Yi beneꞌn ticyꞌleꞌn Benjamín Egipto
43
1 Beneꞌn nintzun ban loꞌon yi weꞌj Canaán.a 2 Itzun bajeꞌn yi triw cyaꞌn Jacow scyuchꞌ yi eꞌ cyꞌajl yi ẍchicyꞌajeꞌ tzaj Egipto, nintzun tal Jacow scyetz:
—Or tzibeneꞌnt junt tirt, nin cun lokꞌwok muꞌẍt kawaꞌ triw, stzun iꞌ bantz.
3 Sajeꞌn tzun stzaꞌwel Judá. Itzun taltz:
—Baꞌn taꞌ. Poro sajcunin tlol yi jun yaj yi cꞌayin tzaj yi triw sketz, yi quiꞌt na taj iꞌ ltilcuꞌn kawutz choneꞌj yi ko qui cyꞌaꞌn yi kitzꞌun kaꞌn yil kopont.b 4 Ntin yi kol stzakpninuꞌ yi kitzꞌun skeꞌj, baꞌn tzun lkabentz tan lokꞌcheꞌn triw. 5 Poro ko quil stzakpninuꞌ yi kitzꞌun skeꞌj, quil kaben ketz. Na saj cunin tlol yi jun yajaꞌtz sketz, yi quiꞌt na taj ltil cuꞌn kawutz choneꞌj yi ko qui cyꞌaꞌn yi kitzꞌun kaꞌn, stzun Judá tetz taj.
6 —¿Mbi tzuntz yi wiꞌnin tunin eꞌch takleꞌn na cxtzanwok tan nucꞌleꞌn sweꞌj? ¿Nxac na italquen wok tetz yi jun yajaꞌtz yi ko at junt ititzꞌun? stzun Jacow scyetz.
7 Sajeꞌn tzun chitzaꞌweltz:
—Iꞌ bin jakon sketz yi ẍeꞌn kutaneꞌn scyuchꞌ yi eꞌ kanajal, na je bin jak iꞌ sketzeꞌj: “¿Itzꞌeꞌt peꞌ itaj? ¿At peꞌ junt ititzꞌun?” chij iꞌ ban sketz. Nintzun kal ketz yi bintzi, na qui nin el katxum tetz yi ko staleꞌ iꞌ sketz yi tajweꞌn tan beneꞌn kucyꞌal yi kitzꞌun skeꞌj, cheꞌch tzun bantz.
8 Beneꞌn tzun tlol Judá tetz yi taj:
—Ma jaluꞌ taꞌ, ko qui na kaj lkaquim tan weꞌj, stzakpninuꞌ yi kitzꞌun skeꞌj. Choꞌn xomk nin iꞌ sweꞌj. Ej nin ko baꞌn swutzuꞌ taꞌ, baꞌn tzun kaben chan tan lokꞌcheꞌn triw. Quiꞌt tzun kaquimtz tan weꞌj, scyuchꞌ yi eꞌ kanajal. 9 Poro ko takleꞌn biꞌ sban yi kitzꞌun, in tzun teꞌtz yi mero aj paj sbneꞌ ko quiꞌt xomij sweꞌj yil kuꞌlt tzaj swutzuꞌ.c 10 Yi quiꞌk nkoꞌc tan xtxumleꞌn yi xtxolbilaꞌseꞌj, ja kloꞌ wiꞌt el cobix tir kukan tan lokꞌcheꞌn triw.
