44
1 Itzun yi wiꞌt chiwaneꞌn, nintzun cawunin Ẍeptz tetz yi martomaꞌ:—Cun nojsaj chisac yi eꞌ yajeꞌj tan ixiꞌn triw. Nojk cunin awaꞌn. Nin cuknin yi jamel stziꞌak chisac. 2 Nchaꞌtz na waj yil cu nin weri inlak yi sakal cuꞌn, stziꞌ yi sac yi jun mas juy, tuml yi jamel triw iꞌ.
Ej nin yaꞌtz nintzun tulej yi martomaꞌ.
3 Itzun yi tuleꞌn skil le junt eklok, nintzun takꞌ Ẍep amaꞌl scyetz tan chipakxeꞌn le chiꞌamaꞌl. Cyꞌaꞌn len chiburuꞌ cyaꞌn yi chipakxeꞌn. 4-5 Yi ntaxk chiben mas joylaj, nintzun cawunin Ẍep tetz martomaꞌ. Itzun taltz:
—Cun tzꞌamweꞌ yi cobox yaj yi eꞌ ulak tzoneꞌj. Nin baꞌn tzawal scyetz: “¿Nxac nsaj italkꞌal yi lak impatrón yi sakal cuꞌn? Na na xcon taꞌn tetz tcꞌaꞌ nin tan kꞌejaꞌn. ¿Nxac mibanwok yi jun takleꞌnaꞌtz te yi impatrón? Wech pawor mban iꞌ tzitetz. ¡Chin cachiꞌ nin mibanwok!” cẍchij sban scyetz, stzun Ẍep bantz tetz martomaꞌ.
6 Yi chitxꞌamxeꞌn tan martomaꞌ, nintzun taltz yi xtxolbilaꞌs scyetz quib yi baj tlol Ẍep tetz. 7 Yi quibital yi eꞌ stzicy Ẍep, nintzun cyaltz:
—¿Mbi tzuntz na xtxum yi patrónuꞌ yi takleꞌnaꞌs skeꞌj? Na yi oꞌ ketz qui na kaban yi eꞌchk takleꞌnaꞌtz. 8 Na ja tiluꞌ taꞌ, yi ja ul yi jun txꞌakaj pwok kaꞌn yi njal stziꞌak yi kasac yi koponeꞌn Canaán. Yi ko yaꞌtz nkaban ¿ẍeꞌn tzun kalkꞌ nin oro nka sakal xe caꞌl yi patrónuꞌ? 9 ¡Kol jal skaxoꞌl baꞌn lquim yi jun yi qꞌuil tetz! Ma yi oꞌ ketz baꞌn kacyaj tetz esclaw yi patrónuꞌ, cheꞌch stzicy Ẍep bantz.
10 Beneꞌn tzun tlol yi martomaꞌ:
—Baꞌn, yaꞌtz nin lkulejtz chi mitalwok. Poro ntin yi jun yi qꞌuil tetz yi lak, tzꞌocopon iꞌ tetz esclaw te yi impatrón. Ma yi eꞌ mas chelepon liwr na quiꞌc cyetz chipaj.
11 Lajkeꞌl nintzun cweꞌn tzaj yi cyektz cyaꞌn. Nin jeꞌ chijakol stziꞌ yi chisac swutz yi martomaꞌ. 12 Nin oc iꞌ-tz tan joyleꞌn tulak chisac. Choꞌn tzun xeꞌteꞌn tzaj te yi bajxnak jalen te yi chꞌiꞌp. Ej nin yi jun lakaꞌtz, choꞌn tzun jaleꞌn le sac Benjamín. 13 Yi quilol, nintzun eꞌ octz tan katzleꞌn yi beꞌch cyetz tan bis yi ateꞌ cuꞌnt. Ej nin jeꞌ junt tirt yi cyektz cyaꞌn te yi chiburuꞌ. Pakxeꞌn nintzun eꞌ bantz tnum.
14 Itzun cyoponeꞌn Judá tu yi eꞌ titzꞌun xe caꞌl Ẍep, nintzun eꞌ cu joklok jalen cuꞌn cweꞌn poneꞌn wutz chiplaj wuxtxꞌotxꞌ. 15 Inti Ẍep nin ben tlol scyetz:
—¿Mbi tzun na iban itetz? ¿Qui peꞌ na el itxum tetz yi in nachol, nin na el intxum tetz yi mbi na ibanwok? stzun Ẍep scyetz.
16 —Ko yaꞌtz taꞌ, ¿mbi tzun kaltz teruꞌ? Na ja wiꞌt katxamxij. Quil jal puntil kaꞌn tan talcheꞌn teruꞌ yi quiꞌc ketz kil nkajuch. Na ja loꞌ lajluchax tan Ryos. Baꞌn tzun koꞌc len kacyakil cuꞌn tetz esclawuꞌ, tuml yi jun kale njaleꞌt yi lakuꞌ, stzun Judá tetz.
