Yi beneꞌn Jacow le tnum Egipto
46
1 Itzun bantz cweꞌn nintzun eꞌ ban Israel tbeꞌ tu cyakil yi najal iꞌ tuml yi beꞌch cyetz tan chibeneꞌn Egipto. Yi cyoponeꞌn Beerseba, nintzun toy iꞌ jun xtxꞌixwatz tetz Kataj Ryos, yi Ryosil yi kꞌajtzun taj. 2 Te yi jun akꞌbalaꞌtz jiloneꞌn tzun Ryos tetz Israel tcꞌuꞌl jun wutzicyꞌ taneꞌn. Itzun taltz tetz:—¡Jacow! ¡Jacow!
—Je ineꞌj Taꞌ, stzun iꞌ bantz.
3 —I inaꞌtz in Ryos, yi Ryosil yi kꞌajtzun ataj. Qui bin cxob tan abeneꞌn Egipto, na choꞌn chijepon impucꞌsal eꞌ axonl tetz jun chin wutzileꞌn nación. 4 Chinxomok tzaweꞌj nin jun cuꞌn yol cheltuꞌl incyꞌal yi eꞌ axonl. Ej nin nchaꞌtz yil cẍquim tzꞌocopon Ẍep, yi acyꞌajl, tan jopleꞌn cuꞌn awutz,a stzun Ryos bantz tetz Jacow.
5 Itzun yi nsken jilon Ryos tetz Jacow, icyꞌeꞌn nin eꞌ bantz. Nintzun eꞌ oc yi eꞌ cyꞌajl tan tocseꞌn yi wutzileꞌn chitaj tul jun scyeri careꞌt yi ntakꞌ faraón scyetz. Nchaꞌtz eꞌ ban tu quixkel scyuchꞌ chinitxaꞌ. 6 Ej nin nchaꞌtz eꞌ ben quicyꞌal yi eꞌ cyawun tu cyakil chimeꞌbiꞌl yi nsken jal cyakꞌun Canaán. Icyꞌeꞌn nintzun eꞌ ban Jacow tan cyoponeꞌn Egipto.b 7 Cyakil yi eꞌ cyꞌajl Jacow scyuchꞌ yi eꞌ mamaj eꞌ xomnin teꞌj.
8 Je chibiꞌeꞌj yi eꞌ xonl Jacow yi eꞌ opon Egipto:
10 Ma yi eꞌ tetz Simeón: Jemuel, Jamín, Ohad, Jaquín, Zohar tu Saúl, yi tal jun xnaꞌn aj Canaán.
11 Ma yi eꞌ tetz Leví: Gersón, Coat tu Merari.
12 Ma yi eꞌ tetz Judá: Er, Onán, Sela, Fares tu yi yaj Zara. (Yi Er tu Onán, nsken chiquim Canaán.) Yi eꞌ cyꞌajl Fares iꞌtz: Hezrón tu Hamul.
13 Ma yi eꞌ tetz Isacar: Tola, Fúa, Job tu Simrón.
14 Ma yi eꞌ tetz Zabulón: Sered, Elón tu Jahleel.
15 Cyakil yi eꞌchk biꞌajaꞌtz eꞌ cuꞌn tal tu mamaj Lea. Choꞌn jaleꞌn yi eꞌ tal Lea-aꞌtz tu Jacow yi nicyꞌ yi ateꞌ tzaj le luwar Padan-aram. Nchaꞌtz at jun xun yi tal iꞌ yi na biꞌaj Dina. Yi tajlal cyakil yi eꞌ tal tu mamaj Lea jepon te junak oxlaj chixoneꞌn, yaj tu xnaꞌn.
16 Ma yi eꞌ cyꞌajl Gad yi tal Zilpa iꞌtz: Zifión, Hagui, Ezbón, Suni, Eri, Arodi tu Areli. 17 Ma yi eꞌ cyꞌajl Aser iꞌtz: Imna, Isúa, Isúi, Bería tuml Sera yi cyanub. Itzun yi eꞌ cyꞌajl Bería yi eꞌ mamaj Aser iꞌtz: Haber tu Malquiel. 18 Cyakil yi eꞌchk biꞌajaꞌtz eꞌ cuꞌn tal tu mamaj Zilpa tu Jacow. Yi Zilpaꞌaꞌtz iꞌtz yi esclaw yi toynak wutzileꞌn Labán tetz Lea yi meꞌl, nin yi tajlal cyakil yi eꞌ tal tu mamaj Zilpa eꞌ jepon te waklaj chixoneꞌn, yaj tu xnaꞌn.