11 Sajeꞌn tzun tlol Jacow tetz:
—I bin jaluꞌ quiꞌct nin junt rmerilaꞌtz. Poro je bin tzibanwokeꞌj: Baꞌn tzicyꞌajwok nin eꞌchk oy tetz yi jun ajcawaꞌtz. Cyꞌajwok nin yi eꞌchk takleꞌn yi mas balaj yi na jal tzoneꞌj le ketz katanum. Cyꞌajwok nin balsamo, cyꞌajwok nin taꞌal wunak txuc, cyꞌajwok nin perfum, cyꞌajwok nin mirra, ej nin cyꞌajwok nin nues tu almendra. 12 Nchaꞌtz cyꞌajwok nin cob tir mas tajlal yi pwok swutz yi pwok yi ben itcyꞌal bajx tir. Nin axwok nin kloꞌ xakꞌon cyen yi pwok yi ult itaꞌn na qui cunin batz xubseꞌn ibanwok. 13 Quiloꞌk bin wok junt tir. Ej nin cyꞌajwok nin ititzꞌun tziteꞌj. 14 Nink tzꞌel kꞌajab Kataj Ryos tziteꞌjwok. Na yi ketz kaRyosil wiꞌnin ẍchamil, nin na xcyeꞌ te cyakil. Xcyek tzun iꞌ tan telseꞌn tzaj liwr yi junt incyꞌajl yi at cyen xetzeꞌ. Nin nchaꞌtz xcyek tan tulseꞌn Benjamín. Ban wetz, yi ko quiꞌct jal jun incyꞌajl sban cyen, ja binaꞌtz.
15 Chibaj beneꞌn tzun yi eꞌ cyꞌajl Jacow. Ej nin ben quicyꞌal yi eꞌch oy, tu cobt tir mas yi tajlal pwok. Nchaꞌtz eꞌ ben quicyꞌal Benjamín. Beneꞌn nintzun eꞌ bantz Egipto.
Itzun bantz yi cyoponeꞌntz swutz Ẍep, 16 nin ben tilol Ẍep yi xomij Benjamín scyeꞌj. Beneꞌn tzun tlol tetz yi martomaꞌ:
—Cyꞌajweꞌ nin yi cobox yajeꞌj xe incaꞌl. Ej nin baꞌn tzabiy cuꞌn jun wacẍ, nin banaj baꞌn tetz, na yi eꞌ yajeꞌj choꞌn ẍchiwank swuchꞌ tetz chajcuꞌn kꞌej.
17 Inin tzun tulej yi martomaꞌaꞌtz quib yi tal Ẍep tetz. Nintzun eꞌ ben ticyꞌleꞌn yi eꞌ stzicy Ẍep xe caꞌl.
18 Itzun bantz yi chibeneꞌn ticyꞌleꞌn xe caꞌl Ẍep nin eꞌ xobtz, nintzun cyaltz squibil quib:
—Yi xtxolbileꞌj iꞌtz tan kasubleꞌn tuꞌ, tan paj loꞌ yi pwok yi ajt junt tir tul yi eꞌchk kasac. Quicunin batz chocopon tan kabuchleꞌn nin skacyajk cyen kacyakil cuꞌn tetz esclaw cyuml yi eꞌ kaburuꞌ.
19 Ma yi cyoponeꞌn stziꞌ yi puertil yi caꞌl Ẍep nintzun eꞌ jilontz tetz martomaꞌ, nin cyaltz:
20 —¡Siwl taꞌ! Yi mero bintzi iꞌtz yi kulakeꞌn bajx tir ja kuꞌlak tan lokꞌcheꞌn triw. 21 Ma yi kapakxeꞌn Canaán nin yi kujeweꞌn yi bajx akaleꞌn nin yi jeꞌn kapujul kasac, ja kil yi jamel yi triw yi nkachoj. Niꞌcuꞌn yi tajlal tu yi pwok yi ncyaj kakꞌol scyeruꞌ tetz jamel yi ixiꞌn. Ma jaluꞌ ja ult junt tir yi pwok kaꞌn. 22 Nchaꞌtz ja ul mas pwok kaꞌn tan lokꞌcheꞌn mas triw. Poro qui na pujx kaꞌn naꞌ akꞌon cuꞌn kapuꞌk tulak yi kasac yi kajeꞌn, cheꞌch bantz tetz martomaꞌ.
23 —Quil cxbisunwok nin quil cxobwok, na i loꞌ iRyosil, yi Ryosil itaj, yi mmakꞌon cuꞌn ipuꞌk tulak isac. Na yi in wetz ja intzꞌam yi jamel triw yi itakꞌwok.