17 Stzaꞌwel tzun Ẍep:
—Quiꞌ loꞌ, quil tzimban yi junaꞌtz. Quil cxcyajwok tetz inesclaw, ma na ntin cuꞌn yi jun kale njaleꞌt weri inlak. Ma axwok itetz baꞌn cxaꞌjwok, stzun Ẍep bantz.
18 Toqueꞌn tzun Judá tan moxeꞌn:
—Max cꞌuꞌluꞌ taꞌ, takꞌeꞌuꞌ amaꞌl swetz tan walol cobox inyol teruꞌ. Quil tzicyꞌanuꞌ sweꞌj, na iluꞌ teruꞌ niꞌcuꞌn kꞌejuꞌ tu wutzileꞌn faraón. 19 Yi kulakeꞌn bajx tir ja jakuꞌ jun xtxolbil sketz nin je yoluꞌeꞌj: “¿Itzꞌeꞌt peꞌ itaj? ¿At peꞌ junt ititzꞌun?” chijuꞌ ban sketz. 20 Itzun kal ketz teruꞌ: “Itzꞌeꞌt wutzileꞌn kataj nin at junt cyꞌajl iꞌ yi xicyeꞌt. Nsken tijin cꞌuꞌl kataj yi titzꞌeꞌn yi jun cyꞌajlaꞌtz. Ntin cuꞌn iꞌ itzꞌeꞌt. Na quimnak yi junt stzicy,a yi junit chitaj chitxuꞌ. Chaꞌstzun te wiꞌnin na pekꞌ wutzileꞌn kataj teꞌj.” 21 Ej nin nchaꞌtz ja taluꞌ sketz: “Cyꞌajwok tzaj yi ititzꞌunaꞌtz na na waj wech wutz,” chijuꞌ ban sketz. 22 Ja tzun kal teruꞌ yi quiꞌc rmeril tan cyajeꞌn cyen tilol yi taj, na ko yaꞌtz squimok wutzileꞌn kataj tan bis. 23 Poro nin taluꞌ sketz: “Ko quil xom tzaj ititzꞌun tziteꞌj yil cẍuꞌlwok junt tir, quiꞌc tzun rmeril tan ijiloneꞌn swetz,” chijuꞌ bantz.
24 ”Itzun yi kapakxeꞌn ja tzun kal yi xtxolbilaꞌseꞌj tetz wutzileꞌn kataj. 25 Ma yi xoneꞌn tiemp nin tal kataj sketz: “Cun lokꞌwok muꞌẍt kawaꞌ jalen Egipto.” 26 Poro nin kaltz tetz yi quiꞌc rmeril yi nink kaben yi ko quil xomnin yi kitzꞌun skeꞌj. Quiꞌc cuj yi nink kajilon tu yi ajcaw jalen Egipto ko quiꞌc Benjamín xomij skeꞌj yil kopon swutz iꞌ. 27 Sajeꞌn tzun tlol kataj sketz:b “Na itilwok yi cobintziꞌ incyꞌajl ja jal te kꞌajtzun wuxkel. 28 Jun scyeri yi cobaꞌtz txꞌakxnak.c Ja loꞌ baj tan smaron txuc. Quiꞌt nwil wutz iꞌ junt tir. 29 Ej nin kol ben yi junt tal incyꞌajleꞌj itaꞌn, nin ko takleꞌn nin sban, chinquimok tan bis. Poro ipajwok sbneꞌ,” stzun iꞌ bantz sketz.
30 ”Chaꞌstzun te ko quiꞌt xomij yi kitzꞌuneꞌj skeꞌj yil kopon, squimok wutzileꞌn kataj tan bis. 31 Na choꞌn ajlij cꞌuꞌl kataj teꞌj. Ej nin sjalok kapaj kol quim kataj tan bis. 32 Ma yi in wetz walnak tetz wutzileꞌn kataj: “Jun cuꞌn yol taꞌ tzꞌult junt tir yi cyꞌajluꞌ waꞌn. Ej nin ko quiꞌt tzꞌul waꞌn, in tzun ajpaj sbneꞌ swutzuꞌ sbneꞌ opontunintz.” 33 Ma jaluꞌ taꞌ, na cuꞌ inwutz teruꞌ yi nink takꞌuꞌ amaꞌl swetz tan incyajeꞌn cyen tetz xel Benjamín nin tan woqueꞌn tetz esclawuꞌ. Ma iꞌ tetz baꞌn takꞌuꞌ amaꞌl tetz tan tajeꞌn junt tir scyuchꞌ eꞌ stzicy. 34 Na quiꞌc rmeril tan impakxeꞌn te intaj yi ko qui xomij yi xicy sweꞌj. Na qui na waj wil yi bis oꞌkl yi sbneꞌ intaj tan paj yi quiꞌt tzꞌopon Benjamín teꞌj iꞌ, stzun Judá bantz.