Yi chibeneꞌn yi eꞌ stzicy Ẍep Egipto
42
1 Itzun bantz yi tbital Jacow yi at triw Egipto, nintzun taltz scyetz yi eꞌ cyꞌajl: “¡Or yaj! ¿Mbi na ibanwok tzoneꞌj? Tunin na ixmaywok cuntunin itibtz, 2 na ja aꞌlchij swetz yi at triw Egipto. Or tzibeneꞌn. Cun lokꞌwok muꞌẍ kuxiꞌn triw, tan qui kaquimeꞌn tan weꞌj.”a 3 Beneꞌn nintzun eꞌ ban lajujtz scyeri eꞌ stzicy Ẍep tan lokꞌcheꞌn triw jalen Egipto. 4 Poro qui nin ben stzakpul wutzileꞌn Jacow yi Benjamín, yi titzꞌun Ẍep scyeꞌj yi eꞌ stzicy. Na nin octz tan xtxumleꞌn ko takleꞌn biꞌ sban. 5 Choꞌn tzun chixomeꞌn nin yi eꞌ cyꞌajl wutzileꞌn Israel ẍchixoꞌl coboxt aj Canaán yi choꞌn at chibembiltz Egipto tan lokꞌcheꞌn chiwaꞌ. Na nchaꞌtz, nsken wiꞌt ben loꞌon yi weꞌj Canaán.6 Ma yi Ẍep, iꞌ tzun yi caꞌp ajcawtz tibaj cyakil yi tnum Egipto. Nin iteꞌn nin iꞌ na cꞌayin triw scyetz cyakil yi eꞌ wunak yi naꞌ cuntuꞌ na chibaj sit tulak eꞌchk tnum.
Itzun bantz yi cyocomponeꞌn yi eꞌ stzicy Ẍep swutz, nintzun eꞌ baj cuꞌn mejlok swutz, jalen cuꞌn yi baj cweꞌn poneꞌn yi wutz chiplaj wuxtxꞌotxꞌ. 7 Nicyꞌ yi baj cyocomponeꞌntz swutz Ẍep, ninin tzun tajskej iꞌ chiwutz yi eꞌ stzicyaꞌtz, poro quinin tal scyetz. Poro yi Ẍep nintzun xcon cobox yol taꞌn yi chin quiw nin. Itzun taltz scyetz:
—Ma axwok itetz, ¿mbi tzun na ijoywok tzoneꞌj? ¿Naꞌ ncẍsiteꞌt wok?
—Choꞌn bin nkabaj saj ketz Canaán. Ja kuꞌl tan lokꞌcheꞌn triw, cheꞌch tzun ban nintz.
8 Nsken tajskej Ẍep chiwutz yi eꞌ stzicy, ma yi eꞌ cyetz quinin el chitxumtz tetz yi ko i iꞌaꞌtz yi Ẍep. 9 Tuleꞌn tzun txꞌakx tcꞌuꞌl Ẍep yi wutzicyꞌ yi ban scyeꞌj yi eꞌ stzicy.b Itzun taltz scyetz:
—Yi axwok itetz axwok tuꞌ xkꞌukwil. Ntin ja cxuꞌlwok tan tilweꞌn yi ẍeꞌn taneꞌn yi katanum, stzun Ẍep scyetz.
10 —Quiꞌ taꞌ, yi oꞌ ketz oꞌ xconsbeꞌtzuꞌ. Ej nin ntin ja kuꞌl tan lokꞌcheꞌn muꞌẍ kawaꞌ triw. 11 Nin yi cobox oꞌ ketz junit yi ketz kataj, nin oꞌ balaj wunak, cyaꞌl cunin na koqueꞌt ketz tetz xkꞌukwil, cheꞌch tzun bantz.
Poro yi Ẍep nin oc chꞌinchꞌuj tan talcheꞌn scyetz:
12 —Nkꞌeꞌtz bintzi na ital. Na yi ax itetz ntin ja cxuꞌlwok tan xkꞌukeꞌn yi ẍeꞌn taneꞌn yi katanum, stzun iꞌ bantz.
13 —Quiꞌ taꞌ, cheꞌch. —Yi oꞌ ketz oꞌ xconsbeꞌtzuꞌ. Coblaj kaxoneꞌn yi kitzꞌun kutzicy kib. Junit kataj. Jalt yi kachꞌiꞌpil ja cyaj cyen tu wutzileꞌn kataj jalen Canaán, na choꞌn nka saj ketz Canaán. Ma yi junt kitzꞌun, aloꞌ atiteꞌt iꞌ nin ẍeꞌn loꞌ beneꞌn iꞌ.