19 Ma yi eꞌ tal Raquel yi txkel Jacow iꞌtz: Ẍep tu Benjamín. 20 Itzun yi eꞌ cyꞌajl tetz Ẍep yi jal tu Asenat yi meꞌl Potifera yi paleꞌ le tnum On,c iꞌtz Manasés tu Efraín. Choꞌn quitzꞌeꞌn cyeꞌtz Egipto. 21 Itzun yi eꞌ cyꞌajl tetz Benjamín iꞌtz: Bela, Bequer, Asbel, Gera, Naamán, Ehi, Ros, Mupim, Hupim tu Ard. 22 Cyakil yi eꞌchk biꞌajaꞌtz eꞌ cuꞌn tal tu mamaj Raquel tu Jacow, nin eꞌ jepon te cyajlaj chixoneꞌn, yaj tu xnaꞌn.
23 Ma yi jun cyꞌajl Dan iꞌtz Husim.
24 Ma yi eꞌ cyꞌajl Neftalí iꞌtz: Jahzeel, Guni, Jezer tu Silem. 25 Cyakil yi eꞌchk biꞌajaꞌtz eꞌ cuꞌn tal tu mamaj Bilha tu Jacow. Yi Bilha-aꞌtz iꞌtz yi esclaw yi toynak wutzileꞌn Labán tetz Raquel yi meꞌl. Eꞌ jepon juk chixoneꞌn.
26 Cyakil yi eꞌ xonl Jacow yi eꞌ yaj yi eꞌ opon Egipto eꞌ jepon cyajlal te oxcꞌal tu kak chixoneꞌn.d Ma yi eꞌ yi eꞌ tlib Jacow qui eꞌ oc tajlal yi oxcꞌal tu kakaꞌtz. 27 Ma yi cob cyꞌajl Ẍep choꞌn quitzꞌeꞌn cyeꞌtz Egipto. Ja tzun jepon yi tajlal yi xonl Jacow yi eꞌ opon Egipto tetz oxcꞌal tu lajuj chixoneꞌn.e
28 Itzun yi cyoponeꞌn nakajil Egipto nintzun ben ẍchakol Jacow yi Judá tan talcheꞌn stziblal tetz Ẍep, nin tan talcheꞌn tetz tan sajeꞌn iꞌ tan chicꞌulcheꞌn yi taj le luwar Gosén. 29 Yi tbital Ẍep yi nsken chuꞌl yi taj Gosén nintzun cawunintz scyetz yi eꞌ ẍchakum tan cyoqueꞌn tan wekleꞌn yi tetz xoꞌmbil tan beneꞌn tan chicꞌulcheꞌn yi eꞌ taj. Yi toponeꞌn tu taj nintzun bentz tan kꞌaleꞌn nin okꞌ cuꞌntz. Nim tzun tiemp ban iꞌ-tz tan oꞌkl. 30 Itzun tal yi taj tetz:
—Ma jaluꞌ yaj, baꞌn chinquim na ja bin kil kib tzawuchꞌ nin itzꞌiẍeꞌt, stzun Israel bantz.
31 Beneꞌn tzun tlol Ẍep scyetz eꞌ stzicy scyuchꞌ eꞌ najal yi taj:
—I bin jaluꞌ nchimben wetz tan talcheꞌn stziblal tetz faraón. Swaleꞌ cyen tetz yi ja chuꞌl yi eꞌ wutzicy scyuchꞌ eꞌ inxonl yi najlcheꞌ Canaán. Ja chuꞌl tan chinajeweꞌn tzoneꞌj Egipto. 32 Ja ul cyakil chimeꞌbiꞌl cyaꞌn. Ej nin xomcheꞌ cyakil yi cyawun scyeꞌj na yi cyetz cyakꞌun iꞌtz pstoreꞌn cneꞌr tu wacẍ, chinch sbneꞌ tetz faraón. 33 Ma cyeruꞌ, kol jak faraón scyeruꞌ mbiꞌtz cyakꞌunuꞌ, baꞌn cyaluꞌ tetz: 34 “Yi ketz kakꞌun taꞌ iꞌtz pstoreꞌn cneruꞌ, na yaꞌstzun cyakꞌun kamam kateꞌ sajleꞌn tunintz,” cheꞌchuꞌ sban tetz. Baꞌn cyaluꞌ yi xtxolbileꞌj tetz, bantz chicyajeꞌn cyenuꞌ tzoneꞌj Gosén, na yi eꞌ aj Egipto, xan ẍchiwutz kol chinajeꞌ pstor cneꞌr ẍchixoꞌl.