Yi ẍchajol tib Ẍep ẍchiwutz eꞌ stzicy
45
1 Itzun yi tbital Ẍep yi xtxolbilaꞌseꞌj qui nin tzun xtxꞌajtz, nintzun taltz scyetz yi eꞌ aj Egipto yi ateꞌ xe caꞌl. “Caleꞌnwok tzoneꞌj.” Itzun yi cyeleꞌn, nin yi chicyajeꞌn cyen Ẍep chichuc scyuchꞌ yi eꞌ stzicy,a nintzun tal iꞌ yi bintzi scyetz yi i iꞌaꞌtz yi quitzꞌun. 2 Xeꞌteꞌn nin ban Ẍep tan oꞌkl. Chin wiꞌ nintzun bantz ninin quibit yi eꞌ aj Egipto yi ateꞌ chinakaꞌjil. Beneꞌn nintzun ban loꞌon yi stziblalaꞌtz nin nchaꞌtz tbit faraón yi mbi cuꞌn bajij xe caꞌl Ẍep. 3 Je yol Ẍepeꞌj yi tlol yi bintzi scyetz eꞌ stzicy:
—I inaꞌtz in Ẍep yi ititzꞌun, ¿Itzꞌeꞌt peꞌ tal intaj?
Yi quibital yi eꞌ stzicy Ẍep yi xtxolbilaꞌseꞌj, quiꞌt nin tzun aꞌw yol cyaꞌn tan paj yi cyeleꞌn tunin yabtz teꞌj.b 4 Beneꞌn tzun tlol Ẍeptz scyetz:
—¡Ẍkantzajwok tzinwutz!
Nintzun eꞌ ben chiẍkansal quibtz.
—I inaꞌtz in Ẍep. Kitzꞌun kutzicy kib tzituchꞌ. ¿Qui peꞌ na cxnachon wok teꞌj, yi sajleꞌn icꞌayil in scyetz yi eꞌ aj pyaj yi at cyulbil tzoneꞌj Egipto? 5 Poro qui na waj yil cxbisunwok taꞌn, nka yil jal oyintziꞌ tzixoꞌlwok tan paj. Ryos txumul tetz yi xtxolbileꞌj tan wuleꞌn chan tzoneꞌj, bantz kaclaxeꞌn. 6 Ja wiꞌt kil cob yob weꞌj. Ej nin at tzaj nin oꞌt yob yi quiꞌt kil cosech. 7 Poro Ryos nnuꞌlsan tzoneꞌj yi ntaxk cxuꞌl itetz tan qui kasotzeꞌn tuml kaxonl. Tan jun chin milawr ja kaclax taꞌn. 8 Ryos nnuꞌlsan tzoneꞌj. Nkꞌeꞌtz axwok nnuꞌlsan. Nin Ryos noꞌcsan tetz akꞌol tajtzaꞌkl faraón. Nchaꞌtz iꞌ nnoꞌcsan tetz wiꞌtz martomaꞌ tibaj cyakil caꞌl faraón. Ej nin tantuꞌ yi banl talmaꞌ Ryos na chincawun tibaj cyakil Egipto, stzun Ẍep bantz.
9 Itzun yi tlol iꞌ yi xtxolbilaꞌseꞌj nintzun taltz scyetz yi eꞌ stzicy:
—Or quiloꞌkwok, nin cun alwok tetz intaj. Je yol Ẍep yi cyꞌajluꞌeꞌj: “Ryos nnoꞌcsan tetz ajcaw tzoneꞌj Egipto. Ma jaluꞌ baꞌn tzꞌuluꞌ tzoneꞌj Egipto tan najeweꞌnuꞌ. Ej nin lok tzꞌulchanuꞌ. 10 Baꞌn najeꞌuꞌ le jun amaꞌl yi na biꞌaj Gosén, tuml yi eꞌ cyꞌajluꞌ, nin yi eꞌ mamuꞌ scyuchꞌ cyakil yi eꞌ tawunuꞌ. Baꞌn tzꞌuluꞌ tan najeweꞌn le amaꞌl Gosén bantz nakaꞌj skaxoꞌl sbneꞌ tuchꞌuꞌ. 11 Yil chinajeꞌuꞌ tul yi jun amaꞌlaꞌtz, swakꞌeꞌ chiwaꞌuꞌ bantz qui chitijoluꞌ qꞌuixcꞌuj, scyuchꞌ yi eꞌ yi xomcheꞌ teꞌjuꞌ, na yi jun weꞌj yi na tzan at tzaj nin oꞌt yob tan ticyꞌeꞌn,”c cxchijwok tzꞌan tetz intaj. 12 I bin jaluꞌ axwok stiw te inyoleꞌj yi ja wal tzitetz. Nchaꞌtz yi witzꞌun Benjamín iꞌ stiw sbneꞌ te inyoleꞌj. 13 Alwok cyen tetz intaj yi ẍeꞌn wutaneꞌn tu yi inkꞌej yi at tzoneꞌj Egipto. Nin alwok cyen tetz, cyakil yi mitilwok tzoneꞌj. ¡Quiloꞌk binwok jalcuꞌn, nin cyꞌajwok tzaj yi tal intaj!d stzun Ẍep bantz scyetz.