14 Beneꞌn tzun stzaꞌwel Ẍep yi chiyol, itzun taltz:
—Jun cuꞌn yol, axwok cuꞌn xkꞌukwil. 15 Poro skileꞌ ko bintzinin na ital nka quiꞌ. Tan biꞌ faraón quil xintzakplenwok jalen yil tzꞌul yi ichꞌiꞌpil tzinwutz. 16 Or bin sbeneꞌn jun tzixoꞌl tan ticyꞌleꞌn. Ma yi mas chocopon cyen pres, bantz kilol yi ko bintzinin mitalwok. Nin yi ko nkꞌeꞌtz bintzi yi mitalwok, axwok nintzun xkꞌukwil teraꞌtz. Jun cuꞌn yol na walnin tzitetz, stzun Ẍep bantz. 17 Nintzun eꞌ oc ox kꞌej xetzeꞌ takꞌun Ẍep.
18 Itzun le toxeꞌn kꞌej nintzun tal Ẍep scyetz yi eꞌ stzicy:
—Yi in wetz na wek ẍchiꞌ Ryos, tzincuyeꞌ yi ipaj kol tziban yi xtxolbileꞌj yi swaleꞌ tzitetz. 19 Yi ko bintzinin na ital, yi ko axwoknin balaj wunak, cyajk jun stzixoꞌlwok tzoneꞌj xetzeꞌ. Ma yi eꞌ mas, baꞌn lchaꞌjt nin baꞌn chicyꞌajnin triw tetz chiwaꞌ chinajal. 20 Nin baꞌn cxpakxijwok lajkeꞌl. Poro cyꞌajwok tzaj yi ititzꞌun yi tal ichꞌiꞌp. Kalenaꞌtz tzun lkil yi ko bintzinin na ital. Nin yi ko quil tzꞌul itaꞌn xquimok tzun woktz, stzun Ẍep bantz scyetz.
Nintzun cuꞌ-tz ẍchiwutz yi eꞌ stzicy Ẍep yi mbi cuꞌn baj tlol scyetz. 21 Chibaj xeꞌteꞌn tzuntz tan yol squibil quib. Itzun cyaltz:
—Yi mero bintzi, chin mal nin banakoꞌ te tal kitzꞌun. Na qui nin oc jun yol te kawiꞌ nicyꞌ yi na cuꞌ wutz iꞌ sketz tan teleꞌn kakꞌajab teꞌj. Wech na kilnin cunintz tzituchꞌ yi chin bisnin tal taneꞌn iꞌ-tz tkakꞌab. Chaꞌstzun tej ja ul yi jun chin sotzaj cꞌuꞌlal skawutz ketz jaluꞌ, cheꞌch tzun bantz squibil quib.
22 Sajeꞌn tzun stzaꞌwel Rubén yi chiyoltz:
—Qui tzun wal tzitetzwok yi quiꞌ kloꞌ iban wok yi jun xtxolbilaꞌtz teꞌj tal kitzꞌun.c Poro qui nin oc inyol teꞌj iwiꞌ. Anaꞌ tzuntz skachojeꞌ yi kil yi quimeꞌn yi kitzꞌun kaꞌn, stzun Rubén bantz.
23 Qui tzun el chitxum tetz yi ko na icyꞌ yi chiyoltz le wiꞌ Ẍep. Na yi toqueꞌn Ẍep tan yol ẍchiwutz nin joy iꞌ junt tan toqueꞌntz tan xtxꞌixpeꞌn yi yol iꞌ le yi cyetz chiyol. 24 Teleꞌn tzaj tzun Ẍeptz ẍchixoꞌl nin xeꞌtijtz tan oꞌkl. Itzun yi wiꞌt ticyꞌeꞌn pajtz tan oꞌkl, nin yi quiwixeꞌn talmaꞌ-tz tan yol scyetz nin oc pon junt tir chixoꞌl. Yi tocoponeꞌn ẍchixoꞌl nintzun el jatxol yi Simeón nin cu cꞌaloltz. 25 Kalenaꞌs tzun cawuneꞌn nin Ẍep scyetz yi eꞌ tetz mos tan cweꞌn chinojsal chisac tan triw. Nchaꞌtz cawunintz scyetz tan tajeꞌn junt tir yi jamel tulak chisac. Nin cawunintz tan beneꞌn akꞌij chiwaꞌ tetz chibeꞌ. Ej nin yaꞌtz nintzun bantz. 26 Chibeneꞌn tzun yi eꞌ stzicy Ẍep tan jeꞌseꞌn yi cyektz teꞌjak chiburuꞌ. Ma yi chibaj wekxeꞌn, ajeꞌn nin eꞌ bantz.
27 Itzun te yi cyoponeꞌntz tul yi amaꞌl kale eꞌ baj cyaj cyent tan watl, beneꞌn tzun jun tan pujleꞌn stziꞌ yi tetz sac, tan jeꞌseꞌn tzaj cbaꞌs triw tetz chiwaꞌ eꞌ buruꞌ. Nintzun nojcyentz teꞌj yi choꞌn at tzaj yi tetz puꞌk stziꞌ yi sac. 28 Beneꞌn tzun tlol scyetz yi eꞌ tuchꞌ:
—¡Xmaywok tzaj! Ja ajtzaj takꞌleꞌn yi wetz impuꞌk. Je, at stziꞌ insaqueꞌj, stzun iꞌ bantz.