Beneꞌn tzun martomaꞌ tan telseꞌn tzaj Simeón xetzeꞌ nin ben tcyꞌaltz scyeꞌj yi eꞌ stzicy. 24 Kalenaꞌtz tzun cyoqueꞌntz xe caꞌl Ẍep. Ej nin takꞌ martomaꞌ aꞌ scyetz tan chitxꞌajol quikan. Nchaꞌtz takꞌ chiwaꞌ yi eꞌ chiburuꞌ yi cyꞌaꞌn cyaꞌn. 25 Ma yi eꞌ stzicy Ẍep cyoqueꞌnt tzuntz tan nucꞌleꞌn eꞌchk oy yi cyꞌaꞌn cyaꞌn tan cyoyil tetz Ẍep. Nintzun eꞌ chꞌiw jalen yi toponeꞌn Ẍep chajcuꞌn kꞌej na nsken quibit yi at tpombil iꞌ tan waꞌaꞌn.
26 Yi toponeꞌn Ẍep xe caꞌl nintzun cyakꞌ yi oyaꞌtz yi cyꞌaꞌn cyaꞌn, nin eꞌ cu jokloktz jalen yi cweꞌn poneꞌn yi wutz chiplaj wuxtxꞌotxꞌ. 27 Toqueꞌn tzun Ẍep tan jakleꞌn yi ẍeꞌn chiyol, nin tan jakleꞌn scyetz:
—¿Ẍeꞌn yol itaj yi italwok swetz? ¿Baꞌn peꞌ iꞌ? ¿Itzꞌeꞌt peꞌ?
28 —Baꞌn taꞌ. Baꞌn atit yi ẍchakumuꞌ yi wutzileꞌn kataj.
Nintzun cuꞌ chiwutz junt tir tan takꞌleꞌn kꞌej Ẍep.
29 Itzun yi xmayineꞌn nin Ẍep scyetz nintzun til yi titzꞌun Benjamín yi junit chitaj chitxuꞌ tuchꞌ. Beneꞌn tzun tlol scyetz:
—¡Ah! yi xicyeꞌj, yaꞌtz loꞌ ichꞌiꞌpilwok yi italwok swetz.
Beneꞌn tzun tlol tetz Benjamín:
—Aẍ jun cꞌoloj yaj, takꞌ tzaj Kataj banl tzawibaj.
30 Itzun yi beneꞌn tlol Ẍep yi yolaꞌseꞌj nintzun okꞌ cꞌuꞌltz te yi titzꞌun. Lajkeꞌl nintzun beneꞌn iꞌ ẍchuc xe cuart. Nin oc jopol tibtz tan oꞌkl tan yi tzatziꞌn yi at cuꞌnt yi tilol wutz yi titzꞌun. 31 Yi ticyꞌeꞌn yi oꞌkl teꞌj nintzun oc tan xtxꞌajleꞌn wutz nin eltzaj junt tir ẍchixoꞌl. Qui nin tzun ẍchaj iꞌ yi mbi na icyꞌ tcꞌuꞌl, ma na ja tal iꞌ. “Ma jaluꞌ cyꞌajwok tzaj kalak na kawank jalcuꞌn.”
32 Apart waneꞌt tetz Ẍep. Ej nin apart eꞌ waneꞌt yi eꞌ stzicy. Nchaꞌtz apart eꞌ waneꞌt yi eꞌ aj Egipto yi na chakꞌuj tu Ẍep, na xan ẍchiwutz yi nink chiwan scyuchꞌ yi eꞌ hebrey. 33 Cawuneꞌn nintzun Ẍep scyetz yi eꞌ stzicy tan chicꞌoleweꞌn cuꞌn. Txolcunin tzun eꞌ bantz. Xomquen tuꞌ te chiyob. Bajx cꞌoleweꞌn cuꞌn yi bajx nak taꞌn na at tetz kꞌej, nin wiꞌtzbil tlen cꞌoleweꞌn yi chꞌiꞌp taꞌn. Ma cyetz wiꞌnin tzun cyeleꞌn yabtz teꞌj nintzun eꞌ baj chixmayil quib squibil quib tan yi xtxolbil yi bajij scyeꞌj. 34 Tkꞌol tzun Ẍep yi chiwaꞌ tuchꞌ yi tetz waꞌ yi at wi tetz mes. Itzun yi lak Benjamín, oꞌ cuꞌn tir mas nim ntakꞌ swutz yi eꞌ stzicy. Eꞌ wan tzuntz nin eꞌ ucꞌaꞌ-tz. Wiꞌnin tzun eꞌ tzatzineꞌntz tu Ẍep.