14 Beneꞌn tzun Ẍeptz tan kꞌaleꞌn Benjamín yi titzꞌun, nin okꞌtz. Nchaꞌtz ban Benjamín nin bentz tan kꞌaleꞌn tzaj Ẍep nin eꞌ okꞌ cuꞌntz chicabil. 15 Nchaꞌtz ban iꞌ scyeꞌj yi eꞌ mas stzicy nin ben iꞌ-tz tan chikꞌaleꞌn nin tan stzꞌubleꞌn xak chitziꞌ. Yi bajeꞌn yi xtxolbilaꞌseꞌj kalenaꞌs tzun eꞌ nimsaj chicꞌul yi eꞌ stzicy tan yol tetz Ẍep.
16 Beneꞌn nintzun ban loꞌon yi stziblal, nin tbit faraón yi iꞌtz yi eꞌ stzicy Ẍep yi cobox yajaꞌtz yi eꞌ opon. Nintzun tzatzin faraón scyuchꞌ yi eꞌ mast ajcaw yi ateꞌ jakꞌ caꞌwl iꞌ, te yi xtxolbilaꞌseꞌj. 17 Itzun tal faraón tetz Ẍep:
—Al nin scyetz yi eꞌ awutzicy yi baꞌn choꞌc tan chiwekleꞌn chiburuꞌ nin baꞌn chaꞌj Canaán le chitanum. 18 Ej nin baꞌn chipakxij junt tir tu itaj nin cyakil ixonl. Baꞌn lwakꞌ jun chinajbil te yi txꞌotxꞌ yi mas balaj tzoneꞌj Egipto.e Baꞌn tzun baj yi eꞌchk takleꞌn balaj cyaꞌn yi na jal tzoneꞌj. 19 Nchaꞌtz al nin scyetz yi baꞌn chicyꞌajnin cobox careꞌt tan ticyꞌleꞌn tzaj itaj scyuchꞌ chinajal. 20 Ej nin al nin scyetz tan qui sotzeꞌn chicꞌuꞌl tan quicyꞌleꞌn tzaj yi eꞌchk chimeꞌbiꞌl na cyakil cuꞌn yi eꞌchk takleꞌn balaj yi at tzoneꞌj Egipto, cyetz sbneꞌ, stzun faraón bantz.
21 I nintzun cyulejaꞌtz yi eꞌ cyꞌajl Israel. Toqueꞌn tzun Ẍep tan takꞌleꞌn eꞌchk careꞌt scyetz, nin yi chiwaꞌ yi tajweꞌn tetz chibeꞌ. 22 Ej nin nchaꞌtz takꞌleꞌn jujun lmuj beꞌch cyetz. Ma tetz Benjamín takꞌ oꞌ lmuj beꞌch tetz tu ox cient piẍ sakal. 23 Ej nin tetz yi taj Ẍep eꞌ ben tabnal lajuj buruꞌ yi cyꞌaꞌn len yi eꞌchk takleꞌn yi mas balaj yi na jal Egipto. Nchaꞌtz eꞌ bent lajujt buruꞌ yi cyꞌaꞌn triw tu pam tu yi mas takleꞌn yi baꞌn xcon tetz waꞌ yi taj tul yi tiemp yi xonk tbeꞌ tan tuleꞌn Egipto.
24 Itzun yi chijatxol quib Ẍep scyuchꞌ yi eꞌ stzicy nintzun taltz scyetz:
—Cheb cuntuꞌ cxbenwok nin qui na waj yil cxoꞌyintzink wok tbeꞌ.
25 Ajeꞌn nintzun eꞌ bantz nin eꞌ opontz tu chitaj jalen Canaán. 26 Itzun yi cyoponeꞌn nintzun cyaltz tetz Jacow yi chitaj: “Taꞌ, itzꞌeꞌt Ẍep. Ej nin iꞌ yi wiꞌtz ajcaw tetz Egipto,” cheꞌch tzun bantz. Itzun yi tbital Jacow, qui nintzun aꞌw yoltz taꞌn, nin qui nin tocsaj iꞌ chiyoltz. 27 Poro yi cyoqueꞌn tan xtxoleꞌn cyakil cuꞌn yi xtxolbil yi tal Ẍep scyetz nin yi tilol iꞌ yi eꞌchk careꞌt yi ntakꞌ Ẍep tan ticyꞌleꞌn nin iꞌ tu yi najal jalen Egipto, nintzun ul yos tuchꞌ. Ej nin tocsaj chiyol yi eꞌ cyꞌajl. 28 Itzun taltz: “¡Ma jaluꞌ na wocsaj yi itzꞌeꞌt incyꞌajl! Nchimben bin tan tilweꞌn yi ntaxk chinquim,” stzun Israel bantz.