Xobeꞌn nintzun eꞌ bantz, nin eꞌ baj xeꞌtijtz tan lucneweꞌn tan paj yi xoꞌw yi ateꞌ cuꞌnt. Eꞌ xeꞌteꞌn tzuntz tan yol squibil quib. Itzun cyaltz:
—¿Mbi nintzun i ilaꞌtz yi ncuꞌ nucꞌuꞌl Ryos skeꞌj? cheꞌch tzun bantz.
29 Yi wiꞌt cyoponeꞌn Canaán, nintzun baj quen chitxoliltz tetz Jacow yi chitaj yi mbi cuꞌn eꞌ bantz. Itzun cyaltz:
30 —I yi jun yaj yi na cawun le tnum kale nxkakeꞌt, chin cachiꞌ nin yol baj tlol iꞌ sketz. Na i ban swutz iꞌ oꞌ tuꞌ xkꞌukwil ketz. 31 Nintzun kal ketz tetz yi oꞌ ketz oꞌ balaj wunak, nin cyaꞌl cunin na koqueꞌt ketz tetz xkꞌukwil. 32 Ej nin nchaꞌtz kal ketz yi coblaj cuꞌn ketz kaxoneꞌn yi kitzꞌun kutzicy kib. Junit yi ketz kataj. Ntin jun kitzꞌun choꞌn at cyen teꞌj kataj ma yi junt quiꞌct iꞌ at, ẍeꞌn loꞌ beneꞌn iꞌ, koꞌch ketz bantz.
33 ”Itzun yi tbital yi jun yajaꞌtz yi xtxolbil yi nkal tetz, nintzun taltz sketz: “Ibin jaluꞌ, tan teleꞌn intxum tetz yi ko bintzinin axwok balaj wunak, na waj yil lcyaj cyen jun tzixoꞌlwok xetzeꞌ. Ma ax itetz baꞌn cxben tan nojseꞌn yi isac nin cyꞌajwoknin muꞌẍ triw tetz chiwaꞌ inajal. 34 Itzun yil cxsajwok junt tir, cyꞌajwoktzaj yi ititzꞌun, yi tal chꞌiꞌp yi na ital, nin yi kol tzꞌul itaꞌn, swocsajeꞌ tzuntz yi iꞌtz yi mero bintzi yi na ital yi axwok balaj wunak. Nkꞌeꞌtz tzun axwok xkꞌukwil. Kalenaꞌtz tzun ltzꞌel liwr yi jun yi scyajk xetzeꞌ. Nchaꞌtz swakꞌeꞌ tzun amaꞌl tzitetz tan ixoneꞌn alchok amaꞌlil tzoneꞌj Egipto,” stzun yi jun yajaꞌtz ban tzajtz.
35 Itzun te yi baj teleꞌn tzaj chikojol yi triw yi cyꞌaꞌn cyaꞌn tulak chisac nin ben quiloltz yi baj cyeleꞌn tzaj wokpuj jujun tal txꞌuꞌy yi cꞌalijlen stziꞌ. Choꞌn tzun at tzaj yi chipuꞌktz tul. Itzun yi quilol yi baj cyeleꞌn tzaj wokpuj yi jujun tal txꞌuꞌyaꞌtz tulak yi chisac ninin tzun eꞌ baj xobtz tuml chitaj.
36 Beneꞌn tzun tlol Jacow scyetz yi eꞌ cyꞌajl:
—Ko peꞌ quiꞌct nin jun tal incyꞌajl sbneꞌ cyen itaꞌn wok. Je nin Ẍep quiꞌct at skeꞌj tzituchꞌ. Nchaꞌtz Simeón quiꞌt mmuꞌltz itaꞌn wok. Ma jaluꞌ na itajwok tzitcyꞌajwoknin Benjamín. Tin tzun in, na chintzaj tan bis tan oꞌkl yi xtxꞌakxleꞌnix yi jun incyꞌajl. Ma axwok itetz qui na cxbisunwok, stzun Jacow bantz.
37 Jiloneꞌn nintzun Rubén tetz yi taj. Itzun taltz:
—Ma jaluꞌ bin taꞌ, stzakpninuꞌ Benjamín skeꞌj. In lnicyꞌanin, nin in teꞌnin lnuꞌlsan swutzuꞌ. Ej nin yi ko quil tzꞌult waꞌn, baꞌn tzun lcheꞌ biycunuꞌ yi cob tal wetz incyꞌajl.
38 Sajeꞌn tzun tzaꞌwel Jacow. Itzun taltz:
—Quiꞌc rmeril tan beneꞌn intzakpul yi tal incyꞌajl tziteꞌjwok. Cunin peꞌk kꞌajtzun inẌep yi quimnak. Jaltnin tal Benjamín at cyen sweꞌj. Nin yi ko takleꞌn biꞌ sban iꞌ-tz tikꞌabwok ẍeꞌn tzun tzimban, stzun iꞌ ban. —Na yi in wetz ja chin tijin, nin ipajwok yi kol chinquim tan bis.