍep nintzun baj cꞌayiltz. Itzun yi jamel yi triwaꞌtz choꞌn tzun tkꞌol Ẍep tetz faraón. 15 Itzun yi bajeꞌn chipuꞌk yi eꞌ aj Egipto tu yi eꞌ aj Canaán, nintzun eꞌ opontz tan talcheꞌn tetz Ẍep.
—Taꞌ, elk kꞌajabuꞌ skeꞌj. Takꞌuꞌ kawaꞌ. ¿Nxac ltakꞌuꞌ amaꞌl tan kaquimeꞌn tan weꞌj tan paj tu yi quiꞌct ketz kapuꞌk tan lokꞌcheꞌn mas triw?
16 —Baꞌn, stzun Ẍep. —Ko quiꞌc ipuꞌk cyꞌajwok tzaj yi itawun. Tzintxꞌexeꞌ tu triw.
17 Cyoponeꞌn tzun eꞌ aj Egipto tu Ẍep cyꞌaꞌn len yi cyawun cyaꞌn. At eꞌ cyꞌaꞌn chej cyaꞌn, cyꞌaꞌn wacẍ cyaꞌn, cyꞌaꞌn cneꞌr cyaꞌn, cyꞌaꞌn buruꞌ cyaꞌn, tan xtxꞌexeꞌn tu triw. Nin takꞌ Ẍep ixiꞌn triw scyetz tetz yi jun yobaꞌtz. 18 Itzun yi ticyꞌeꞌn yi jun yobaꞌtz nintzun eꞌ opont junt tir swutz Ẍep tan cuꞌswutzil, nintzun cyaltz:
—Iluꞌ kajcaw, quil kajal cuꞌn wikakꞌ tan talcheꞌn yi skachojeꞌ yi triw, na quiꞌct kapuꞌk. Ej nin nchaꞌtz quiꞌct kawun tan katxꞌexul tu triw. Na ja wiꞌt kakꞌ cyakil kameꞌbiꞌl teruꞌ. Quiꞌc junt takleꞌn lkakꞌ tetz jamel yi triw, jalt yi oꞌ tu yi katxꞌotxꞌ. 19 Cujk tanuꞌ taꞌ tan kacꞌayil kib teruꞌ tu yi katxꞌotxꞌ, na jaltaꞌtz at skuchꞌ. Ej nin list oꞌ tan koqueꞌn tetz esclaw yi patrónuꞌ. Ej nin baꞌn kakꞌuj swutz yi katxꞌotxꞌ cwent iꞌ. Ntin nink takꞌuꞌ kasemiy tan koqueꞌn tan akꞌun, bantz qui txꞌakxeꞌn yi katxꞌotxꞌ, cheꞌch tzun eꞌ bantz tetz Ẍep.
20 Nintzun cujij Ẍeptz. Nin lokꞌ iꞌ cyakil yi chitxꞌotxꞌ yi eꞌ aj Egipto.b Nintzun octz tetz cwent faraón. Tan paj yi jun chin weꞌj yi ateꞌ cuꞌnt, ja chicꞌay yi eꞌ aj Egipto cyakil yi chitxꞌotxꞌ tetz faraón. 21 Itzun yi bajeꞌn chicꞌayil yi chitxꞌotxꞌ, nintzun eꞌ octz chicyakil cuꞌn yi eꞌ aj Egipto tetz esclaw faraón. 22 Jalt chitxꞌotxꞌ yi eꞌ paleꞌ qui lokꞌ Ẍep, na na takꞌ faraón ixiꞌn triw scyetz tetz chiwaꞌ. Chaꞌstzun te qui nchicꞌay yi chitxꞌotxꞌ, na at cyetz chiwaꞌ.
23 Itzun tal Ẍep scyetz cyakil wunak:
—Yi axwok itetz tu yi itxꞌotxꞌ ja cxoꞌc len cwent faraón. Ma jaluꞌ or tzibeneꞌn tan akꞌun swutz yi itxꞌotxꞌ, nin cyꞌajwoknin yi semiy triweꞌj. 24 Ej nin yil jeꞌ yi cosech tajweꞌn tzitakꞌwok yi toꞌiꞌn part te yi cosech tetz faraón. Ma yi cyajt yaꞌstzun itetz. Baꞌn xcon itaꞌn tetz iwaꞌ nin tetz semiy tetz junt tiemp, stzun Ẍep bantz scyetz.
25 —Iluꞌ kajcaw, tyoẍtuꞌ teruꞌ taꞌ, na chin balaj nin iluꞌ skeꞌj, na ja kaclax tanuꞌ tkꞌab weꞌj. Ma jaluꞌ baꞌn koꞌc tetz esclaw faraón.
26 Ej nintzun cawun Ẍep tan telseꞌn yi jun leyaꞌtz scyetz cyakil wunak cwent Egipto tan cyakꞌol yi toꞌiꞌn part te yi cosech tetz faraón. Ej nin yi jun leyaꞌtz at nintz jaluꞌ. Poro yi eꞌ paleꞌ qui na cyakꞌ cyetz, na qui nchicꞌay chitxꞌotxꞌ tetz faraón.
27 Itzun yi teleꞌn tiemp cyakꞌun yi eꞌ xonl Israel le amaꞌl Gosénaꞌtz pucꞌuneꞌn nin eꞌ bantz.c 28 Inti Jacow, aꞌtij juklaj yob le amaꞌlaꞌtz. Choꞌn stzꞌakeꞌn jun cient tu caꞌwunak juk yob taꞌn.
29 Ma yi nachoneꞌn iꞌ yi nsken tijin,d nin yi txant tan quimeꞌn, nin cawun iꞌ tan ẍchakleꞌn Ẍep. Itzun yi toponeꞌn Ẍep nintzun tal tetz:
—Ma jaluꞌ Ẍep, na waj yil tzaban yi juneꞌj, akꞌoc tzaj akꞌab jakꞌ incux, tetz jun techl yi cẍelepon cuꞌn teꞌj yi cawl yi swaleꞌ tzatz. 30 Je wajbileꞌj, yil chinquim: Qui na waj yil chin mukxij tzoneꞌj Egipto na yi wajbil iꞌtz yil chinmukxij kale eꞌ mukxnakeꞌt yi eꞌ inmam inteꞌ.e Chaꞌstzun te na waj yil cẍben tan mukleꞌn inwankil kale eꞌ mukxnakeꞌt cyetz.
—Cuj taꞌ, stzun Ẍep. —Tzimbneꞌ yi teruꞌ tajbiluꞌ.
31 —¿Jun cuꞌn peꞌ na awal Ẍep?
—Jun cuꞌn taꞌ, sak swutz Ryos yi nelepon cuꞌn teꞌj quib yi tajbiluꞌ, stzun Ẍep bantz.
Yi tbital Israel yi yol Ẍep, nintzun aj coyloktz wi xtxꞌach.